ଲୋଇସିଂହା,୧୪।୧(ଡି.ଏନ.ଏ): ବଲାଙ୍ଗୀର ଜିଲା ଲୋଇସିଂହା ବ୍ଲକ ଯୋଗୀସର୍ଡା ସମବାୟ ମସିତି(ପାକ୍ସ)ରେ ସାଢେ ୩ ହଜାର କୁଇଣ୍ଟାଲ ଧାନ ବିକ୍ରି ପାଇଁ ପଡି ରହିଛି । ପାକ୍ସରେ ଜାଗା ଅଭାବରୁ ୩ କିମି ଦୂର ଭାଲିଆମୁଣ୍ଡା ସାପ୍ତାହିକ ବଜାରରେ ଗତ ୩ ଦିନ ହେଲା ଚାଷୀଙ୍କ ଧାନ ଗଚ୍ଛିତ ରଖି ଧାନକିଣା ଯାଉଛି। ଖୋଲା ସ୍ଥାନରେ ହଜାର ହଜାର ବସ୍ତା ଧାନ ପଡି ରହିଛି। ଉପଜିଲାପାଳଙ୍କ ନିର୍ଦ୍ଦେଶରେ ସେଠାକୁ ମଣ୍ଡି ସ୍ଥାନାନ୍ତରିତ କରାଯାଇଥିବା କୁହାଯାଉଛି । ଅପରପକ୍ଷେ ଟାର୍ଗେଟ ପାଇଥିବା ବିକାଶ ରାଇସ ମିଲର୍ସର ଅସହଯୋଗରୁ ମଣ୍ଡିରୁ ଧିମା ଧାନ ଉଠାଣ କାରଣରୁ ମଣ୍ଡିରେ ଏପରି ଅଚଳାବସ୍ଥା ସୃଷ୍ଟି ହୋଇଛି। ଟୋକନ କଟିବା ଏବଂ ଧାନ ଚୋରି ଭୟ ଚାଷୀଙ୍କୁ ଘାରିଛି । ଯୋଗୀସର୍ଡା,ବାଦିବାହାଲ ଓ ବୁଢୀପଦର ପଞ୍ଚାୟତର କେତେକ ଗ୍ରାମକୁ ନେଇ ଯୋଗୀସର୍ଡା ପ୍ରାଥମିକ କୃଷି ସମବାୟ ସମିତି ଗଠିତ। ୨୦୨୨-୨୩ ବର୍ଷରେ ପାକ୍ସରେ ଚାଷୀଙ୍କ ଧାନବିକ୍ରି ପାଇଁ ୮୬୫ ଜଣ ଚାଷୀ ପଞ୍ଜୀକୃତ ହୋଇଛନ୍ତି। ସେଥିମଧ୍ୟରୁ ଅଦ୍ୟାବଧି ୫୪୯ ଜଣ ଚାଷୀଙ୍କ ୨୧ ହଜାର ୮୪୯ କୁଇଣ୍ଟାଲ ଧାନ କ୍ରୟ ହୋଇଛି । ପାକ୍ସରୁ ଧାନ କିଣିବା ପାଇଁ ତୁଷୁରାର ବିକାଶ, ଶ୍ରୀଗଣେଶ ଓ ନାରାୟଣୀ ମିଲର୍ସ ଟାର୍ଗେଟ ପାଇଥିଲେ। ହେଲେ ଜିଲାପାଳ ନାରାୟଣୀକୁ ଧାନକ୍ରୟରୁ ବାତିଲ କରି ଲୋକନାଥ ମିଲର୍ସକୁ ଦାୟିତ୍ୱ ଦେଇଥିଲେ । ଲୋକନାଥ ମିଲର୍ସ ଟାର୍ଗେଟ ପାଇଥିବା ୫ ହଜାର ୫୧୦ କୁଇଣ୍ଟାଲରୁ ୧ ଶହ କୁଇଣ୍ଟାଲ କ୍ରୟ କରିବାକୁ ବାକି ରହିଛି। ସେହିପରି ଶ୍ରୀଗଣେଶ ୧ହଜାର ୪୦ କୁଇଣ୍ଟାଇ ୫୯ କେଜି କ୍ରୟ ବାକି ରହିଛି। ଅପରପକ୍ଷେ ବିକାଶ ମିଲର୍ସ ସର୍ବାଧିକ ୧୬ ହଜାର ୧୨୫ କୁଇଣ୍ଟାଲ ୭୪ କେଜି ଟାର୍ଗେଟ ପାଇଛି । ସେଥରୁ ୧୦ ହଜାର ୯୪୯ କୁଇଣ୍ଟାଲ ୬୮ କେଜି ଏବେ ସୁଦ୍ଧା କ୍ରୟ କରିଛି । ଏବେ ବି ୫ ହଜାର ୪୭୪ କୁଇଣ୍ଟାଲ ୦୬ କେଜି କ୍ରୟ ବାକି ରହିଛି। ବିକାଶ ମିଲର୍ସର ଅସହଯୋଗ ତଥା ଠିକ ଭାବରେ ଗାଡି ପଠାଉ ନ ଥିବାରୁ ମଣ୍ଡିରୁ ଧାନ ଉଠାଣରେ ବାଧା ସୃଷ୍ଟି ହୋଇଛି। ମଣ୍ଡିରେ କଟନୀ ଛଟନୀ ଏକ ପ୍ରମୁଖ ସମସ୍ୟା ହୋଇଛି। ସମିତି ପରିସରରେ ତାର ଜାଲି ସହ ସିସି କ୍ୟାମେରା ଲାଗିଛି। ଏହାସତ୍ତ୍ୱେ ସମିତି ପରିସରରୁ ଚାଷୀଙ୍କ ଧାନ ଚୋରି ଅଭିଯୋଗ ହୋଇଥିଲା। ଏବେ ପାକ୍ସ ଠାରୁ ୩ କିମି ଦୂର ଖୋଲା ସ୍ଥାନରେ ହଜାର ହଜାର ବସ୍ତା ଧାନ ପଡି ରହିବା ଚାଷୀଙ୍କୁ ଦ୍ୱନ୍ଦ୍ୱରେ ପକାଇ ଦେଇଛି। ସୂଚନାଯୋଗ୍ୟ ଯେ, ପାକ୍ସରେ ଧାନକିଣାରେ ଅନିୟମିତା ଅଭିଯୋଗ ହୋଇଛି। ଏପରି କି ଜମି ଜାଲିଆତି କରି ଧାନ କିଣିବା ଘଟଣାରେ ପାକ୍ସରେ ଡିଇଓଙ୍କୁ ସମବାୟ ବିଭାଗ ବରଖାସ୍ତ କରିବା ଏବଂ ପାକ୍ସ ଅଧୀନ ଭାଲିଆମୁଣ୍ଡା ଗ୍ରାମର ଏକ ଗୋଦାମରୁ ଯୋଗାଣ ବିଭାଗ ବେଆଇନ ଭାବେ ଗଚ୍ଛିତ ୩୪୯ ବସ୍ତା ଧାନ ଜବତ କରିଥିଲା। ଚଳିତ ବର୍ଷ ଧାନକିଣାରେ ଉକ୍ତ ପାକ୍ସ ବିବାଦୀୟ ହୋଇପଡିଛି।
