ମସ୍କୋ, ୧୨।୨ : ୟୁକ୍ରେନ ଉପରେ ଆକ୍ରମଣ ପାଇଁ ରୁଷିଆର ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି ବୋଲି ଆମେରିକା ପକ୍ଷରୁ କୁହାଯାଇଛି। ୟୁକ୍ରେନ୍ ଉପରେ ବୁଧବାର ଆକ୍ରମଣ ପାଇଁ ରୁଷିଆର ଯୋଜନା କରିଥିବା ଆମେରିକା ଅଧିକାରୀ ଦାବି କରିଛନ୍ତି। ଫେବୃୟାରୀ ୨୦ ଶୀତକାଳୀନ ଅଲିମ୍ପିକ୍ସ୍ ପରେ ରୁଷିଆ ଆକ୍ରମଣର ଯୋଜନା କରିଥିବାର ପୂର୍ବରୁ କୁହାଯାଉଥିଲା।
ନାଟୋ ରୁଷିଆର ସର୍ତ୍ତରେ ରାଜି ନହେଲେ ଆକ୍ରମଣ କରାଯିବ। ୟୁକ୍ରେନ୍ ଆକ୍ରମଣ ପାଇଁ ରୁଷିଆ ୭୨ ଘଣ୍ଟାର ସମୟ ଧାର୍ଯ୍ୟ କରିଛି। ଏହି ସମୟ ମଧ୍ୟରେ ୟୁକ୍ରେନ୍କୁ ମସ୍କୋ ନିୟନ୍ତ୍ରଣରେ ଅଣାଯିବାର ପ୍ରୟାସ କରାଯିବ ବୋଲି ଆମେରିକା ଗୁପ୍ତଚର ସଂସ୍ଥାଗୁଡ଼ିକ ପକ୍ଷରୁ ଦାବି କରାଯାଇଛି। ସମ୍ଭାବ୍ୟ ଯୁଦ୍ଧକୁ ଦୃଷ୍ଟିରେ ରଖି ଆମେରିକା ଏହାର ନାଗରିକଙ୍କୁ ୟୁକ୍ରେନ୍ ଛାଡ଼ିବାକୁ ନିର୍ଦ୍ଦେଶ ଜାରି କରିଛି। ଆସନ୍ତା ୪୮ ଘଣ୍ଟା ମଧ୍ୟରେ ଆମେରିକୀୟ ନାଗରିକଙ୍କୁ ୟୁକ୍ରେନ୍ରୁ ବାହାରି ଆସିବାକୁ କୁହାଯାଇଛି।
ୟୁକ୍ରେନ ଉପରେ ଆକ୍ରମଣ ହେବାର ସମ୍ଭାବନାକୁ ଦୃଷ୍ଟିରେ ରଖି ନାଟୋ ମଧ୍ୟ ସତର୍କ ଏବଂ ପ୍ରସ୍ତୁତ ରହିଛି। ପୂର୍ବ ୟୁରୋପର ବହୁ ଦେଶରେ ନାଟୋ ଆଧୁନିକ ଅସ୍ତ୍ରଶସ୍ତ୍ର ଏବଂ ସୈନ୍ୟ ନିୟୋଜିତ କରିଛି। ଆମେରିକାର ନୌସେନା ଏବଂ ଏହାର ସହଯୋଗୀ ମଧ୍ୟ ଏହି କ୍ଷେତ୍ରର ପରିସ୍ଥିତି ଉପରେ ତୀକ୍ଷ୍ଣ ନଜର ରଖି ପାଟ୍ରୋଲିଂ ଅପରେଶନ ଚଳାଇଛନ୍ତି।
ଗୋଟିଏ ପଟେ ରୁଷିଆ ୟୁକ୍ରେନ ଉପରେ ଆକ୍ରମଣ କରିବା ପାଇଁ ନିଜର ସୈନ୍ୟମାନଙ୍କୁ ନିୟୋଜିତ କରୁଥିବାବେଳେ ଆମେରିକା ୟୁକ୍ରେନକୁ ସାହାଯ୍ୟ କରିବା ଏବଂ ରୁଷିଆକୁ କଡ଼ା ଜବାବ ଦେବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ରହିିଛି।ରୁଷିଆର ନୌସେନା ଏହାର ୬ଟି ଯୁଦ୍ଧପୋତ କୃଷ୍ଣ ସାଗରରେ ପହଞ୍ଚାଇଛି। ଯୁଦ୍ଧପୋତଗୁଡ଼ିକ କ୍ରିମିୟା ନିକଟବର୍ତ୍ତୀ ହୋଇଛନ୍ତି।
ରୁଷିଆର ପ୍ରତିରକ୍ଷା ମନ୍ତ୍ରଣାଳୟ ପୂର୍ବରୁ କହିଥିଲା ଯେ ଏହି ଯୁଦ୍ଧ ପୋତଗୁଡ଼ିକ ଭୂମଧ୍ୟ ସାଗର ଅଞ୍ଚଳରେ ନିୟୋଜିତ ହେବ। ମାତ୍ର ଏବେ ୟୁକ୍ରେନ ସଙ୍କଟ ନେଇ ପ୍ରତି ମୁହୂର୍ତ୍ତରେ ବିଭିନ୍ନ ପ୍ରକାରର ପରିସ୍ଥିତି ଦେଖାଯାଉଛି। ତେଣୁ ରାଷ୍ଟ୍ରପତି ବ୍ଲାଡିମୀର ପୁଟିନ ନିଜର ଯୁଦ୍ଧ ଜାହାଜକୁ ୟୁକ୍ରେନର ଅତି ନିକଟବର୍ତ୍ତୀ କୃଷ୍ଣ ସାଗରକୁ ପଠାଇଛନ୍ତି। ଯାହାଫଳରେ ଆମେରିକା ଏବଂ ନାଟୋ ସୈନ୍ୟମାନଙ୍କୁ ସମ୍ଭାବ୍ୟ ଯୁଦ୍ଧ ପରିସ୍ଥିତିରେ ଏକ ଉପଯୁକ୍ତ ଉତ୍ତର ଦିଆଯାଇପାରିବ।
