ଓଟାଓ୍ବା: କାନାଡା ଦମ୍ପତି ସେବାଷ୍ଟିନ୍ ପେଲ୍ଲଟିଅର୍, ଇଡିଥ୍ ଲେମେ ନିଜର ୪ ସନ୍ତାନ ମିଆ, କୋଲିନ, ଲରେଣ୍ଟ ଓ ଲେଓଙ୍କୁ ଧରି ୬ ମାସିଆ ବିଶ୍ୱ ଭ୍ରମଣରେ ବାହାରିଛନ୍ତି। ପେଲ୍ଲଟିଅର୍ଙ୍କ ୩ ସନ୍ତାନ ରେଟିନିଟିଜ୍ ପିଗ୍ମେଣ୍ଡୋସା ନାମକ ଏକ ବିରଳ ରୋଗରେ ଆକ୍ରାନ୍ତ। ଏହି ରୋଗ କାରଣରୁ ସେମାନେ ଆଗାମୀ ଦିନରେ ନିଜ ଦୃଷ୍ଟିଶକ୍ତି ହରାଇ ଦେବେ ।
ଏହି ରୋଗ କାରଣରୁ ଆଖିରେ ଥିବା ରେଟିନା ଟିସୁ ସବୁ କ୍ଷୟ ହୋଇଯାଇଥାଏ, ଯାହା ଫଳରେ ରୋଗୀ ଧୀରେ ଧୀରେ ନିଜ ଦୃଷ୍ଟିଶକ୍ତି ହରାଇ ଦୃଷ୍ଟିହୀନ ହୋଇଯାଏ। ବର୍ତ୍ତମାନ ସୁଦ୍ଧା ଚିକିତ୍ସା ବିଜ୍ଞାନରେ ଏହି ରୋଗକୁ ଭଲ କରିବା ପାଇଁ କୌଣସି ଚିକିତ୍ସା କିମ୍ବା ଔଷଧ ବାହାରି ନାହିଁ। ୪୦ରୁ ୬୦ ବର୍ଷ ବୟସ ବେଳକୁ ୩ ପିଲା ସମ୍ପୂର୍ଣ୍ଣ ଭାବେ ଅନ୍ଧ ହୋଇଯିବେ ବୋଲି ପେଲ୍ଲଟିଅର କହିଛନ୍ତି।
ଡାକ୍ତରଙ୍କ ପରାମର୍ଶ ଅନୁସାରେ, ଏହି ପିଲାମାନଙ୍କ ମଧ୍ୟରେ ଯେତେ ଭିଜୁଆଲ ମେମୋରି ତିଆରି କରାଯିବ, ତାହା ସେମାନଙ୍କ ପାଇଁ ଭଲ ହେବ। ଘରେ ରହି ମଧ୍ୟ ବହୁ କ୍ୱାଲିଟି ଟାଇମ୍ ତିଆରି କରାଯାଇପାରିବ କିନ୍ତୁ ଭ୍ରମଣ ସବୁଠାରୁ ଉତ୍କୃଷ୍ଟ। କାରଣ ଏହାଦ୍ୱାରା ସେମାନେ ବିଭିନ୍ନ ପ୍ରକାର ଲୋକଙ୍କୁ ଦେଖିବା ସହ ସେମାନଙ୍କ ପରମ୍ପରା ବିଷୟରେ ମଧ୍ୟ ଜାଣିବାର ସୁଯୋଗ ପାଇବେ। ଚଳିତବର୍ଷ ମାର୍ଚ୍ଚରୁ କାନାଡୀୟ ଦମ୍ପତି ୪ ପିଲାଙ୍କୁ ଧରି ନାମିବ୍ୟାରୁ ସେମାନଙ୍କ ବିଶ୍ୱ ଭ୍ରମଣ ଆରମ୍ଭ କରିଛନ୍ତି। ଏହାପରେ ସେମାନେ ମଙ୍ଗୋଲିଆରୁ ଇଣ୍ଡୋନେସିଆ ଯାଇଛନ୍ତି। ଓ୍ବାଲର୍ଡ ଟୁର୍ ନେଇ ପିଲାମାନେ ଏକ ସୂଚୀ ତିଆରି କରିଛନ୍ତି, ଯେଉଁଥିରେ ସେମାନେ ଘୋଡ଼ା ସବାର ହେବାଠାରୁ ଆରମ୍ଭ କରି କେଉଁଠାରେ ଫଳରସ ପିଇବେ ତାହା ଲେଖିଛନ୍ତି। ପରିବାର ସହ ବିଶ୍ୱ ଭ୍ରମଣକୁ ଉପଭୋଗ କରୁଥିବା ପେଲ୍ଲଟିଅର କହିଛନ୍ତି।
