ବରଗଡ଼,୨୦।୪(ପ୍ରେମାନନ୍ଦ ଖମାରୀ): ସୋମବାର କୃଷିଭିତ୍ତିକ ପର୍ବ ଅକ୍ଷୟ ତୃତୀୟା। ଚାଷୀମାନେ ଚାଷ ପାଇଁ ପାଗ ଭିଡ଼ିବେ। କେବଳ ସେତିକି ନୁହେଁ, ରାଜ୍ୟର ବିଭିନ୍ନ ସ୍ଥାନରେ ଜିଲାପାଳଙ୍କଠୁ ଜନ ପ୍ରତନିଧିମାନେ ମଧ୍ୟ କ୍ଷେତକୁ ଆସି ହଳ, ନଙ୍ଗଳ ଧରି ଅଖିମୁଠି ଅନୁକୁଳ କରିବେ। କିନ୍ତୁ ଏଭଳି ଶୁଭବେଳାରେ ସରକାରଙ୍କ ତ୍ରୁଟିପୂର୍ଣ୍ଣ ଧାନକିଣା ନୀତି ଯୋଗୁ ଆଜି ମଧ୍ୟ ବରଗଡ଼ ଜିଲାର ଅନେକ ଚାଷୀ ଅସନ୍ତୁଷ୍ଟ ଅଛନ୍ତି। ଭଲ ଅମଳ ପାଇଁ ନେତା, ମନ୍ତ୍ରୀ ଅଖି ମୁଠି ଅନୁକୁଳ କରୁଛନ୍ତି ସତ, କିନ୍ତୁ ଚାଷୀଙ୍କ ଅମଳ ଶସ୍ୟ ବିକ୍ରି ପାଇଁ ସରକାରୀ କଳରେ ଅବହେଳା କରାଯାଉଛି। ଏହି ଦୃଷ୍ଟିରୁ ଚାଷୀଙ୍କୁ ବହୁ ହଟହଟା ହେବାକୁ ପଡୁଛି। ବରଗଡ଼ ଜିଲାରେ ଏଭଳି ସ୍ଥିତି ଉପୁଜିଛି। ବିଭାଗୀୟ ଅବହେଳା ଯୋଗୁ ଜିଲାର ଅନେକ ଚାଷୀ ଏପର୍ଯ୍ୟନ୍ତ ଗତ ଖରିଫରେ ଅମଳ ଧାନ ବିକ୍ରି କରି ପାରି ନାହାନ୍ତି। ପ୍ରଶାସନିକ ଅଧିକାରୀ, ଜନ ପ୍ରତିନିଧିଙ୍କୁ ଜଣାଇ ନୟାନ୍ତ ହେବା ପରେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଗତମାସ ୯ତାରିଖରୁ ଅହର୍ନିଶ ଧାରଣାରେ ବସିଛନ୍ତି। ତଥାପି ଜିଲା ପ୍ରଶାସନ, ଜନ ପ୍ରତିନିଧି ନିର୍ବିକାର ରହିଛନ୍ତି। ଫଳରେ ଅସନ୍ତୋଷ ମଧ୍ୟରେ ଏଥର ବରଗଡ଼ ଜିଲାର ଚାଷୀ ଅଖି ମୁଠି ଅନୁକୁଳ କରିବେ।
ଠକିଦେଲେ ଯୋଗାଣ ମନ୍ତ୍ରୀ
ଖାଦ୍ୟ ଯୋଗଣ ଓ ଖାଉଟୀ କଲ୍ୟାଣ ମନ୍ତ୍ରୀ ଚାଷୀଙ୍କ ସମସ୍ତ ବିକ୍ରିଯୋଗ୍ୟ ଧାନ କିଣାଯିବ ବୋଲି କହିଥିଲେ। ଧାନ ସଂଗ୍ରହ ପ୍ରକିୟାକୁ ଚଳିତ ମାସ ୭ତାରିଖ ପର୍ଯ୍ୟନ୍ତ ବୃଦ୍ଧି ମଧ୍ୟ କରିଥିଲେ। ହେଲେ ବରଗଡ଼ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାନବିକ୍ରି ଦାବିରେ ଚାଷୀଙ୍କ ଧାରଣା ୭ ସପ୍ତାହ ବିତିଯିବ। ମାତ୍ର ସମ୍ପୃକ୍ତ ଚାଷୀଙ୍କ ବସ୍ତାଟିଏ ମଧ୍ୟ ଧାନ ବିକ୍ରି ହେଲା ନାହିଁ। ଅନ୍ୟପଟେ ସମସ୍ତ ଚାଷୀଙ୍କ ବିକ୍ରିଯୋଗ୍ୟ ଧାନ କିଣାଯାଇଛି ବୋଲି ଯୋଗାଣ ମନ୍ତ୍ରୀ କହିବା ଦୁର୍ଭାଗ୍ୟଜନକ।
– ପୂର୍ଣ୍ଣଚନ୍ଦ୍ର ସାହୁ, ତୋରା
ଧାର କରଜରେ ପରିବାର ଚଳୁଛି
ଏପର୍ଯ୍ୟନ୍ତ ଗତବର୍ଷ ଖରିଫରେ ଅମଳ ଧାନ ବିକ୍ରି କରି ପାରି ନାହୁଁ। ଖରିଫ ଚାଷ ପାଇଁ ଧାର, କରଜ କରି ଚାଷ କରିଥିଲୁ। ତାହା ତ ପରିଶୋଧ କରି ପାରି ନାହୁଁ। ପୁଣି ଧାର, କରଜରେ ରବି ଫସଲ କରିଛୁ। ଏପରିକି ଧାର, ଉଧାରରେ ପରିବାର ଗୁଜୁରାଣ ମେଣ୍ଟାଉଛୁ। ଧାନବିକ୍ରି ପଞ୍ଜୀକରଣ ପାଇଁ ଆମେ ଆବଶ୍ୟକ କାଗଜାତ ସ୍ଥାନୀୟ ପ୍ରାଥମିକ କୃଷି ସମବାୟ ସମିତିରେ ଦେଇଥିଲୁ। ପଞ୍ଜୀକରଣରେ ବିଭାଗୀୟ କର୍ମଚାରୀଙ୍କ ଅବହେଳା କଲେ। ଆମେ ଏବେ ଦୁର୍ଦ୍ଦଶା ଭୋଗୁଛୁ।
– କେତନ ଚିରଗୁଣ, ସହରାଟିକ୍ରା
ଉଧାରରେ ପୁଅଙ୍କ ଚିକିତ୍ସା
ଗତବର୍ଷ ଖରିଫରେ ଭଲ ଧାନ ଅମଳ ହୋଇଥିଲା। ବିକ୍ରି ପାଇଁ ୧୭୦ ପ୍ୟାକେଟ୍ ଧାନ ସହରାଟିକ୍ରା ମଣ୍ଡିରେ ପକାଇଛି। ହେଲେ ଏପର୍ଯ୍ୟନ୍ତ ଟୋକନ ଆସି ନଥିବାରୁ ତାହା ବିକ୍ରି ହୋଇ ପାରି ନାହିଁ। ଧାନବିକ୍ରି ଦାବି ନେଇ ଜିଲାପାଳଙ୍କ କାର୍ଯ୍ୟାଳୟ ଆଗରେ ଚାଲିଥିବା ଧାରଣାରେ ସାମିଲ ହୋଇଛି। ତଥାପି କିଛି ସୁଫଳ ମିଳି ନାହିଁ। ଅନ୍ୟପଟେ ପୁଅ ବିସ୍ମାୟନଙ୍କୁ ଆଖି ଅସ୍ତ୍ରୋପଚାର ହେବାକୁ ଜରୁରୀ ପଡ଼ିଲା। ଲକ୍ଷେ ଟଙ୍କା ଉଧାର କରି ପୁଅର ଚିକିତ୍ସା କରିଛି।
– ମହେନ୍ଦ୍ର ପ୍ରଧାନ, ପିପିଲିପାଲି
ଅକ୍ଷୟତୃତୀୟା ଉତ୍ସାହ ଫିକା
କୃଷକଙ୍କ ଆଦିପର୍ବ ଅକ୍ଷୟ ତୃତୀୟ ବହୁ ପୁରାତନ ପରମ୍ପରା। ଏହାକୁ ଅତି ଉତ୍ସାହର ସହିତ ଚାଷୀମାନେ ମାଟିପୂଜା, ବଳଦ ପୂଜ ସହିତ ପ୍ରଥମ ବିହନ ବୁଣି ନୂତନ ଚାଷ ଆରମ୍ଭ କରିଥାନ୍ତି। ହେଲେ ବରଗଡ଼ ଜିଲାର ବହୁତ ଚାଷୀ ପଞ୍ଜୀକରଣରୁ ବାଦ୍ ପଡ଼ି ଧାନ ବିକ୍ରି କରି ପାରି ନାହାନ୍ତି। ଏହାକୁ ନେଇ ଚାଷୀମାନେ ଜିଲାପାଳଙ୍କ କାର୍ଯ୍ୟାଳୟରେ ଖରାତାତି, ଝଡ଼ବର୍ଷା ସତ୍ତ୍ୱେ ଧାରଣା ଦେଇଛନ୍ତି। ଫଳରେ ଅଖିମୁଠି ଅନୁକୁଳରେ ମଧ୍ୟ ଚାଷୀଙ୍କ ଉତ୍ସାହ ନାହିଁ।
– ରମେଶ ମହାପାତ୍ର, ଚାଷୀନେତା
