କାକରାବାନ,୮ ।୧: ବାମପନ୍ଥୀ ନେତାଙ୍କୁ ଭାରତୀୟ ଜନତା ପାର୍ଟି(ଭାଜପା)ରେ ସାମିଲ ହେବା ପାଇଁ ଅପିଲ କରି ତ୍ରିପୁରା ମୁଖ୍ୟମନ୍ତ୍ରୀ ମାଣିକ ଶାହା ରବିବାର ଭାଜପାକୁ ଗଙ୍ଗା ନଦୀ ସହ ତୁଳନା କରିଛନ୍ତି । ମାଣିକ ଶାହା ବିରୋଧି ଦଳ ନେତାଙ୍କୁ ଅଫର କରିଛନ୍ତି, ତାଙ୍କ ଦଳ ଅର୍ଥାତ୍ ଭାଜପା ଗଙ୍ଗା ଭଳି । ଏଥିରେ ବୁଡ ପକାଇଲେ ପାପରୁ ମୁକ୍ତି ମିଳିଯିବ । ମୁଖ୍ୟମନ୍ତ୍ରୀ ଦକ୍ଷିଣ ତିପୁରାର କାକରାବାନରେ ଜନ ବିଶ୍ୱାସ ରାଲିରେ ଏକ ଜନସଭାକୁ ସମ୍ବୋଧନ କରିବା ବେଳେ ଏହା କହିଛନ୍ତି ।
ମାଣିକ ଶାହା ଆହୁରି ମଧ୍ୟ କହିଛନ୍ତି, ଭାଜପା ଚଳିତ ବର୍ଷ ହେବାକୁ ଥିବା ବିଧାନସଭା ନିର୍ବାଚନରେ ବିଜୟକୁ ନେଇ ଆଶ୍ୱସ୍ତ ଅଛି । ସେ କହିଛନ୍ତି ମୁଁ ସେହି ଲୋକଙ୍କୁ ଅପିଲ କରୁଛି, ଯେଉଁମାନେ ଏବେବି ଷ୍ଟାଲିନ ଓ ଲେନିନଙ୍କ ବିଚାରଧାରାରେ ବିଶ୍ୱାସ କରନ୍ତି ସେମାନେ ଭାଜପାରେ ସାମିଲ ହୁଅନ୍ତୁ । କାରଣ ଏହା ଗଙ୍ଗା ନଦୀ । ଯଦି ଆପଣ ଗଙ୍ଗା ନଦୀରେ ପବିତ୍ର ସ୍ନାନ କରୁଛନ୍ତି, ତେବେ ଆପଣଙ୍କ ସମସ୍ତ ପାପ ନଷ୍ଟ ହୋଇଯିବ ।
ଟ୍ରେନର ଡବା ଏବେବି ଖାଲି ରହିଛି । ଖାଲି ଡବାରେ ବସି ଯାଆନ୍ତୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆମ ସମସ୍ତଙ୍କୁ ସେହି ସ୍ଥାନକୁ ନେଇଯିବେ ଯେଉଁଠାରେ ଆମେ ପହଞ୍ଚିବାର ଅଛି ।
