ଭୁବନେଶ୍ୱର, ୫।୩ (ବ୍ୟୁରୋ): ଭୁବନେଶ୍ୱର ମହାନଗର ନିଗମ (ବିଏମ୍ସି)ରେ ନିର୍ବାଚନ ତାତି ଧୀରେ ଧୀରେ ସରଗରମ ହେବାରେ ଲାଗିଛି। ନାମାଙ୍କନ ପତ୍ର ଦାଖଲ ସମୟ ସରି ଆସୁଥିବାରୁ ବିଭିନ୍ନ ଦଳ ପ୍ରାର୍ଥୀଙ୍କ ନାମ ଘୋଷଣା କରିବାରେ ତତ୍ପରତା ପ୍ରକାଶ କରିଛନ୍ତି। ସେହିପରି ଟିକେଟ ପାଇବା ପୂର୍ବରୁ ମଧ୍ୟ ଅନେକ ପ୍ରାର୍ଥୀ ତରବରରେ ନାମାଙ୍କନ ଦାଖଲ କରୁଥିବା ଜଣାପଡିଛି। ଶୁକ୍ରବାର ତୃତୀୟ ଦିନରେ ବିଭିନ୍ନ ୱାର୍ଡର କର୍ପୋରେଟର ପଦବୀ ପାଇଁ ୧୬ଜଣ ପ୍ରାର୍ଥୀ ମନୋନୟନ ପତ୍ର ଦାଖଲ କରିଛନ୍ତି। ସେମାନଙ୍କ ମଧ୍ୟରେ ୫୨ ନଂ. ଓ୍ବାର୍ଡର ପୂର୍ବତନ କର୍ପୋରେଟର ଶ୍ରୀଧର ବେହେରା ରହିଛନ୍ତି। ଶ୍ରୀଧର ବିଜେଡିରୁ ୨୦୧୪ରୁ ୨୦୧୯ ପର୍ଯ୍ୟନ୍ତ ଉକ୍ତ ଓ୍ବାର୍ଡର କର୍ପୋରେଟର ଦାୟିତ୍ୱରେ ଥିଲେ। ଚଳିତଥର ମଧ୍ୟ ସେ ଦଳୀୟ ଟିକେଟ ଆଶାରେ ରହିଛନ୍ତି। ସେହିଭଳି ଓ୍ବାର୍ଡ ନଂ. ୨୩ ପାଇଁ ଆରତୀ ଭୂୟଁା, ୨୮ ନଂ. ପାଇଁ ପ୍ରିୟମ୍ବଦା ପୃଷ୍ଟି, ୩୨ ନଂ. ପାଇଁ ଜହୁର ଖାନ୍, ୩୩ ନଂ. ପାଇଁ ଧରିତ୍ରୀ ଜେନା, ୩୬ ନଂ. ପାଇଁ ମମତା ସେଠୀ, ୩୯ ନଂ. ପାଇଁ ଗୀତାଞ୍ଜଳି ସାହୁ, ୪୦ ନଂ. ପାଇଁ କୁଳସା ବିଶୋଇ, ଓ୍ବାର୍ଡ ନଂ. ୪୨ ପାଇଁ ରଶ୍ମୀ ରଞ୍ଜନ ମହାପାତ୍ର, ୪୫ ନଂ. ପାଇଁ ଜ୍ୟୋତିରେଖା ନାୟକ, ୪୬ ନଂ. ପାଇଁ ମମତା ମଲିକ, ୫୦ ନଂ. ପାଇଁ ରାମଚନ୍ଦ୍ର ରଣସିଂହ, ୫୪ ନଂ. ପାଇଁ ଶିବପ୍ରସାଦ ବେହେରା, ୬୧ ନଂ. ପାଇଁ ନରେନ ସାହୁ ଏବଂ ସୁଭାଷିନୀ ପୃଷ୍ଟି ଓ ୬୫ ନଂ. ଓ୍ବାର୍ଡ ପାଇଁ କାର୍ତ୍ତିକ ଚନ୍ଦ୍ର ସୁନ୍ଦରାୟ ପ୍ରାର୍ଥୀପତ୍ର ଦାଖଲ କରିଛନ୍ତି। ଗୁରୁବାର ୪ଜଣ ପ୍ରାର୍ଥୀ ନାମାଙ୍କନ ଦାଖଲ କରିଥିବାରୁ ତୃତୀୟ ଦିନ ସୁଦ୍ଧା ମୋଟ୍ ୨୦ଜଣ ପ୍ରାର୍ଥୀ କର୍ପୋରେଟର ପଦବୀ ପାଇଁ ନାମାଙ୍କନ ଦାଖଲ କରି ସାରିଲେଣି। ସେହିପରି କର୍ପୋରେଟର ପଦବୀ ପାଇଁ ଆଉ ୨୧୦ଟି ଫର୍ମ ବିକ୍ରି ହୋଇଛି। ଅପରପକ୍ଷେ ତୃତୀୟ ଦିନ ବିତିଯାଇଥିଲେ ବି କୌଣସି ଦଳ ପକ୍ଷରୁ ମେୟର ପଦବୀ ପାଇଁ ମନୋନୟନ ପତ୍ର ଦାଖଲ ହୋଇନାହିଁ। ତେବେ ତୃତୀୟ ଦିନରେ ୭ଟି ମେୟର ପଦବୀ ଫର୍ମ ବିକ୍ରି ହୋଇଥିବା ସୂଚନା ମିଳିଛି। ଏହାକୁ ମିଶାଇ କର୍ପୋରେଟର ପଦବୀ ପାଇଁ ମୋଟ୍ ୫୮୧ଟି ଫର୍ମ ବିକ୍ରି ହୋଇଥିବାବେଳେ ମେୟର ପଦବୀ ପାଇଁ ୧୫ଟି ଫର୍ମ ବିକ୍ରି ହୋଇଛି।
ଏପଟେ ମନୋନୟନ ପ୍ରକ୍ରିୟାକୁ ଅଧିକ ସୁବ୍ୟବସ୍ଥିତ କରିବା ପାଇଁ ଅତିରିକ୍ତ ଜିଲାପାଳ ତଥା ନିର୍ବାଚନ ଅଧିକାରୀ ପ୍ରଫୁଲ୍ଲ କୁମାର ସ୍ବାଇଁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅଧିକ କାଉଣ୍ଟର ଖୋଲା ଯାଇଥିଲା। ମନୋନୟନ ପତ୍ରଗୁଡିକ ପ୍ରାରମ୍ଭିକ ଯାଞ୍ଚ ପରେ ପ୍ରାର୍ଥୀମାନେ ନିର୍ଦ୍ଧାରିତ କାଉଣ୍ଟରରେ ସଂପୃକ୍ତ ସହକାରୀ ନିର୍ବାଚନ ଅଧିକାରୀଙ୍କ ନିକଟରେ ଦାଖଲ କରିଥିଲେ। ଟ୍ରାଫିକ ଓ ଜନ ଗହଳିକୁ ନିୟନ୍ତ୍ରଣ କରିବା ପାଇଁ ଅତିରିକ୍ତ ଜିଲାପାଳଙ୍କ କାର୍ଯ୍ୟାଳୟ ତଥା ସମ୍ମୁଖ ରାସ୍ତାରେ ବ୍ୟାପକ ପୋଲିସ ମୁତୟନ କରାଯାଇଥିଲା।
