ଧର୍ମଶାଳା,୧୦ା୪(ଶିବପ୍ରସାଦ ମହାନ୍ତି): ଯାଜପୁର ଜିଲା ଧର୍ମଶାଳା ବ୍ଲକ ଶାନ୍ତିବଜାରଠାରୁ କାଏମା ପର୍ଯ୍ୟନ୍ତ ଅଟକି ରହିଥିବା ପ୍ରଶସ୍ତିକରଣ କାର୍ଯ୍ୟ ଦୀର୍ଘ ୨୭ମାସ ପରେ ଆରମ୍ଭ ହୋଇଛି। ଏହାକୁ ଚାରି ଥାକିଆ ରାସ୍ତା କରାଯିବା ପାଇଁ ୨୦୨୩ ଡିସେମ୍ବର ମାସରେ ପାଣିକୋଇଲି ପୂର୍ତ୍ତ ବିଭାଗ ଅଧୀନରେ ୧୮କୋଟି ୪୨ଲକ୍ଷ ଟଙ୍କା ର ବ୍ୟୟ ଅଟକଳରେ ଶିଳାନ୍ୟାସ ହୋଇଥିଲା। ବହୁ ବାଦ ବିବାଦ ପରେ ପୁନର୍ବାର ଆରମ୍ଭ ହୋଇଛି ରାସ୍ତା ପ୍ରଶସ୍ତି କାର୍ଯ୍ୟ। ଧର୍ମଶାଳା ତହସିଲ ପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ ପାଇଁ ମାପଚୁପ ମଧ୍ୟ ଆରମ୍ଭ ହୋଇଛି। ପୂର୍ବରୁ ହୋଇ ଥିବା ମାପ ଚୁପ ସମୟରେ ଅନେକ ଘର ଓ ବ୍ୟବସାୟ ପ୍ରତିଷ୍ଠାନ ମାପଚୁପ ଭିତରେ ଆସିଥିଲା। ତେବେ ବର୍ତ୍ତମାନ ବଡ଼ବଡ଼ ଗଛ କଟା ଯାଉଥିବା ବେଳେ ଆଗକୁ ବିଲ୍ଡିଂଗୁଡ଼ିକ ଭଙ୍ଗା ଯାଇପାରେ ବୋଲି ଆଲୋଚନା ହେଉଛି। ରାସ୍ତା ପାର୍ଶ୍ୱରେ ଅନେକ ଘର ଓ ବ୍ୟବସାୟ ପ୍ରତିଷ୍ଠାନ ଥିବାରୁ ଏହାର ମଧ୍ୟ ଭାଗରେ ଥିବା ଫାଙ୍କା ରାସ୍ତାଗୁଡ଼ିକୁ ପ୍ରଥମେ ଚଉଡ଼ା କରାଯାଉଛି। ସେଥିପାଇଁ ନିକଟରେ ଥିବା ବିଲରୁ ମଧ୍ୟ ମାଟି ଖନନ କରାଯାଇ ଏହା ଉପରେ ବ୍ୟବହାର କରାଯାଉଛି। ସେହିପରି ରାସ୍ତା ପାର୍ଶ୍ୱରେ ଥିବା ବଡ଼ବଡ଼ ଗଛକୁ କଟାଯାଉଛି। ରାସ୍ତାକଡ଼ରେ ଥିବା ଘର ମାଲିକମାନଙ୍କ ଚିନ୍ତା ବଢ଼ିଛି। ତେବେ ପ୍ରଶାସନ ପକ୍ଷରୁ କିପରି ଏହି ରାସ୍ତା କାର୍ଯ୍ୟ ସମ୍ପୂର୍ଣ୍ଣ କରାଯାଉଛି ତାହା ଉପରେ ସମସ୍ତଙ୍କ ନଜର ରହିଛି।
