ଛତ୍ରପୁର,୩ା୬(ଦିଲ୍ଲୀପ ସାମଲ): ଛତ୍ରପୁରର ଅଧିଷ୍ଠାତ୍ରୀ ଦେବୀ ମା’ ରାମାୟାଣାମ୍ମାଙ୍କ ଠାକୁରାଣୀ ଯାତ୍ରା ଅବସରରେ ସ୍ଥାନୀୟ କଳା, ସଂସ୍କୃତି ଓ ପରମ୍ପରାର ଗରିମାମୟ ଐତିହ୍ୟକୁ ଉଦ୍ଜୀବିତ କରିବା ଲକ୍ଷ୍ୟ ନେଇ ଚାଲିଥିବା ‘ଛତ୍ରପୁର ମହୋତ୍ସବ’ର ତୃତୀୟ ସନ୍ଧ୍ୟା ବେଶ୍ ଜମିଛି। ଗଞ୍ଜାମ ଜିଲା ପ୍ରଶାସନ ଏବଂ ଛତ୍ରପୁର ବିଧାୟକ କୃଷ୍ଣଚନ୍ଦ୍ର ନାୟକଙ୍କ ତତ୍ତ୍ୱାବଧାନରେ ଆୟୋଜିତ ଏହି ମହୋତ୍ସବରେ ଶ୍ରୋତା ଓ ଦର୍ଶକଙ୍କ ପ୍ରବଳ ଭିଡ଼ ଜମିଥିଲା।
ମହୋତ୍ସବର ତୃତୀୟ ସନ୍ଧ୍ୟାରେ ଓଡ଼ିଶାର ସୁନାମଧନ୍ୟ କଣ୍ଠଶିଳ୍ପୀ ଦୀପ୍ତିରେଖା ପାଢ଼ୀ ଏବଂ କୁଲଦୀପ ପଟ୍ଟନାୟକ ନିଜର ସୁମଧୁର କଣ୍ଠରେ ଶ୍ରୋତାଙ୍କୁ ମନ୍ତ୍ରମୁଗ୍ଧ କରିଥିଲେ। ଦୀପ୍ତିରେଖାଙ୍କ ଲୋକପ୍ରିୟ ଗୀତ ‘ଟିକେ ଟିକେ ଅଚିହ୍ନା ତୁ’, ‘ଗଜଲ୍ ଗଜଲ୍’, ‘ବେଳ ବେଳେ ଭଲ ଲାଗେ’ ଓ ‘ହାଏ ତୋ ପ୍ରେମ’ ଏବଂ କୁଲଦୀପଙ୍କ ‘କେବେ ଆସି ତୁ’, ‘ତୁ ମୋରି ଦୁନିଆ’ ଓ ‘ସମ୍ମୋହିନୀ’ ଭଳି ସଙ୍ଗୀତ ସାଙ୍ଗକୁ କିଛି ବଲିଉଡ ଗୀତର ତାଳେ ତାଳେ ଝୁମିଥିଲେ ଦର୍ଶକ।
ଏହି ସାଂସ୍କୃତିକ ସନ୍ଧ୍ୟାରେ ଛତ୍ରପୁର ବିଧାୟକ କୃଷ୍ଣ ଚନ୍ଦ୍ର ନାୟକ, ସୋରଡ଼ା ବିଧାୟକ ନୀଳମଣି ବିଶୋଇ, ଚିକିଟି ବିଧାୟକ ମନୋରଞ୍ଜନ ଦ୍ୟାନ ସାମନ୍ତରା, ଗଞ୍ଜାମର ଅତିରିକ୍ତ ଜିଲ୍ଲାପାଳ ସଚ୍ଚିଦାନନ୍ଦ ନାୟକ, ଦେବଦତ୍ତ ପଣ୍ଡା, ସୁନୀଲ କେରକେଟା, ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷର ସଚିବ ରମେଶ ହାଁସଦା ଏବଂ ଛତ୍ରପୁର ଉପଜିଲ୍ଲାପାଳ ଶିବାଶିଷ ବରାଳଙ୍କ ସମେତ ଅନେକ ଜନପ୍ରତିନିଧି ଅତିଥି ଭାବେ ଯୋଗ ଦେଇଥିଲେ। ସମସ୍ତ ଅତିଥି ମା’ ରାମାୟାଣାମ୍ମା ଓ ପ୍ରଭୁ ଜଗନ୍ନାଥଙ୍କ ନିକଟରେ ପ୍ରଦୀପ ପ୍ରଜ୍ଜ୍ୱଳନ କରି ଅଞ୍ଚଳବାସୀଙ୍କ ସୁଖ ଓ ସମୃଦ୍ଧି କାମନା କରିଥିଲେ।
ମହୋତ୍ସବ ମଞ୍ଚରେ ଛତ୍ରପୁର ଅଞ୍ଚଳର କାର୍ଯ୍ୟରତ ଗଣମାଧ୍ୟମ ପ୍ରତିନିଧିମାନଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହା ସହ ଚଳିତ ବର୍ଷ ମ୍ୟାଟ୍ରିକ ପରୀକ୍ଷାରେ କୃତିତ୍ୱ ହାସଲ କରିଥିବା ‘ଦି ନ୍ୟୁଜ୍ ୟୁରୋ ସ୍କୁଲ’ର ଟପର ଶ୍ରେୟାସୀ ସାହୁ, ଇସିକା ବେହେରା ଓ ଦେବୀ ପ୍ରସାଦ ନନ୍ଦୀ ଏବଂ ଛତ୍ରପୁର ସରସ୍ବତୀ ଶିଶୁ ବିଦ୍ୟା ମନ୍ଦିରର ଛାତ୍ର ଅଙ୍କିତ ଆଚାର୍ଯ୍ୟଙ୍କୁ ଅତିଥିମାନଙ୍କ ଦ୍ୱାରା ମାନପତ୍ର ଦେଇ ସମ୍ବର୍ଦ୍ଧିତ କରାଯାଇଥିଲା।
ମଞ୍ଚରେ ବିଭିନ୍ନ ଅଞ୍ଚଳରୁ ଆସିଥିବା କଳାକାରମାନଙ୍କ ଦ୍ୱାରା ପାରମ୍ପରିକ ଓ ଆଧୁନିକ ନୃତ୍ୟ ପରିବେଷଣ କରାଯାଇଥିଲା। ରଘୁନାଥ ନାଟ୍ୟ ସଂସଦ (ସାହାସପୁର) ଦ୍ୱାରା ପ୍ରସିଦ୍ଧ ରାମଲୀଳା, ନୃତ୍ୟାଞ୍ଜଳି ଇନଷ୍ଟିଚ୍ୟୁଟ୍ (ଛତ୍ରପୁର) ଓ ନୃତ୍ୟମ କଳା ଗବେଷଣା କେନ୍ଦ୍ର (ହିଞ୍ଜିଳିକାଟୁ) ପକ୍ଷରୁ ମନୋରମ ଆଦିବାସୀ ନୃତ୍ୟ,ଡିଏସଆର କଲଚରାଲ୍ ଆଣ୍ଡ ଚାରିଟେବୁଲ୍ ଟ୍ରଷ୍ଟ ଦ୍ୱାରା ଆଧୁନିକ ନୃତ୍ୟ, ମା ମଙ୍ଗଳା ପାଲା ସଂସଦ (ମଧୁରଚୁଆ) ଦ୍ୱାରା ପାଲା ପରିବେଷଣ କରାଯାଇଥିଲା।ସଲମାନ ଡ୍ୟାନ୍ସ ଗ୍ରୁପ୍ର ସମ୍ବଲପୁରୀ ମିକ୍ସ ନୃତ୍ୟ, କଳାହାଣ୍ଡିର ଜିତେନ୍ଦ୍ର ଭୋଇ ଏଣ୍ଡ ଗ୍ରୁପ୍ ଦ୍ୱାରା ପାରମ୍ପରିକ ଘୁମୁରା ନୃତ୍ୟ ଦର୍ଶକଙ୍କୁ ବିମୋହିତ କରିଥିଲା।
ଗୁରୁବାର ଚତୁର୍ଥ ସନ୍ଧ୍ୟାରେ ବଲିଉଡର ସୁନାମଧନ୍ୟ ଗାୟକ ଯୋଡ଼ି ସାଚେତ ଓ ପରମ୍ପରା ଏବଂ ଓଲିଉଡର ଲୋକପ୍ରିୟ ଅଭିନେତା ତଥା ଷ୍ଟାଇଲିସ୍ ଡ୍ୟାନ୍ସର ଶୈଳେନ୍ଦ୍ର ସାମନ୍ତରାୟ ଯୋଗଦେବେ ।
