ନୂଆଦିଲ୍ଲୀ,୧୭।୨: ଦୀର୍ଘ ଦୁଇ ବର୍ଷର ଅନିଶ୍ଚିତତା ପରେ ବାଂଲାଦେଶରେ ଏକ ନୂତନ ରାଜନୈତିକ ଯୁଗର ଆରମ୍ଭ ହୋଇଛି। ବାଂଲାଦେଶ ନ୍ୟାସନାଲିଷ୍ଟ ପାର୍ଟି (BNP) ମୁଖ୍ୟ ତାରିକ ରହମାନ ମଙ୍ଗଳବାର ଦେଶର ନୂତନ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ହିଂସାତ୍ମକ ବିକ୍ଷୋଭ ଏବଂ ବିଶୃଙ୍ଖଳା ଦେଇ ଗତି କରିଥିବା ଦେଶର ପୁନର୍ଗଠନ ଏବଂ ସ୍ଥିତି ସୁଧାରିବା ଭଳି ଏକ କଠିନ ଆହ୍ୱାନ ଏବେ ତାରିକେଙ୍କ ସମ୍ମୁଖରେ ରହିଛି।
ଶେଖ ହାସିନା କ୍ଷମତାଚ୍ୟୁତ ହେବା ପରେ ଅନୁଷ୍ଠିତ ପ୍ରଥମ ସାଧାରଣ ନିର୍ବାଚନରେ ତାରିକ ରହମାନଙ୍କ ନେତୃତ୍ୱାଧୀନ BNP ମେଣ୍ଟ ୨୯୯ଟି ଆସନରୁ ୨୧୨ଟି ଆସନ ଜିତି ବୃହତ ବିଜୟ ହାସଲ କରିଛି। ତାରିକଙ୍କ ସହ ୨୫ ଜଣ କ୍ୟାବିନେଟ ମନ୍ତ୍ରୀ ଏବଂ ୨୪ ଜଣ ରାଷ୍ଟ୍ରମନ୍ତ୍ରୀ ମଧ୍ୟ ଶପଥ ନେଇଛନ୍ତି। ଏହି ମନ୍ତ୍ରିମଣ୍ଡଳରେ ଜଣେ ହିନ୍ଦୁ ଏବଂ ଜଣେ ବୌଦ୍ଧ ଏମପିଙ୍କୁ ସ୍ଥାନ ଦିଆଯାଇଛି।
ମହମ୍ମଦ ୟୁନୁସଙ୍କ ମଧ୍ୟବର୍ତ୍ତୀକାଳୀନ ପ୍ରଶାସନ ଦ୍ୱାରା ପ୍ରସ୍ତୁତ ‘ଜୁଲାଇ ଚାର୍ଟର’ ଅନୁଯାୟୀ ଦେଶରେ ବଡ଼ ଧରଣର ସାମ୍ବିଧାନିକ ସଂସ୍କାର ଆଣିବା ତାରିକେ ସରକାରଙ୍କ ପାଇଁ ଏକ ମୁଖ୍ୟ ଦାୟିତ୍ୱ। ନିକଟରେ ହୋଇଥିବା ଗଣଭୋଟରେ ଏହି ଚାର୍ଟରକୁ ଜନସାଧାରଣଙ୍କ ସମର୍ଥନ ମିଳିଛି, ଯାହା ଗଣତାନ୍ତ୍ରିକ ଅନୁଷ୍ଠାନଗୁଡ଼ିକରେ ପରିବର୍ତ୍ତନ ପାଇଁ ପଥ ପରିଷ୍କାର କରିଛି।
ତେବେ ଶପଥ ଗ୍ରହଣ ଉତ୍ସବକୁ ଜମାତ-ଇ-ଇସଲାମୀ ନେତୃତ୍ୱାଧୀନ ବିରୋଧୀ ଦଳ ବର୍ଜନ କରିଛନ୍ତି। ସାମ୍ବିଧାନିକ ସଂସ୍କାର କମିଶନରେ BNP ଏମପିମାନେ ଶପଥ ନ ନେବାକୁ ନେଇ ଏହି ବିବାଦ ସୃଷ୍ଟି ହୋଇଛି। ଯଦି ସଂସ୍କାର ପ୍ରକ୍ରିୟାରେ ବିଳମ୍ବ ହୁଏ, ତେବେ ପୁଣି ଥରେ ରାଜରାସ୍ତାରେ ଆନ୍ଦୋଳନ ହେବ ବୋଲି ବିରୋଧୀ ଚେତାବନୀ ଦେଇଛନ୍ତି।
ଭାରତ ସହ ସମ୍ପର୍କ ସୁଧାରିବା ତାରିକେଙ୍କ ପାଇଁ ଅନ୍ୟତମ ଗୁରୁତ୍ୱପୂର୍ଣ୍ଣ କାର୍ଯ୍ୟ। ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୂର୍ବରୁ ତାରିକଙ୍କୁ ଅଭିନନ୍ଦନ ଜଣାଇଥିବା ବେଳେ ଶପଥ ଗ୍ରହଣ ଉତ୍ସବରେ ଭାରତ ପକ୍ଷରୁ ଲୋକସଭା ବାଚସ୍ପତି ଓମ ବିର୍ଲା ଯୋଗ ଦେଇଛନ୍ତି। ଅନ୍ୟପଟେ, ଭାରତରେ ଆଶ୍ରୟ ନେଇଥିବା ଶେଖ ହାସିନାଙ୍କୁ ଫେରାଇ ଆଣିବା ପାଇଁ ବାଂଲାଦେଶରେ ଦାବି ଜୋର ଧରିପାରେ, ଯାହା ବୈଦେଶିକ ନୀତି ପାଇଁ ଏକ ପରୀକ୍ଷା ହେବ।
