ଖୋର୍ଦ୍ଧା ଅଫିସ,୫।୭: ଖୋର୍ଦ୍ଧା ବନାଞ୍ଚଳ ଅନ୍ତର୍ଗତ ଗୋଡ଼ା ଜଙ୍ଗଲରେ ଏକ ଦନ୍ତା ହାତୀ ଅସୁସ୍ଥ ହୋଇ ଘୂରି ବୁଲିଥିଲା। ଶନିବାର ରାତିରେ ହାତୀକୁ ଠାବ କରାଯାଇ ଟ୍ରାଙ୍କୁଲାଇଜ କରି ବନ ବିଭାଗ ଚିକିତ୍ସା କରିଛି। କ୍ଷତାକ୍ତ ପାଦର ଅପରେଶନ ପରେ ହାତୀ ଏବେ ସୁସ୍ଥ ଥିବା ଜଣାପଡ଼ିଛି। ସପ୍ତାହ ପରେ ସେ ସମ୍ପୂର୍ଣ୍ଣ ସୁସ୍ଥ ହୋଇଯିବ ବୋଲି ଓୟୁଏଟି ପ୍ରାଣୀଧନ ବିଭାଗ ପକ୍ଷରୁ ସୂଚନା ମିଳିଛି।
ସୂଚନା ମୁତାବକ, ଗୋଡ଼ା ଜଙ୍ଗଲରେ ଏକ ହାତୀର ପାଦରେ ଆଘାତ ଲାଗିବାରୁ ସେ ଚାଲିବାରେ କଷ୍ଟ ଅନୁଭବ କରୁଥିଲା। ଦୀର୍ଘଦିନ ଧରି ଜଙ୍ଗଲ ଚାରିପଟେ ବୁଲୁଥିଲା। ହାତୀଟି ଅସୁସ୍ଥ ଅବସ୍ଥାରେ ବୁଲୁଥିବା ସ୍ଥାନୀୟ ଗ୍ରାମବାସୀ ଦେଖିବାକୁ ପାଇଥିଲେ। ଏନେଇ ଗ୍ରାମବାସୀ ଖୋର୍ଦ୍ଧା ବନ ବିଭାଗକୁ ଜଣାଇଥିଲେ। ଏହା ପରେ ବନ ବିଭାଗ ପକ୍ଷରୁ ତପତ୍ରତା ପ୍ରକାଶ ପାଇଥିଲା। ଖୋର୍ଦ୍ଧା ବନଖଣ୍ଡ ଡିଏଫ୍ଓ ପୁନିଆ ପାଣ୍ଡାୟନଙ୍କ ନେତୃତ୍ୱରେ ଏସିଏଫ୍ ଗୋବିନ୍ଦ ବିଶ୍ୱାଳ, ଖୋର୍ଦ୍ଧା ବନ ଅଧିକାରୀ ଅସିତ ମିଶ୍ରଙ୍କ ସମେତ ଏକ ଟିମ୍ ଜଙ୍ଗଲରେ ହାତୀର ଗତିବିଧି ଉପରେ ନଜର ରଖିଥିଲେ। ହାତୀକୁ କାବୁ କରିବା ଲାଗି ଚନ୍ଦକା ଅଭୟାରଣ୍ୟର ମାହୁନ୍ତ ରାଜେନ୍ଦ୍ର ବେହେରା ଏବଂ ଟ୍ରାଙ୍କୁଲାଇଜର ଟିମ୍ ସାମିଲ ହୋଇଥିଲେ। ହାତୀକୁ ଠାବ କରିବା ଲାଗି ବନ ବିଭାଗ ନାକେଦମ ହୋଇପଡିଥିଲା। ଗ୍ରାମବାସୀଙ୍କ ସହଯୋଗରେ ୧୫ଦିନର ଅକ୍ଳାନ୍ତ ପରିଶ୍ରମ ପରେ ଶନିବାର ରାତିରେ ଗୋଡା ଜଙ୍ଗଲ ନିକଟରୁ ହାତୀକୁ ଠାବ କରାଯାଇଥିଲା। ଟ୍ରାଙ୍କୁଲାଇଜ କରି ତା’ର ଚିକିତ୍ସା କରାଯାଇଥିଲା। ଓୟୁଏଟି ପ୍ରାଣୀଧନ ପ୍ରଫେସର ଇନ୍ଦ୍ରମଣି ନାଥଙ୍କ ନେତୃତ୍ୱରେ ଏକ ଟିମ୍ ଏହି ଚିକିତ୍ସା କରିଥିଲେ। ଏ ସମ୍ପର୍କରେ ପ୍ରଫେସର ନାଥ କହିଛନ୍ତି, ହାତୀର ପାଦରେ ଗଭୀର କ୍ଷତ ସୃଷ୍ଟି ହୋଇଥିଲା। ଚିକିତ୍ସା ସଫଳ ହୋଇଛି। ସପ୍ତାହେ ପାଇଁ ହାତୀକୁ ପର୍ଯ୍ୟବେକ୍ଷଣରେ ରଖିବା ଲାଗି ପରାମର୍ଶ ଦିଆଯାଇଛି। ହାତୀର ସ୍ବାଭାବିକ ସ୍ଥିତିକୁ ଫେରିବାରେ ସମୟ ଲାଗିବ। ଅନ୍ୟପଟେ ଏନେଇ ପରିବେଶବିତ୍ ଧନେଶ୍ୱର ବିଧାର କୁହନ୍ତି, ଏହି ବନାଞ୍ଚଳ ଅନ୍ତର୍ଗତ ଜଙ୍ଗଲରେ ହାତୀ ଓ ମଣିଷ ମଧ୍ୟରେ ଦୀର୍ଘ ଦିନ ଧରି ଲଢେଇ ଜାରି ରହିଛି। ତେବେ ହାତୀର ଚିକିତ୍ସା କରାଯାଇଛି। ମାନବିକତା ଆଗରେ ସବୁ କିଛି ଫିକା ବୋଲି ଏହାକୁ ଗ୍ରାମବାସୀ ଦର୍ଶାଇଛନ୍ତି।
