ବାହାନଗା, ୨୯ା୮(ଡି.ଏନ.ଏ.)-ବାଲେଶ୍ୱର ଜିଲା ବାହାନଗା ବ୍ଲକ ଖରାସାହାପୁର ପଞ୍ଚାୟତର ଏକ ଅଚଳ ସ୍ଲୁଇସ୍ ଗେଟ୍ ଚାଷୀଙ୍କ ପାଇଁ କାଳ ସାଜିଛି। ଫଳରେ ହଜାର ହଜାର ହେକ୍ଟର ଚାଷ ଜମିରେ ଏବେ ବନ୍ୟାଜଳ ପ୍ରବାହିତ ହେଉଛି। ଗତ ତିନିଦିନ ଧରି ଲଘୁଚାପଜନିତ ବର୍ଷା ହେବା ଫଳରେ ଉପରମୁଣ୍ଡରୁ ବନ୍ୟାଜଳ ପ୍ରବାହିତ ହୋଇ କାଂଶବାଂଶ ନଦୀରେ ପ୍ରବେଶ କରି ସମୁଦ୍ରରେ ମିଶିଥାଏ। ମାତ୍ର ଏହି ବନ୍ୟାଜଳ ନଦୀରୁ ଯାଇ ସମୁଦ୍ରରେ ପ୍ରବେଶ କରିବା ପରିବର୍ତ୍ତେ ଚାଷ ଜମିରେ ପଶୁଛି। ଏହିଭଳି ପ୍ରତିବର୍ଷ ହେଉଥିଲେ ମଧ୍ୟ ପ୍ରଶାସନ ସେଥିପ୍ରତି କୌଣସି ସ୍ଥାୟୀ ପଦକ୍ଷେପ ନ ନେବା ପରିତାପର ବିଷୟ। ତେବେ ଜାମୁକା ମୁହାଣ ଓ ନାଳ ଖନନ ପାଇଁ ରାଜ୍ୟ ସରକାର କୋଟି କୋଟି ଟଙ୍କା ବ୍ୟୟବରାଦ କରିଥିଲେ ମଧ୍ୟ ଚାଷୀକୁଳର କୌଣସି ଦୁଃଖ ଦୂର ହେଉନାହିଁ।
ମୁହାଣ ନିକଟସ୍ଥ ବାଉଁଶଆଡିଆସ୍ଥିତ ବାରମାଣିଆଠାରେ ଥିବା ସ୍ଲୁଇସ୍ ଗେଟ୍ ଅକାମୀ ହେବାରୁ ସମୁଦ୍ରକୁ ବନ୍ୟାପାଣି ପ୍ରବେଶ କରିପାରୁନାହିଁ। ତେବେ ପ୍ରଶାସନ ଚାଷୀଙ୍କ ହିତ ପାଇଁ ସେହି ଅଚଳ ସ୍ଲୁଇସ୍ ଗେଟ୍ ସମ୍ପୂର୍ଣ୍ଣ ଭାଙ୍ଗି ଉଠାଇଦେଲେ ଏହି କୃତ୍ରିମ ବନ୍ୟାଦାଉରୁ ଚାଷୀମାନେ ରକ୍ଷା ପାଇବେ। ଏହି ଗେଟ୍ କେବଳ ଚିଙ୍ଗୁଡି ମାଫିଆଙ୍କ ହିତ ପାଇଁ ରହିଥିବା ଚାଷୀମାନେ ପ୍ରକାଶ କରିଛନ୍ତି। ଏହି ବନ୍ୟାପାଣି ବାଲିକ୍ତିରଣ, ଛତୁବାଟି, ପାଟିମୁଣ୍ଡା, ବାଂଶରପୁର, ଖରାସାହାପୁର, ଅଠିଲାବାଜ, ରାମତାଳିଆଡି ଓ ବାଉଁଶଆଡିଆ ଆଦି ଅଞ୍ଚଳର ହଜାର ହଜାର ହେକ୍ଟର ଚାଷ ଜମି ଉପରେ ପ୍ରବାହିତ ହୋଇରହିଛି। ଫଳରେ ବିଲରେ ଥିବା ଧାନଗଛ ସବୁ ପାଣିରେ ବୁୁଡି ପଚି ନଷ୍ଟ ହେବାକୁ ବସିଲାଣି। ଖରାସାହାପୁର ପଞ୍ଚାୟତର ଶଙ୍କରପଦା ନାଳଠାରେ ଡ୍ରେନେଜ ବିଭାଗ ଦ୍ୱାରା କରାଯାଇଥିବା ଅନ୍ୟ ଏକ ସ୍ଲୁଇସ୍ ଗେଟ୍ ଥିଲେ ମଧ୍ୟ ବନ୍ୟାପାଣିକୁ ସେ ଅଟକାଇବାରେ ସକ୍ଷମ ହେଉନାହିଁ। ତେବେ ବନ୍ୟାପାଣି ଉପରମୁଣ୍ଡରୁ ଏତେ ମାତ୍ରାରେ ଆସୁଛି ସେହି ଗେଟ୍ ଚାରିପାଖ ଦେଇ ପ୍ରବାହିତ ହୋଇ ଶଙ୍କରପଦା ଗ୍ରାମବାସୀଙ୍କ ପାଇଁ ବିପଦ ସୃଷ୍ଟି କରୁଛି।
