ଭୁବନେଶ୍ୱର,୮।୩(ଶର୍ମିଷ୍ଠା ପାଣିଗ୍ରାହୀ): ଜାଗର ଯାତ୍ରା ପାଇଁ ଚଳଚଞ୍ଚଳ ରାଜଧାନୀର ସମସ୍ତ ଶୈବପୀଠ। ଶିବଙ୍କ ମନ୍ତ୍ରଧ୍ୱନିରେ ଶୁକ୍ରବାର ଏକାମ୍ରକ୍ଷେତ୍ର କମ୍ପି ଉଠିବ। ପ୍ରଭୁ ଶ୍ରୀଲିଙ୍ଗରାଜଙ୍କଠୁ ନେଇ କପିଳେଶ୍ୱର, ମେଘେଶ୍ୱର, ମୁକ୍ତେଶ୍ୱର, କେଦାରଗୌରୀ, ବ୍ରହ୍ମେଶ୍ୱର, ଭାସ୍କରେଶ୍ୱର ଭଳି ଅନେକ ଶୈବପୀଠରେ ଶିବଙ୍କ ଆରାଧାନରେ ମଗ୍ନ ହେବେ ଭକ୍ତ। ପ୍ରଭୁ ଶିବଙ୍କ ପ୍ରତି ଥିବା ଅଖଣ୍ଡ ବିଶ୍ୱାସକୁ ଉପବାସ, ଭକ୍ତି, ଆରାଧନାର ସହ ଭକ୍ତମାନେ ପାଳନ କରିବେ। ମହାମୃତ୍ୟୁଞ୍ଜୟ ମନ୍ତ୍ର ସହ ଶିବଙ୍କ ମନ୍ତ୍ର ଓ ଭଜନରେ ଗୁଣୁଗୁଣୁ ହେବେ । ଏଥର ପ୍ରାୟ ସବୁଠି ରାତି ୯ଟାରୁ ନେଇ ୧୦ଟା ୩୦ ମଧ୍ୟରେ ମହାଦୀପ ଉଠିବ। ସମସ୍ତ ମନ୍ଦିରରେ ପ୍ରସାଦ ସେବନର ବ୍ୟବସ୍ଥା ସହ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଛି।
ଭାସ୍କରେଶ୍ୱର ମନ୍ଦିର: ୧୦ଟା ୧୫ରେ ଉଠିବ ମହାଦୀପ
ଭାସ୍କରେଶ୍ୱର ମନ୍ଦିରରେ ୧୦ଟା ୧୫ରେ ମହାଦୀପ ଉଠିବ। ଭୋର ୩ଟା ୩୦ରେ ମଙ୍ଗଳ ଆଳତି, ସକାଳ ୭ଟାରେ କର୍ପୁର ଆଳତି ଏବଂ ଅପରାହ୍ନ ୧ଟା ୩୦ରେ ରୁଦ୍ରାଭିଷେକ କରାଯିବ। ସା ୬ଟା ୩୦ରେ ଭଜନ ସମାରୋହ ହେବ। ରାତି ୧୦ଟା ୩୦ରେ ପ୍ରସାଦ ସେବନର ବ୍ୟବସ୍ଥା ରହିଛି।
ବ୍ରହ୍ମେଶ୍ୱରରେ ୧୦ ହଜାର ଶ୍ରଦ୍ଧାଳୁଙ୍କ ପାଇଁ ପ୍ରସାଦ ସେବନ ବ୍ୟବସ୍ଥା
ଭୋର ୪ଟା ସୁଦ୍ଧା ବେଶ ନୀତି ସମ୍ପନ୍ନ ହେବ। ଭୋର ୪ରୁ ୬ଟା ପର୍ଯ୍ୟନ୍ତ ସାହାଣମେଲା ଦର୍ଶନ ନିମନ୍ତେ ଅନୁମତି ଦିଆଯିବ। ସେହିପରି ଅପରାହ୍ନ ୩ଟାରୁ ସାଢେ ୫ଟା ପର୍ଯ୍ୟନ୍ତ ସାହାଣମେଲା ଦର୍ଶନ ଶ୍ରଦ୍ଧାଳୁଙ୍କ ନିମନ୍ତେ ଉପଲବ୍ଧ ହେବ। ସକାଳ ୬ଟାରୁ ୯ଟା ପର୍ଯ୍ୟନ୍ତ ବେଦ ପାଠ କରାଯିବ। ସାରେ ଭଜନ କାର୍ଯ୍ୟକ୍ରମ ରହିଛି। ଏଥିରେ ମୁମ୍ବାଇର ଅନନ୍ତ ଭରଦ୍ବାଜଙ୍କ ସହିତ ଶୈଳଭାମା, ଆଦର୍ଶ, ଉର୍ମି, ତୃପ୍ତି ନାୟକ, ସତ୍ୟବ୍ରତ ମଲ୍ଲିକ ପ୍ରମୁଖ ବହୁ କଣ୍ଠଶିଳ୍ପୀ ଭଜନ ପରିବେଷଣ କରିବେ। ୧୦ଟା ୩୦ରେ ମହାଦୀପ ଉଠିବ। ପ୍ରାୟ ୧୦ ହଜାର ଶ୍ରଦ୍ଧାଳୁଙ୍କ ପ୍ରସାଦ ସେବନର ବ୍ୟବସ୍ଥା ହୋଇଛି।
କପିଳେଶ୍ୱରରେ ୯ଟା ୫୬, ଭୀମେଶ୍ୱରରେ ୧୦ଟା ୩୦ରେ ଉଠିବ ମହାଦୀପ
କପିଳେଶ୍ୱର ମନ୍ଦିରରେ ୯ଟା ୫୬ରେ ମହାଦୀପ ଉଠିବ। ସମସ୍ତ ରୀତିନୀତି ଅନୁସାରେ ପୂଜାର୍ଚ୍ଚନା ସରି ପରେ ପ୍ରସାଦ ସେବନର ବ୍ୟବସ୍ଥା ରହିଛି। ସେହିପରି ଭୀମେଶ୍ୱର ମନ୍ଦିରରେ ରାତି ୧୦ଟା ୩୦ରେ ମହାଦୀପ ଉଠିବ। ପ୍ରାତଃ ୫ଘଟିକାରୁ ମଧ୍ୟାହ୍ନ ୧୨ଟା ଏବଂ ଅପରାହ୍ନ ୨ଟାରୁ ସା ୬ଟା ୩୦ ପର୍ଯ୍ୟନ୍ତ ଭକ୍ତଙ୍କ ଦର୍ଶନ ପାଇଁ ସମସ୍ତ ସୁବିଧା କରାଯାଇଛି। ମହାଦୀପ ଉଠିବା ପରେ ପ୍ରସାଦ ସେବନ ବ୍ୟବସ୍ଥା କରାଯାଇଛି।
