ପ୍ରାୟତଃ ଲୋକମାନେ ନିଜ ଘରେ ଖାଲି ପାଦରେ ଚାଲନ୍ତି। ବାହାରକୁ ଯିବା ପାଇଁ ଚପଲଠାରୁ ଜୋତା ପର୍ଯ୍ୟନ୍ତ ସବୁକିଛି ପିନ୍ଧିବାକୁ ପସନ୍ଦ କରନ୍ତି। କହିବାକୁ ଗଲେ ବିନା ଚପଲରେ ମଣିଷ ଘରୁ ଗୋଡ଼ କାଢ଼େନି। ମାତ୍ର ଏମିତି ଜଣେ ବ୍ୟକ୍ତି ଅଛନ୍ତି, ଯିଏ କି ଦୀର୍ଘ ୨୦ ବର୍ଷ ଧରି ଚପଲ ନ ପିନ୍ଧି ଖାଲି ପାଦରେ ଯାତ୍ରା କରୁଛନ୍ତି। ଏହି ବ୍ୟକ୍ତି ଜଣଙ୍କ ଆମେରିକାରେ ରହୁଛନ୍ତି।
ଆମେରିକାର କନେକ୍ଟିକଟ୍ର ବାସିନ୍ଦା ୫୯ ବର୍ଷୀୟ ଜୋସେଫ୍ ଡେରୁଭୋ ଜୁନିୟର ଦୀର୍ଘ ୨ ଦଶନ୍ଧି ଧରି ଜୋତା ପିନ୍ଧୁନାହାନ୍ତି। ଏହି ନିଷ୍ପତ୍ତି ନେବା ପଛର କାରଣ କ’ଣ ଯଦିଓ ତାଙ୍କର ମନେ ନାହିଁ ତଥାପି ସେ କୁହନ୍ତି, ୨୦୦୨ରେ ପ୍ରଥମ ଆପଲ ଆଇଫୋନ୍ ଲଞ୍ଚ୍ ହେବାର ୫ ବର୍ଷ ପୂର୍ବରୁ ଏହି ନିଷ୍ପତ୍ତି ନେଇଥିଲେ କି କେବେ ଜୋତା ପିନ୍ଧିବେ ନାହିଁ। ସେ ଦୀର୍ଘଦିନ ଧରି କଠିନ କ୍ରୀଡ଼ା ଜୋତା ପିନ୍ଧି ଜଗିଂ ହେତୁ ତାଙ୍କ ଆଙ୍ଗୁଠିରେ ଫୁଲା ଦେଖାଗଲା। ଯାହା ଯନ୍ତ୍ରଣାଦାୟକ ଥିଲା। ଏଭଳି ପରିସ୍ଥିତିରେ ଡାକ୍ତର ତାଙ୍କୁ ଅସ୍ତ୍ରୋପଚାର ପାଇଁ ପରାମର୍ଶ ଦେଇଥିଲେ। ଅସ୍ତ୍ରୋପଚାରର କିଛି ଦିନ ପୂର୍ବରୁ ଜୋସେଫ୍ ଜୋତା ପିନ୍ଧିବା ବନ୍ଦ କରିଦେଲେ କାରଣ ତାଙ୍କର ଯନ୍ତ୍ରଣା ଅସହ୍ୟ ହୋଇଯାଇଥିଲା।
ଅସ୍ତ୍ରୋପଚାର ଦିନ ଆସିବା ବେଳକୁ ତାଙ୍କର ଯନ୍ତ୍ରଣା ଟିକେ କମିଯାଇଥିଲା। ସେଥିପାଇଁ ସେ ଅସ୍ତ୍ରୋପଚାର ପାଇଁ ରାଜି ହୋଇ ନ ଥିଲେ ଏବଂ ଏହା ବିନା ଧିରେ ଧିରେ ତାଙ୍କ ଗୋଡ଼ ଭଲ ହେବାକୁ ଲାଗିଲା। ସେବେଠାରୁ ସେ ଖାଲି ପାଦରେ ଚାଲିବା ଆରମ୍ଭ କଲେ। ସେ ଜୋତା ଏବଂ ଚପଲ ଛାଡ଼ିଦେଲେ। ସେବେଠାରୁ ଆଜି ପର୍ଯ୍ୟନ୍ତ ଦୀର୍ଘ ୨୦ ବର୍ଷ ଧରି ସେ ଜୋତା ପିନ୍ଧୁନାହାନ୍ତି।
ଜୋସେଫ୍ କୁହନ୍ତି, ଯେତେବେଳେ ସେ ସାଙ୍ଗମାନଙ୍କ ସହିତ ରେଷ୍ଟୁରାଣ୍ଟକୁ ଯାଆନ୍ତି, ସେତେବେଳେ ତାଙ୍କୁ ଚପଲ ବିନା ପ୍ରବେଶ କରିବାକୁ ଦିଆଯାଇ ନ ଥାଏ। ଏହି କାରଣରୁ ସେ ନିଜ କାର୍ରେ ଏକ ସ୍ଲିପର ରଖିଥାନ୍ତି। ଯାହାକୁ ସେ ସେହି ସମୟରେ ପିନ୍ଧନ୍ତି ଏବଂ ସେ ଯିବା ମାତ୍ରେ ସେଗୁଡ଼ିକୁ ନେଇଯାଆନ୍ତି। ଜୋସେଫ୍ କହିଛନ୍ତି, ବର୍ତ୍ତମାନ ସେ ଜାଣିନାହାନ୍ତି ଯେ, ସେ ଜୋତା ପିନ୍ଧୁ ନାହାନ୍ତି। କାରଣ କେବେ ଯଦି ଜୋତା ପିନ୍ଧିବାକୁ ଦରକାର ପଡୁଛି ସେ ଏହାକୁ ଅଶୁଭ ବୋଲି ମନେ କରନ୍ତି।
