ବାଲିଗୁଡ଼ା,୨୩।୧୨(ଡି.ଏନ୍.ଏ.): ଭୋପାଳରେ କନ୍ଧମାଳର ଆଦିବାସୀ ଯୁବତୀଯୁବକ କମାଲ ଦେଖାଇଛନ୍ତି। ୧୪ତମ ଆଦିବାସୀ ଯୁବା ବିନିମୟ କାର୍ଯ୍ୟକ୍ରମରେ ଭାଗନେଇ କନ୍ଧମାଳ ଟିମ୍ ପ୍ରଥମ ସ୍ଥାନ ଅଧିକାର କରିଛି । ଗୃହ ମନ୍ତ୍ରଣାଳୟର ନିର୍ଦ୍ଦେଶ କ୍ରମେ କେନ୍ଦ୍ରୀୟ ରିଜର୍ଭ ପୋଲିସ ବଳ ଦ୍ବାରା ୧୪ତମ ଆଦିବାସୀ ଯୁବା ବିନିମୟ ଭୋପାଳରେ କରାଯାଇଥିଲା। ଏଥିରେ ୭ଟି ରାଜ୍ୟ ଯଥା ତେଲେଙ୍ଗାନା, ଆନ୍ଧ୍ରପ୍ରଦେଶ, ମହାରାଷ୍ଟ୍ର, ଛତିଶଗଡ଼, ବିହାର, ଝାଡ଼ଖଣ୍ଡ ଏବଂ ଓଡ଼ିଶାରୁ ସମୁଦାୟ ୧୨ଟି ଟିମ୍ ସାମିଲ ହୋଇଥିଲେ। ଓଡ଼ିଶାର ମାଲକାନଗିରି, କନ୍ଧମାଳ ଓ କଳାହାଣ୍ଡିରୁ ୩ଟି ଟିମ୍ ଭୋପାଳ ଗସ୍ତ କରିଥିଲେ। ସେଠାରେ ଅନୁଷ୍ଠିତ କାର୍ଯ୍ୟକ୍ରମରେ ପାରମ୍ପରିକ ନୃତ୍ୟ ପରିବେଷଣ କରି ଦର୍ଶକଙ୍କ ମନ ମୋହିଥିଲେ। ଏପରିକି କନ୍ଧମାଳ ଜିଲା ତୁମୁଡ଼ିବନ୍ଧ ବ୍ଳକ ଅଧୀନ ବେଲଘର ଅଞ୍ଚଳରୁ ୨୦ଜଣ ଆଦିବାସୀ ଯୁବତୀଯୁବକ ସେଠାରେ ଆଦିବାସୀ ସଂସ୍କୃତି ଏବଂ ପରମ୍ପରା ଭିତ୍ତିକ ନୃତ୍ୟ ପରିବେଷଣ କରି ସମସ୍ତଙ୍କୁ ବିମୋହିତ କରିଥିଲେ । ଦଳ ପ୍ରଥମ ସ୍ଥାନ ଅଧିକାର କରି ୧୦ ହଜାର ଟଙ୍କା ଅର୍ଥରାଶି ପୁରସ୍କୃତ ହୋଇଛି। ଏନେଇ କନ୍ଧମାଳ ଜିଲାବାସୀ ବେଶ ଉତ୍ସାହିତ ଅଛନ୍ତି। ଏହି ସଫଳତା ପାଇଁ ସିଆର୍ପିଏଫ ଓ ନେହେରୁ ଯୁବ କେନ୍ଦ୍ରକୁ ସମସ୍ତ ଶ୍ରେୟ ଦେଇଛନ୍ତି ଟିମ୍ର ସମସ୍ତ ସଦସ୍ୟ।
