ତରବୋଡ,୭।୧: ନୂଆପଡ଼ା ଜିଲା କୋମନା ବନାଞ୍ଚଳ ଅଧୀନ ଭରୁଆମୁଣ୍ଡା ଗ୍ରାମରେ ବାଘ ଆତଙ୍କ ଦେଖାଦେଇଛି। ପ୍ରତିଦିନ ଗାଁରେ ଘୂରି ବୁଲୁଛି ବାଘ । ଗାଁର ଗାଈ, ବଳଦ, ଛେଳି, ମେଣ୍ଢା ସବୁ ଖାଇ ଦେଉଛି। ଭୟରେ ଲୋକେ ଦିନରାତି ତାଟି କବାଟ ବନ୍ଦ କରି ଠେଙ୍ଗା ବାଡି ଧରି ଜଗି ରହୁଛନ୍ତି। ପିଲାଙ୍କୁ ଘରୁ ବାହାରକୁ ଛାଡୁନାହାନ୍ତି । ବାହାରକୁ ଗଲେ ଦଳଦଳ ହୋଇ ଯାଉଥିବା ଗ୍ରାମବାସୀ କହିଛନ୍ତି।
ସୂଚନା ଯୋଗ୍ୟ, କୋମନା ବନାଞ୍ଚଳଠାରୁ ୫ କି.ମି. ଦୂର ଭରୁଆମୁଣ୍ଡା ଗ୍ରାମ। ଗତ ରବିବାର ଗ୍ରାମର ନବୀନ ମାଝି ଛେଳି, ମେଣ୍ଢା ଚରାଇବା ପାଇଁ ଚାନ୍ଦେଳ ପାହାଡ ଉପରକୁ ଯାଇଥିଲେ। ପୂର୍ବାହ୍ନ ୧୧ଟାରେ ହଠାତ୍ ଏକ ବାଘ ଆସି ଛେଳି, ମେଣ୍ଢା ଉପରେ ଝାମ୍ପ ମାରିଥିଲା। ଭୟଭୀତ ହୋଇ ନବୀନ ଗାଁକୁ ଆସି ଘଟଣା ସଂକ୍ରାନ୍ତରେ ଗ୍ରାମବାସୀଙ୍କୁ ଜଣାଇଥିଲେ। ଗ୍ରାମବାସୀ ଠେଙ୍ଗା, ବାଡି, ଟାଙ୍ଗିଆ, ଧନୁତୀର ଧରି ଚାନ୍ଦେଳ ପାହାଡ ଉପରକୁ ଯାଇଥିଲେ। ସେତିକିବେଳେ ବାଘଟି ଗୋଟିଏ ଛେଳି ଓ ମେଣ୍ଢାକୁ ମାରି ଦେଇଥିବା ଦେଖିବାକୁ ପାଇଥିଲେ। ଏପରି କି ଅନ୍ୟ ଏକ ମେଣ୍ଡାକୁ ଖାଇ ଅଧା ଛାଡି ଦେଇଥିବା ଦେଖିବାକୁ ପାଇଥିଲେ। ସେହିପରି ବୁଧବାର ରାତିରେ ବାଘଟି ଗାଁ ଭିତରକୁ ଚାଳିଆସି ବନବାସ ମାଝିଙ୍କ ଗୁହାଳରେ ଥିବା ବଳଦକୁ ଆକ୍ରମଣ କରିଥିଲା । ବଳଦ ବାଘ ସହ ଲଢ଼େଇ କରି ଗୁହାଳରୁ ଜୀବନ ବିକଳରେ ବାହାରକୁ ଚାଲି ଆସିଥିଲା। ହେଲେ ବାଘ ଆକ୍ରମଣରେ ବଳଦର ଶରୀରରେ କ୍ଷତ ଚିହ୍ନ ସୃଷ୍ଟି ହୋଇଛି । ଅନ୍ୟପକ୍ଷେ ବାଘଟି ମଙ୍ଗଳବାର ଡୋଳାମଣି ମାଝିଙ୍କ ଗୋଟିଏ ବଳଦକୁ ନେଇ ଖାଇ ଦେଇଥିବା ଅଭିଯୋଗ ହୋଇଛି। ବନ ବିଭାଗ ପକ୍ଷରୁ ତୁରନ୍ତ ବାଘକୁ ଧରି ଅନ୍ୟ ସ୍ଥାନକୁ ନେଲେ ଭଲ ହୁଅନ୍ତା ବୋଲି ଗ୍ରାମବାସୀ କହିଛନ୍ତି। ଉଲ୍ଲେଖନୀୟ ଯେ, ୨୦୧୮ରେ ନୂଆପଡା ହଳଦି ଗ୍ରାମରେ ଏକ ବାଘ ମା’ କୋଳରୁ ଛୁଆକୁ ନେଇ ଯାଇଥିଲା । ବନ ବିଭାଗ ବହୁ କଷ୍ଟରେ ବାଘକୁ ଧରି ନନ୍ଦନକାନନରେ ଛାଡିଥିଲେ। ଏ ସଂକ୍ରାନ୍ତରେ କୋମନା ବନାଞ୍ଚଳ ରେଞ୍ଜର ଜଗଦିଶ ଦୁରିଆଙ୍କୁ ପଚାରିବାରୁ ପ୍ରକୃତରେ ବାଘ ଛେଳି, ମେଣ୍ଢା, ଗାଈ, ବଳଦକୁ ଖାଇଛି । ତାହାର କ୍ଷତି ପୂରଣ ଦିଆଯିବ ଓ ଗାଁର ସୁରକ୍ଷା ପାଇଁ କର୍ମଚାରୀମାନେ ଜଗି ରହିଛନ୍ତି ବୋଲି ପ୍ରକାଶ କରିଥିଲେ।
