ଥୁଆମୂଳ ରାମପୁର,୩ା୭(ଦୁର୍ଗା କୀର୍ତ୍ତି);କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ସଦର ମହକୁମାସ୍ଥିତ କାଳୀ ମନ୍ଦିର ପଡ଼ାର ପଦୁକିଶୋର ପୂଝାରୀଙ୍କ ଘର ଉପରେ ମଙ୍ଗଳବାର ଏକ ଆମ୍ବଗଛର ବିରାଟକାୟ ଶୁଖିଲା ଡାଳ ଭାଙ୍ଗିପଡ଼ିଛି। ରାତି ସାଢ଼େ ୮ଟାରେ ନିଜ ପରିବାର ସହ ସେ ଭୋଜନ କରିବାକୁ ବସିଥିଲେ। ଏହି ସମୟରେ ଘର ପାଖରେ ଥିବା ଆମ୍ବଗଛର ଏକ ଶୁଖିଲା ଡାଳ ତାଙ୍କ ଘର ଉପରେ ପଡ଼ିଯାଇଥିଲା। ଫଳରେ ଘରର ଆଜ୍ବେଷ୍ଟସଗୁଡିକ ଭାଙ୍ଗିବା ସହିତ ଘରଭିତରେ ଥିବା ଅନେକ ଜିନିଷପତ୍ର ବ୍ୟାପକ କ୍ଷତି ହୋଇଛି। ଏଥିରେ ପଦୁକିଶୋରଙ୍କ ସହ ସ୍ତ୍ରୀ ରଞ୍ଜିତା ଓ ଝିଅ ସୃଷ୍ଟି ମଧ୍ୟ ଆହତ ହୋଇଛନ୍ତି। ସେମାନଙ୍କୁ ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ଚିକିତ୍ସା ପରେ ବୁଧବାର ସକାଳେ ଡାକ୍ତରଖାନାରୁ ନିଜ ଘରକୁ ଫେରିଛନ୍ତି। ଘରର କ୍ଷୟକ୍ଷତି ଅନୁସାରେ ପ୍ରଶାସନ ସହାୟତା ଦେବା ସହ ତୁରନ୍ତ କ୍ଷତିଗ୍ରସ୍ତ ପରିବାରକୁ ପଲିଥିନ ଯୋଗାଇବା ପାଇଁ ସାଧାରଣରେ ଦାବି ହେଉଛି। ଖବର ପାଇ ସ୍ଥାନୀୟ ରାଜସ୍ବ ନିରୀକ୍ଷକ ତୁଳସୀ ନିଆଲ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରି ଫେରିଥିବା ବେଳେ କ୍ଷୟକ୍ଷତିର ଆକଳନ ପରେ ସରକାରୀ ସହାୟତା ଯୋଗାଇ ଦିଆଯିବ ବୋଲି ନିଆଲ ସୂଚନା ଦେଇଛନ୍ତି। ତେବେ ଲଗାଣ ବର୍ଷା ଜାରି ରହିଥିବାରୁ ପରିବାର ଲୋକେ କାହା ଘରେ ମୁଣ୍ଡ ଗୁଞ୍ଜି ରହିବେ ତାହାକୁ ନେଇ ଚିନ୍ତାପ୍ରକଟ କରିଛନ୍ତି ପଦୁକିଶୋର। ସେଭଳି ସ୍ଥାନୀୟ ତାଲାବନ୍ଦ ପଡ଼ାର ଜଗତ୍ରାମ ଦୁର୍ଗାଙ୍କ ଘର ମଧ୍ୟ ଲଗାଣ ବର୍ଷରେ ଭୁଶୁଡ଼ି ପଡ଼ିଥିବାରୁ ସରକାରୀ ସହାୟତା ଯୋଗାଇଦେବାକୁ ସାଧାରଣରେ ଦାବି ହେଉଛି I
