ବେତନଟୀ,୩୦ା୯(ସ୍ବ,ପ୍ର.):ବାର୍ହା ଶିକାର ପାଇଁ ବସାଯାଇଥିବା ଫାଶରେ ଛନ୍ଦିହୋଇ ଏକ ଦନ୍ତା ହାତୀ ଆହତ ହୋଇଛି। ଦନ୍ତାର ବାମପଟ ଆଗ ଗୋଡ଼ରେ ଫାଶ(ଲୁହା ତାର) ଚିପିହୋଇ ରହିଯାଇଥିବାରୁ ସେ କ୍ରମଶଃ ଅସୁସ୍ଥ ହୋଇପଡ଼ୁଥିବା ଓ ସ୍ବାଭାବିକ ଭାବେ ଚଳପ୍ରଚଳ କରିପାରୁନାହିଁ। ବନ ବିଭାଗ ଟିମ୍ ଏହା ଉପରେ ନଜର ରଖିଛି। ମୟୂରଭଞ୍ଜ ଜିଲା ବେତନଟୀ ରେଞ୍ଜ ଅଧୀନ ଡୁମାପଦା ସଂରକ୍ଷିତ ଜଙ୍ଗଲ ଅଞ୍ଚଳରେ ଏହି ଘଟଣା ଘଟିଛି।
ସୂଚନା ଅନୁଯାୟୀ, ଡୁମାପଦା ସଂରକ୍ଷିତ ଜଙ୍ଗଲ ଅଞ୍ଚଳରେ ଏକ ଗୋଠଛଡ଼ା ଦନ୍ତା କିଛି ଦିନ ହେଲା ବିଚରଣ କରୁଥିଲା। ତେବେ ତାର ବାମପଟ ଆଗ ଗୋଡ଼ରେ ଏକ ଲୁହାତାର ଚିପିହୋଇ ରହିଯାଇଥିବା ଦେଖିବାକୁ ମିଳିଥିଲା। ଗୁରୁବାର ବାରିପଦା ବନଖଣ୍ଡ କାର୍ଯ୍ୟାଳୟରୁ ସହକାରୀ ବନସଂରକ୍ଷକ ରବିନାରାୟଣ ମହାନ୍ତି, ରେଞ୍ଜର ଘନଶ୍ୟାମ ସିଂ ପ୍ରମୁଖ ଘଟଣାସ୍ଥଳକୁ ଯାଇ ସ୍ଥିତି ଅନୁଧ୍ୟାନ କରିବା ସହିତ ହାତୀର ଗତିବିଧି ଯାଞ୍ଚ କରିଥିଲେ। ତେବେ ଦନ୍ତା ଜଙ୍ଗଲ ଭିତରକୁ ପଳାଇବାରୁ ଗୁରୁବାର ତା’ର ଗୋଡ଼ରେ ହୋଇଥିବା କ୍ଷତ ବିଷୟରେ ଅଧିକ କିଛି ଜଣା ପଡ଼ି ନ ଥିଲା। ତେବେ ଆବଶ୍ୟକ ପଡ଼ିଲେ ବିଶେଷଜ୍ଞ ଟିମ୍ ଏବଂ ପ୍ରାଣୀ ଚିକିତ୍ସକଙ୍କ ସହାୟତା ନିଆଯିବ ବୋଲି ରେଞ୍ଜର ସିଂ କହିଛନ୍ତି।
