ତେହରାନ୍,୩୦ା୬: ମଧ୍ୟପ୍ରାଚ୍ୟରେ ଯୁଦ୍ଧ ବନ୍ଦ କରିବା ଲାଗି ଚୁକ୍ତିନାମା କାର୍ଯ୍ୟକାରିତା ସମ୍ପର୍କରେ ଆଲୋଚନା ନିମନ୍ତେ ଆଗାମୀ ଦିନରେ ଆମେରିକା ଏବଂ ଇରାନର ବୈଷୟିକ ଟିମ୍ ମଧ୍ୟରେ ଆଲୋଚନା ହେବା ଖବରକୁ ତେହରାନ୍ ସୋମବାର ଖଣ୍ଡନ କରିଛି। ଚଳିତ ସପ୍ତାହରେ କାର୍ଯ୍ୟକାରୀ ଗ୍ରୁପ୍ ମଧ୍ୟରେ ବୈଷୟିକ ବୈଠକ ପାଇଁ କୌଣସି ଯୋଜନା ନାହିଁ ବୋଲି ଇରାନ ବହିର୍ବ୍ୟାପାର ଉପମନ୍ତ୍ରୀ କାଜେମ୍ ଘରିବାବାଦି କହିଛନ୍ତି। ଷ୍ଟ୍ରେଟ୍ ଅଫ୍ ହର୍ମୁଜ୍କୁ ନେଇ ଥିବା ବିବାଦ ଦୂର କରିବା ପାଇଁ ମଙ୍ଗଳବାର କାତାରରେ ତେହରାନ୍ ଏବଂ ଓ୍ବାଶିଂଟନ ମଧ୍ୟରେ ବୈଠକ ବସିବ ବୋଲି ରବିବାର ଆମେରିକା କର୍ତ୍ତୃପକ୍ଷ କହିଥିବାବେଳେ ଘରିବାବାଦି ଏହାକୁ ଖଣ୍ଡନ କରିଛନ୍ତି। ଏନେଇ ହ୍ବାଇଟ୍ ହାଉସ୍ ପକ୍ଷରୁ ମଧ୍ୟ ଆନୁଷ୍ଠାନିକ ଭାବେ କୌଣସି ବିବୃତି ଜାରି କରାଯାଇ ନାହିଁ।
ମଧ୍ୟପ୍ରାଚ୍ୟରେ ଯୁଦ୍ଧ ବନ୍ଦ ପାଇଁ ଆମେରିକା-ଇରାନ ଆଲୋଚନାରେ କାତାର ଏବଂ ପାକିସ୍ତାନ ମଧ୍ୟସ୍ଥତା କରୁଛନ୍ତି। ଗତ ୨୧ ତାରିଖରେ ସୁଇଜରଲାଣ୍ଡରେ ହୋଇଥିବା ଆଲୋଚନା ବେଳେ ୪ ଦେଶର ପ୍ରତିନିଧିମାନେ ଯୋଗଦେଇଥିଲେ। ଆମେରିକା ପ୍ରତିବନ୍ଧକ ଲଗାଇଥିବାରୁ ଇରାନର ବହୁ ପରିମାଣର ସମ୍ପତ୍ତି କାତାର ବ୍ୟାଙ୍କଗୁଡ଼ିକରେ ଅଟକି ରହିଛି। ଏହାକୁ ମୁକୁଳାଇବା ପାଇଁ ଆବଶ୍ୟକ ପଦକ୍ଷେପ ନିଆଯାଉଥିବା ଇରାନ ରାଷ୍ଟ୍ରପତି ମାସୁଦ ପେଜେଶ୍କିଆନ୍ ସୋମବାର କହିଛନ୍ତି। ଯୋଜନା ଅନୁଯାୟୀ କାତାରରେ ଅଟକି ରହିଥିବା ୧୨ ବିଲିୟନ ଡଲାର ମଧ୍ୟରୁ ୬ ବିଲିୟନ ଡଲାର ଇରାନକୁ ଫେରିବ ବୋଲି ସେ ସୂଚନା ଦେଇଛନ୍ତି। ହର୍ମୁଜ୍କୁ ନେଇ ଅଚଳାବସ୍ଥା ଜାରି ରହିଥିବାବେଳେ ଇତିମଧ୍ୟରେ ଆମେରିକା
ଓ ଇରାନ ୨ ଥର ପରସ୍ପରର ସାମରିକ ଘାଟିକୁ ଆକ୍ରମଣ କଲେଣି। ଓ୍ବାଶିଂଟନ ଯଦି ଆକ୍ରମଣ ଜାରି ରଖେ ତେବେ ଯୁଦ୍ଧ ବନ୍ଦ ପାଇଁ ଚାଲିଥିବା ବୁଝାମଣାକୁ ସମ୍ପୂର୍ଣ୍ଣ ବନ୍ଦ କରିଦିଆଯିବ ବୋଲି ତେହରାନ୍ ରବିବାର ଚେତାବନୀ ଦେଇଥିଲା। ଇରାନର ପ୍ରତ୍ୟକ୍ଷ ନିରୀକ୍ଷଣ ବିନା ଷ୍ଟ୍ରେଟ୍ ଅଫ୍ ହର୍ମୁଜ୍ରେ ଜାହାଜ ଚଳାଚଳ ପାଇଁ ଉଦ୍ୟମ ଚାଲିଥିବାରୁ ଉତ୍ତେଜନା ବଢ଼ିଛି ଏବଂ ଦୀର୍ଘମିଆଦୀ ଯୁଦ୍ଧବିରତି ବୁଝାମଣାକୁ ବିପଦରେ ପକାଇଛି। ଆମେରିକା ନୌସେନା ତତ୍ତ୍ୱାବଧାନରେ ଥିବା ଏକ ବହୁରାଷ୍ଟ୍ରୀୟ ସାମୁଦ୍ରିକ ସଂସ୍ଥା ଓମାନ ନିକଟରେ ସାମୁଦ୍ରିକ ପଥକୁ ଉଭୟ ପଟରୁ ଜାହାଜ ଚଳାଚଳ ପାଇଁ ବିସ୍ତାର କରିବ ବୋଲି କହିଥିବାରୁ ନୂଆ ବିବାଦ ସୃଷ୍ଟି ହୋଇଛି। ହର୍ମୁଜ୍ ଜଳପଥରେ ଇରାନ ଦ୍ୱାରା କାର୍ଯ୍ୟକାରୀ ବ୍ୟବସ୍ଥା ଭିନ୍ନ ଅଲଗା ବ୍ୟବସ୍ଥା କରିବାକୁ କୌଣସି ଦେଶ ଉଦ୍ୟମ କଲେ, ତାହା ସମସ୍ୟାକୁ ଅଧିକ ଜଟିଳ କରିବା ସହ ହର୍ମୁଜ୍ ଖୋଲିବା ବିଳମ୍ବ ହେବ ଓ ଉତ୍ତେଜନା ବଢ଼ିବ ବୋଲି ଇରାନ ବହିର୍ବ୍ୟାପାର ମନ୍ତ୍ରୀ ଆବ୍ବାସ ଅରାଘଚି ରବିବାର କହିଥିଲେ।
