ସାରସକଣା,୨୧।୧୦(ଡି.ଏନ.ଏ.): ମୟୂରଭଞ୍ଜ ଜିଲା ଝାରପୋଖରିଆ ଥାନା ଅଧୀନ ୧୮ନଂ. ଜାତୀୟ ରାଜପଥ ସଂଲଗ୍ନ ଝାରପୋଖରିଆ ଗ୍ରାମର ସୁବାସ ମହାରଣାଙ୍କ ଘରୁ ଲକ୍ଷାଧିକ ଟଙ୍କାର ସୁନା ରୁପା ଅଳଙ୍କାର ଚୋରି ନେଇ ଅଭିଯୋଗ ହୋଇଛି।
ସୁବାସଙ୍କ ଅଭିଯୋଗ ଅନୁଯାୟୀ, ସମସ୍ତ ପରିବାର ଲୋକ ଦୁଇଦିନ ପାଇଁ ରାଇରଙ୍ଗପୁରସ୍ଥିତ ଗ୍ରାମକୁ ଯାଇଥିଲେ। ଶୁକ୍ରବାର ଆସି ମୁଖ୍ୟ କବାଟ ଖୋଲିବା ବେଳେ ଭିତରପଟୁ ବନ୍ଦ ଥିବା ଏବଂ ପଛପଟ ଫାଟକର ତାଲା ଖୋଲା ରହିଥିବା ଦେଖିବାକୁ ପାଇଥିଲେ। କେହି ଦୁର୍ବୃତ୍ତ ପାଚେରି ଡେଇଁ ମୁଖ୍ୟ ଫାଟକ ତାଲା ଭାଙ୍ଗି ଘର ଭିତରେ ପଶି ଆଲମାରୀ ଭାଙ୍ଗି ସୁନାରୁପା ଗହଣା ଚୋରି କରିନେଇଛନ୍ତି। ଝାରପୋଖରିଆ ପୋଲିସ ଏବଂ ସନ୍ଧାନୀ କୁକୁର ସହ ଅନୁସନ୍ଧାନକାରୀ ଦଳ ପହଞ୍ଚି ତଦନ୍ତ କରିଛନ୍ତି। ଏ ନେଇ ଥାନାରେ ଏକ ମାମଲା (ନଂ.୨୩୨/୨୨) ରୁଜୁ କରାଯାଇଛି। ତଦନ୍ତ ପରେ ସବୁ ତଥ୍ୟ ସାମ୍ନାକୁ ଆସିବ ବୋଲି ତଦନ୍ତକାରୀ ଅଧିକାରୀ ସୁଧାଂଶୁ ଶେଖର ସେଠୀ କହିଛନ୍ତି।
