ମୁମ୍ବାଇ,୨୬।୧୨ : ସୀମା ବିବାଦକୁ ନେଇ ମହାରାଷ୍ଟ୍ର ଏବଂ କର୍ନାଟକ ମଧ୍ୟରେ ବିବାଦ ଏପର୍ଯ୍ୟନ୍ତ ଶେଷ ହୋଇ ନଥିଲା ବେଳେ ବର୍ତ୍ତମାନ ଏହି ପ୍ରସଙ୍ଗରେ ସରକାରରେ ବିଭାଜନ ହେବାର ଖବର ଆସିବା ଆରମ୍ଭ କରିଛି। ସର୍ବଶେଷ ମାମଲା କର୍ନାଟକରେ ପଡୁଥିବା ଅଞ୍ଚଳ ସମ୍ପର୍କରେ ମହାରାଷ୍ଟ୍ର ବିଧାନସଭାରେ ଏକ ପ୍ରସ୍ତାବ ଆଣିବା ସହ ଜଡିତ।
କୁହାଯାଉଛି ଯେ ଏହି ପ୍ରସ୍ତାବକୁ ନେଇ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଏବଂ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ସର୍ବସମ୍ମତ ନୁହଁନ୍ତି। ଏହି ପ୍ରସ୍ତାବ ଉପରେ ଉଭୟ ନେତାଙ୍କ ଭିନ୍ନ ମତ ରହିଛି। ଏଭଳି ପରିସ୍ଥିତିରେ ସରକାରଙ୍କ ଦୁଇ ବରିଷ୍ଠ ନେତାଙ୍କ ମଧ୍ୟରେ ବଢୁଥିବା ଦୂରତା ଯୋଗୁ ଶାସକ ମେଣ୍ଟରେ ସଙ୍କଟ ସୃଷ୍ଟି କରିପାରେ ବୋଲି ଅନୁମାନ କରାଯାଉଛି।
ଶିନ୍ଦେଙ୍କ ମନ୍ତ୍ରୀ ଶମ୍ଭୁରାଜ ଦେଶାଇ ଗତ ସପ୍ତାହରେ କର୍ନାଟକ ସହ ସୀମା ବିବାଦ ସମ୍ପର୍କରେ ସୋମବାର ବିଧାନସଭାରେ ଏକ ପ୍ରସ୍ତାବ ଆଣିବେ ବୋଲି କହିଥିଲେ। ତେବେ ରାଜ୍ୟରେ ଭାଜପା ନେତୃତ୍ୱର ଏଭଳି ପ୍ରସ୍ତାବ ସମ୍ପର୍କରେ କୌଣସି ଆଲୋଚନା ହୋଇନାହିଁ। କୁହାଯାଉଛି ଯେ କର୍ନାଟକରେ ଏହାର ନେତୃତ୍ୱାଧୀନ ସରକାର ବିରୋଧରେ ଭାଜପା ଏହି ପ୍ରସଙ୍ଗ ଉଠାଇବାକୁ ଚାହୁଁନାହିଁ। ବିଶେଷକରି ଏପରି ଏକ ସମୟରେ ଯେତେବେଳେ ଆସନ୍ତା ବର୍ଷ କର୍ନାଟକରେ ନିର୍ବାଚନ ମଧ୍ୟ ହେବାକୁ ଯାଉଛି।
ଖବର ଅନୁଯାୟୀ, ଶିନ୍ଦେଙ୍କ ମନ୍ତ୍ରୀଙ୍କ ଘୋଷଣା ସତ୍ତ୍ୱେ କର୍ନାଟକ ସୀମା ବିବାଦକୁ ନେଇ ସୋମବାର ସରକାରଙ୍କ ପକ୍ଷରୁ କୌଣସି ପ୍ରସ୍ତାବ ଆଣିବାକୁ ଆଲୋଚନା ହୋଇନାହିଁ। ବାଲାସାହେବଚି ଶିବସେନା ନେତାଙ୍କ ଅନୁଯାୟୀ ବିଧାନସଭାରେ ଏହି ପ୍ରସ୍ତାବ ସମ୍ପର୍କରେ କୌଣସି ବିଜ୍ଞପ୍ତି ଜାରି କରାଯାଇ ନାହିଁ। ବାସ୍ତବରେ ସୀମା ବିବାଦକୁ ନେଇ କର୍ନାଟକ ଦେଇଥିବା ନିଷ୍ପତ୍ତିକୁ ବିରୋଧ କରିବାକ ଭାଜପା ନେତାମାନେ ସମର୍ଥନ କରୁନାହାଁନ୍ତି। ସେମାନେ ବିଶ୍ୱାସ କରନ୍ତି ଯେ ଏପରି କରିବା ଦ୍ୱାରା ଆସନ୍ତା ବର୍ଷ କର୍ନାଟକରେ ହେବାକୁ ଥିବା ବିଧାନସଭା ନିର୍ବାଚନରେ ଦଳ ସମସ୍ୟାର ସମ୍ମୁଖୀନ ହେବ। ତେବେ ଏହି ପ୍ରସ୍ତାବ ଉପରେ ଆଲୋଚନା ଜାରି ରହିଛି ଏବଂ ଶୀତ ଅଧିବେଶନ ଶେଷରେ ଏହାକୁ ବିଧାନସଭାରେ ଅଣାଯାଇପାରିବ।
ଉଦ୍ଧବ ଠାକରେଙ୍କ ନେତୃତ୍ୱରେ ମହାରାଷ୍ଟ୍ରରେ ବିରୋଧୀମାନେ ଶାସକ ଦଳଖୁ ଘେରୁଥିବାରୁ ମୁଖ୍ୟମନ୍ତ୍ରୀ ଏହି ପ୍ରସ୍ତାବ ଆଣିବା ସପକ୍ଷରେ ଅଛନ୍ତି। କର୍ନାଟକ ମୁଖ୍ୟମନ୍ତ୍ରୀଙ୍କ ତୁଳନାରେ ସୀମା ବିବାଦରେ ଶିନ୍ଦେ ଅତ୍ୟଧିକ ଦୁର୍ବଳ ବୋଲି ଅନେକ ବିରୋଧୀଦଳ ନେତା ଅଭିଯୋଗ କରିଛନ୍ତି। କେବଳ ଏତିକି ନୁହେଁ, ବିରୋଧୀ ମଧ୍ୟ ଅନେକ ଥର ସରକାରରେ ଶିନ୍ଦେ ଏବଂ ଫଡନାଭିସଙ୍କୁ ଶକ୍ତି ତୁଳନା କରିବାକୁ ଚେଷ୍ଟା କରିଛନ୍ତି।
