ଆରଡ଼ି,୧୪ା୪(ଡି.ଏନ୍.ଏ.): ଆଜି ମହାବିଷୁବ ସଂକ୍ରାନ୍ତି। ଏହି ଉପଲକ୍ଷେ ଭଦ୍ରକ ଜିଲାର ଶୈବପୀଠ ଆରଡ଼ି ଉତ୍ସବ ମୁଖର ହୋଇଉଠିଛି। ବାବା ଆଖଣ୍ଡଳମଣି ମନ୍ଦିରରେ ଏଥିଲାଗି ସ୍ବତନ୍ତ୍ର ପୂଜାର୍ଚ୍ଚନା କରାଯାଇଛି। ଶୁକ୍ରବାର ଭୋର୍ ୪.୩୦ରେ ମନ୍ଦିର ପହଡ଼ ଖୋଲାଯାଇ ପ୍ରଭୁଙ୍କ ପାଖରେ ମଙ୍ଗଳ ଆଳତି କରାଯାଇଥିଲା । ପରେ ପ୍ରଭୁଙ୍କର ଶୀତଳ ଉପଚାର ନୀତି ଆରମ୍ଭ କରାଯାଇଥିଲା । ପ୍ରଭୁଙ୍କ ମସ୍ତକ ଉପରିଭାଗରେ ଏକ ବିରାଟକାୟ ଛିଦ୍ରଯୁକ୍ତ ପିତ୍ତଳ ହଣ୍ଡା ବନ୍ଧା ଯାଇଥିଲା। ସେଥିରେ ଭରାଯାଇଥିବା ସୁଗନ୍ଧିତ ଜଳରାଶି ପଡ଼ିବାର ବ୍ୟବସ୍ଥା ସେବାୟତଙ୍କ ଦ୍ବାରା କରାଯାଇଥିଲା । ପରେ ପାରମ୍ପରିକ ନିୟମାନୁସାରେ ବାରପଡ଼ା ଅଞ୍ଚଳର ଗୋପାଳମାନେ ଲମ୍ବା ଧାଡ଼ିରେ ଆସି ବାବାଙ୍କ ପାଖରେ ଜଳଲାଗି କରିଥିଲେ। ବାବାମଣିଙ୍କ ଶୀତଳ ଉପଚାର ପୂଜା ଓ ଗୋପାଳଙ୍କ ଜଳଲାଗି ବୈଶାଖ ମାସ ସାରା ଚାଲିବ ବୋଲି ମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
