ଓ୍ବାଶିଂଟନ,୧୪।୩ : ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ଚାଇନାର ଆକ୍ରମଣାତ୍ମକ ମନୋଭାବ ଦେଖି ଆମେରିକା ଏହାକୁ ନିୟନ୍ତ୍ରଣ କରିବା ପାଇଁ ଯୋଜନା କରିଛି। ଚାଇନାକୁ ତିନିପଟୁ ଘେରି ରହିବାକୁ ଆମେରିକା, ଅଷ୍ଟ୍ରେଲିଆ ଏବଂ ବ୍ରିଟେନ ଆଣବିକ ଚାଳିତ ବୁଡ଼ାଜାହାଜ ପାଇଁ ଏକ ପ୍ରମୁଖ ଚୁକ୍ତି ଘୋଷଣା କରିଛନ୍ତି। ସାନ ଡିଏଗୋରେ ଏକ ଶିଖର ବୈଠକରେ ତିନି ଦେଶର ମୁଖ୍ୟମାନେ ଅଂଶଗ୍ରହଣ କରିବା ପରେ ଏହି ଘୋଷଣା କରାଯାଇଛି।
ଆମେରିକାର ରାଷ୍ଟ୍ରପତି ଜୋ ବାଇଡେନ ସାନ ଡିଏଗୋରେ ଅଷ୍ଟ୍ରେଲୀୟ ପ୍ରଧାନମନ୍ତ୍ରୀ ଆନ୍ଥୋନି ଆଲବାନେ ଏବଂ ବ୍ରିଟିଶ ପ୍ରଧାନମନ୍ତ୍ରୀ ଋଷି ସୁନକଙ୍କ ସହ ଏହି ଚୁକ୍ତି ସ୍ବାକ୍ଷର କରି କହିଛନ୍ତି ଯେ ଆମେ ଅଷ୍ଟ୍ରେଲିଆକୁ ମଜବୁତ କରିବୁ ଏବଂ ଏହି ଚୁକ୍ତିନାମା ଅନୁଯାୟୀ ଅଷ୍ଟ୍ରେଲୀୟ କର୍ମଚାରୀଙ୍କୁ ତାଲିମ ଦେବୁ। ଏହି ଚୁକ୍ତି ପରେ ଏହି ତିନି ନେତା କହିଛନ୍ତି ଯେ ଭାରତ-ପ୍ରଶାନ୍ତ ଅଞ୍ଚଳକୁ ମୁକ୍ତ ଏବଂ ଖୋଲା ରଖିବାକୁ ନିଷ୍ପତ୍ତି ନିଆଯାଇଛି।
ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ଚାଇନାର ପ୍ରାଧାନ୍ୟ ହ୍ରାସ କରିବାକୁ ଅଷ୍ଟ୍ରେଲିଆ ଆମେରିକାଠାରୁ ଅନେକ ପରମାଣୁ ଚାଳିତ ବୁଡ଼ାଜାହାଜ କିଣିବ। ଏହା ସହିତ, ଔକସ(ଏୟୁକେୟୁଏସ) ଚୁକ୍ତି ଅନୁଯାୟୀ ଅଷ୍ଟ୍ରେଲିଆ ବ୍ରିଟେନ ସହିତ ମିଶି ବୁଡ଼ାଜାହାଜ ନିର୍ମାଣ କରିବ ଯାହା ନୂତନ ଟେକ୍ନୋଲୋଜି ସହିତ ବିକଶିତ ହେବ। ଏହି ଚୁକ୍ତି ଅନୁଯାୟୀ, ଆମେରିକା ୨୦୩୦ ଦଶକ ପୂର୍ବରୁ ଅଷ୍ଟ୍ରେଲିଆକୁ ତିନୋଟି ଭର୍ଜିନିଆ ଶ୍ରେଣୀର ବୁଡ଼ାଜାହାଜକୁ ୫୦ ବିଲିୟନ ଡଲାରରେ ବିକ୍ରି କରିବ। ଯଦି ଆବଶ୍ୟକ ହୁଏ, ଅଷ୍ଟ୍ରେଲିଆ ୫୮ ବିଲିୟନ ଡଲାରରେ ଆଉ ଦୁଇଟି ବୁଡ଼ାଜାହାଜ କିଣିପାରେ ।
ଚାଇନାର ମୁକାବିଲା ପାଇଁ ଆମେରିକା ଏବଂ ବ୍ରିଟେନ ଅଷ୍ଟ୍ରେଲିଆକୁ ଏହି ଚୁକ୍ତି ଅନୁଯାୟୀ ସୁରକ୍ଷା କଭର ଯୋଗାଇ ଦେବେ। ଏହା ଅଧୀନରେ ତିନି ଦେଶ ମଧ୍ୟ ନିଜର ଜ୍ଞାନକୌଶଳ ଆଦାନପ୍ରଦାନ କରିବେ। ଆଣବିକ ଚାଳିତ ବୁଡ଼ାଜାହାଜ ହାସଲ କରି ଅଷ୍ଟ୍ରେଲିଆ ଭାରତ ମହାସାଗର ଏବଂ ଦକ୍ଷିଣ ଚାଇନା ସାଗରରେ ଏକ ଶକ୍ତିଶାଳୀ ଦେଶ ଭାବେ ଉଭା ହେବ।
ଏହି ଚୁକ୍ତି ଅନୁଯାୟୀ ଅଷ୍ଟ୍ରେଲିଆ ଏବଂ ବ୍ରିଟେନ ମଧ୍ୟ ଏକ ଭିନ୍ନ ପ୍ରକାରର ବୁଡ଼ାଜାହାଜ ନିର୍ମାଣ କରିବେ। ଏସଏସଏନ ଔକସ ନାମକ ଏହି ବୁଡ଼ାଜାହାଜ ଉଭୟ ଦେଶର ନୌସେନାରେ ଅନ୍ତର୍ଭୁକ୍ତ ହେବ। ଆଣବିକ ରିଆକ୍ଟର ଏବଂ ଅସ୍ତ୍ର ପ୍ରଣାଳୀ କ୍ଷମତା ସହିତ ଏହି ବୁଡ଼ାଜାହାଜ ଆମେରିକାର ଟେକ୍ନୋଲୋଜି ଏବଂ ୟୁକେ ଡିଜାଇନ ଉପରେ ଆଧାରିତ ହେବ।
