କେସିଙ୍ଗା,୨୩।୭(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଯୋଗ୍ୟ ହିତାଧିକାରୀଙ୍କୁ ବାଦ୍ ଦିଆଯାଇଥିବାକୁ ନେଇ ଜିଲାପାଳଙ୍କ ନିକଟରେ ଇତିମଧ୍ୟରେ ଅଭିଯୋଗ ହୋଇଛି। ପ୍ରଧାନମନ୍ତ୍ରୀ ଆବାସ ଯୋଜନା ପାଇଁ ବ୍ଲକର ୨୬ଟି ଗ୍ରାମ ପଞ୍ଚାୟତରେ ୩ଟି ପର୍ଯ୍ୟାୟରେ ସର୍ଭେ କରିବା ସହ ଶେଷ ପର୍ଯ୍ୟାୟରେ ଜିଓ-ଟ୍ୟାଗିଂ କରାଯାଇଥିଲା । ଚୂଡ଼ାନ୍ତ ତାଲିକା ପରେ ବହୁ ଗରିବ ଓ ଆବାସହୀନ ପରିବାର ଏଥିରୁ ବାଦ୍ ପଡ଼ିଛନ୍ତି। ବହୁ ଧନୀ ବ୍ୟକ୍ତିଙ୍କ ନାମ ତାଲିକାରେ ସ୍ଥାନ ପାଇଥିବା ସେମାନେ ଅଭିଯୋଗ ହୋଇଛି। ଅଭିଯୋଗ ଅନୁଯାୟୀ, ଚୂଡ଼ାନ୍ତ ତାଲିକାରେ ଥିବା କେତେକ ବ୍ୟକ୍ତିଙ୍କ ପାଖରେ ପକ୍କା ଘର, ଦୁଇଚକିଆ ଯାନ ଓ ଟିଭି,୧୦ଏକରରୁ ଅଧିକ ଜମି ବାଡ଼ି ଭଳି ସୁବିଧା ଥିବା ସତ୍ତ୍ବେ ସେମାନଙ୍କ ନାମ ତାଲିକାରେ ରହିଛି। କିନ୍ତୁ ପ୍ରକୃତରେ ଜମି ହୀନ, ବାସ ହୀନ ଓ ଅତ୍ୟନ୍ତ ଗରିବ ପରିବାରର ହିତାଧିକାରୀଙ୍କ ତାଲିକାରୁ ବାଦ୍ ପଡ଼ିଛନ୍ତି। ଏପରିକି ଟଙ୍କା ଦେଇଥିବା ଲୋକଙ୍କ ନାମ ତାଲିକାରେ
ରହିଥିବା ଏବଂ ଟଙ୍କା ଦେଇନଥିବା ଲୋକଙ୍କ ନାମ ବାଦ୍ ପଡ଼ିଥିବା ଭଳି ଗୁରୁତର ଅଭିଯୋଗ ମଧ୍ୟ ହୋଇଛି। ବ୍ଲକର ୨୬ଟି ପଞ୍ଚାୟତରେ ୩ଟି ପର୍ଯ୍ୟାୟରେ ମୋଟ ୧୩,୯୩୮ ଜଣଙ୍କ ସର୍ଭେ କରାଯାଇଥିଲା। କିନ୍ତୁ ଚୁଡାନ୍ତ ତାଲିକା ଏଥି ମଧ୍ୟରୁ୧୦ହଜାର୮୮୧ଜଣ ଯୋଗ୍ୟ ବିବେଚିତ ହୋଇଛନ୍ତି। ପଞ୍ଚାୟତ ଭିତ୍ତିକ ତଥ୍ୟ ଅନୁଯାୟୀ,ବ୍ଳକର ଦେଓଗାଁ ପଞ୍ଚାୟତରେ ସର୍ବାଧିକ ୬୩୯ ଜଣ ହିତାଧିକାରୀ ଯୋଗ୍ୟ ବିବେଚିତ ହୋଇଛି। କିନ୍ତୁ ବାଲ୍ସି, କାଣ୍ଡେଲ, ପରଲସିଙ୍ଗା, ବେଲଖଣ୍ଡି, ଫଟକାମାଲ, ଉତକେଲା, କିକିଆ,ତୁର୍ଳାଖମାନ,ତୁଣ୍ଡଳା, ସିରଜାପାଲି,ବେଲଖଣ୍ଡି, ନୁନ ମାଠ, କାଣ୍ଡେଲ, କନ୍ତେଶିର, ପରଲସିଙ୍ଗା, ଲଇତରା,ବୋରିଆ,କିକିଆ, ଫାଟକା ମାଲ,ନାସିଗା, ଓ ଗୋକୁଳେଶ୍ବର ଆଦିଗ୍ରାମ ପଞ୍ଚାୟତରେ ମଧ୍ୟ ବହୁ ପ୍ରକୃତ ହିତାଧିକାରୀଙ୍କ ନାମ ପ୍ରଧାନ ମନ୍ତ୍ରୀ ଆବାସ ଯୋଜନା ତାଲିକାରେ ନଥିବା ଅଭିଯୋଗ ହୋଇଛି। ଗୋକୁଳେଶର ପଞ୍ଚାୟତ କାଦୋପଡ଼ାର ୧୩ଟି ପରିବାରରେ ଝାଟିମାଟି ଘରେ ଦୀର୍ଘ ଦିନ ଧରି ଅସୁବିଧାରେ ଜୀବନଯାପନ କରି ଆସୁଛନ୍ତି। ଘରଦ୍ୱାର ନଥିବା ସତ୍ତ୍ବେ ପ୍ରଧାନମନ୍ତ୍ରୀ ଆବାସ ଯୋଜନା ତାଲିକାରେ ସେମାନଙ୍କ ନାମ ନଥିବାରୁ ଜିଲାପାଳ ଅଭିଯୋଗ ଶୁଣାଣିରେ ଅସନ୍ତୋଷ ପ୍ରକାଶ କରି ଅଭିଯୋଗ କରିଥିଲେ । ଏହାର ଭିଜିଲାନ୍ସ ତଦନ୍ତ କରାଗଲେ ଅନେକ ଗୁମର ଫିଟିବ ବୋଲି ହିତାଧିକାରୀମାନେ ପ୍ରକାଶ କରିଛନ୍ତି। ଏ ସଂକ୍ରାନ୍ତରେ କେସିଙ୍ଗା ବିଡିଓ ଜନ୍ମେଜୟ ସ୍ବାଇଁଙ୍କୁ ପଚାରିବାରୁ ପ୍ରତି ଗ୍ରାମ ପଞ୍ଚାୟତରେ ଅଭିଯୋଗ ବକ୍ସ ରହିଛି ,ସେଠାରେ ହିତାଧିକାରୀମାନେ ଅଭିଯୋଗ କରିବେ ଏବଂ ପରେ ତଦନ୍ତ କରାଯିବ ବୋଲି ପ୍ରକାଶ କରିଥିଲେ।
Odisha’s No.1 Odia Daily
