ନୂଆଦିଲ୍ଲୀ:ଟାଟା ଗ୍ରୁପ୍ କମ୍ପାନୀ ପରିଚାଳନା କରୁଥିବା ଟାଟାସନ୍ସ ଅଂଶୀଦାର ରହିଥିବା ସାପୁରଜୀ ପାଲୋନଜୀ ଗ୍ରୁପ୍ ସମ୍ପର୍କ ଛିନ୍ନ ହେବା ସ୍ଥିତିକୁ ଆସିଛି। ପାଲୋନଜୀ ଗ୍ରୁପ୍ ଟାଟାସନ୍ସରେ ରହିଥିବା ଏହାର କିଛି ଅଂଶଧନକୁ ବନ୍ଧକ ରଖି ପୁଞ୍ଜି ଉଠାଣ କରିବାକୁ ଚାହୁଁଥିଲା। ଏହାକୁ ଟାଟା ସନ୍ସ ବୋର୍ଡ ବାରଣ କରିବା ପରେ ମାମଲା ସୁପ୍ରିମକୋର୍ଟରେ ପହଞ୍ଚିଥିଲା। ସୁପ୍ରିମକୋର୍ଟ ମଧ୍ୟ ପାଲୋନଜୀ ଗ୍ରୁପ୍ର ଏହି କାର୍ଯ୍ୟକୁ ବାରଣ କରିଛନ୍ତି। ଏଭଳି ସ୍ଥିତିରେ ଦୁଇ ଗ୍ରୁପ ମଧ୍ୟରେ ବିବାଦ ଆହୁରି ତୀବ୍ରତର ହୋଇଛି। ପାଲୋନଜୀ ଗ୍ରୁପ୍ ମଙ୍ଗଳବାର ସୁପ୍ରିମକୋର୍ଟଙ୍କୁ କହିଛି ଯେ, ଟାଟାସନ୍ସର ହାତ ଛାଡିବାକୁ ଗ୍ରୁପ୍ ଚାହୁଁଛି। ଏକ ଉଚିତ ସମାଧାନ ପାଇଲେ ଏହା ଟାଟା ଗ୍ରୁପ୍ ହାତ ଛାଡିଦେବ। ଏଭଳି ଦେଲେ ଦୀର୍ଘ ୭୦ ବର୍ଷ ଧରି ଦୁଇ ଗ୍ରୁପ ମଧ୍ୟରେ ରହିଥିବା ସମ୍ପର୍କ ଛିନ୍ନ ହୋଇଯିବ ବୋଲି ଚର୍ଚ୍ଚା ଜୋର ଧରିଛି।
ବର୍ତ୍ତମାନ ଟାଟା ସନ୍ସରେ ପାଲୋନଜୀ ଗ୍ରୁପ୍ର ୧୮.୫% ଅଂଶଧନ ରହିଛି। ଗ୍ରୁପ୍ କହିଛି ଯେ, ଟାଟା ଗ୍ରୁପ୍ରୁ ବାହାରିବା ଏବେ ଜରୁରୀ ହୋଇ ପଡିଛି। ଏଭଳି ଆଇନଗତ ମାମଲା ଯୋଗୁ କମ୍ପାନୀ ଉପରେ ଖରାପ ପ୍ରଭାବ ପଡିଛି। ଏହି ୨ ଗ୍ରୁପ ମଧ୍ୟରେ ଦୀର୍ଘଦିନର ସମ୍ପର୍କ ରହିଛି। ବିଶ୍ୱାସ ଏବଂ ବନ୍ଧୁତ୍ୱ ସହ ସବୁ କାମ ଆଜି ଯାଏ ଚାଲି ଆସିଛି। ଦୁଇ ଗ୍ରୁପ୍ର ସମ୍ପର୍କ ଛିନ୍ନ ହୋଇଗଲେ ଏହା ସବୁ ଅଂଶୀଦାରଙ୍କ ପାଇଁ ମଧ୍ୟ ଭଲ ହେବ। ପାଲୋନଜୀ ଗ୍ରୁପ୍ର ଅଂଶଧନ କିଣିବା ଲାଗି ସୁପ୍ରିମକୋର୍ଟଙ୍କୁ ଟାଟା ଗ୍ରୁପ କହିବା ପରେ ଦୁଇ ଗ୍ରୁପ୍ର ବିଚ୍ଛିନ୍ନ ହେବା ଖବର ସାମ୍ନାକୁ ଆସିଛି। ଅକ୍ଟୋବର ୨୮ରେ ମାମଲାର ପରବର୍ତ୍ତୀ ଶୁଣାଣି ହେବ। ଟାଟାସନ୍ସରେ ସଂଖ୍ୟାଲଘୁ ଅଂଶଧନ ହାସଲକାରୀଙ୍କ ମଧ୍ୟରେ ସାଇରସ ମିସ୍ତ୍ରିଙ୍କ ପରିବାର ସବୁଠାରୁ ଆଗରେ ରହିଛି।
୨୦୧୬ରେ ଗଭର୍ନାନ୍ସ ପ୍ରସଙ୍ଗରେ ସାପୁରଜୀ ପୋଲୋନଜୀ ଗ୍ରୁପ୍କୁ ପ୍ରତିନିଧିତ୍ୱ କରୁଥିବା ସାଇରସ ମିସ୍ତ୍ରି ଏବଂ ଟାଟା ଗ୍ରୁପ ମଧ୍ୟରେ ମତଭେଦ ଉପୁଜିଥିଲା। ସେହିଠାରୁ ହିଁ ଟାଟା ପରିବାର ଏବଂ ମିସ୍ତ୍ରି ପରିବାର ମଧ୍ୟରେ ବିବାଦର ସୂତ୍ରପାତ ହୋଇଥିଲା। ଗଭର୍ନାନ୍ସ ପ୍ରସଙ୍ଗରେ ମିସ୍ତ୍ରିଙ୍କୁ ଟାଟା ସନ୍ସ ଅଧ୍ୟକ୍ଷ ପଦବୀରୁ ହଟାଇ ଦିଆଯାଇଥିଲା। ଏହା ପରେ ପରେ ଦୁଇ ଗ୍ରୁପ ମଧ୍ୟରେ କଳି ସାମ୍ନାକୁ ଆସିଥିଲା। ସାଇରସ ମିସ୍ତ୍ରିଙ୍କୁ ହଟାଇବା ପରଠାରୁ ବିବାଦ ଥମୁନାହିଁ। ସାପୁରଜୀ ପାଲୋନଜୀ ଗ୍ରୁପ୍ କରୋନା ପାଇଁ ବ୍ୟବସାୟ କ୍ଷତି ସହିବାରୁ ଅଂଶଧନ ବିକି ଅର୍ଥ ଯୋଗାଡ କରିବାକୁ ଚାହୁଁଥିଲା। ଏହା ଟାଟା ଗ୍ରୁପ ଯୋଗୁ ବାଧାପ୍ରାପ୍ତ ହୋଇଥିବା ଗ୍ରୁପ୍ ନିକଟରେ କହିଥିଲା। ଏଭଳି କାର୍ଯ୍ୟରୁ ବିରତ ରହିବା ଲାଗି ସାପୁରଜୀ ପୋଲୋଜୀ ଗ୍ରୁପ୍କୁ ସୁପ୍ରିମକୋର୍ଟ କହିବା ପରେ ସମସ୍ତଙ୍କ ନଜର ଏବେ ଆଗାମୀ ଘଟଣା ଉପରେ ରହିଛି।
