ଆନନ୍ଦପୁର, ୩୦।୬(ସୁଶାନ୍ତ କୁମାର ସାହୁ): କେନ୍ଦୁଝର ଜିଲା ହଡ଼ଗଡ଼ ବନାଞ୍ଚଳରେ ପୁଣି ଦନ୍ତା ଆତଙ୍କ ଦେଖାଯାଇଛି । ମଙ୍ଗଳବାର ଭୋର ପ୍ରାୟ ୫ଟା ସମୟରେ କଣ୍ଟିପାଳ ପଞ୍ଚାୟତ ଅନ୍ତର୍ଗତ ମଠସାହି ଗ୍ରାମରେ ଏକ ଦନ୍ତା ହାତୀ ଆକ୍ରମଣରେ ଜଣେ ମହିଳା ଗୁରୁତର ହୋଇଥିବା ବେଳେ ଅନ୍ୟ ଦୁଇ ଜଣ ବ୍ୟକ୍ତି ଆହତ ହୋଇଛନ୍ତି।
ମିଳିଥିବା ସୂଚନା ଅନୁଯାୟୀ, ବାଘମରା ଜଙ୍ଗଲ ନିକଟବର୍ତ୍ତୀ ମଠସାହି ଗ୍ରାମର ଜଣେ ମହିଳା ଆଜି ଭୋର ସମୟରେ ଶୌଚ ପାଇଁ ଘରୁ ବାହାରକୁ ଯାଇଥିଲେ । ସେହି ସମୟରେ ଜଙ୍ଗଲରୁ ବାହାରି ଆସିଥିବା ଏକ ଦନ୍ତା ହାତୀ ସାମ୍ନାରେ ସେ ପଡ଼ିଯାଇଥିଲେ। ହାତୀଟି ମହିଳାଙ୍କ ଗୋଡ଼କୁ ଶୁଣ୍ଢରେ ମାଡ଼ିଦେଇ ଗୁରୁତର ଭାବେ ଆହତ କରିଛି। ସେହି ସମୟରେ ନିକଟରେ ଥିବା ଆଉ ଦୁଇ ଜଣ ଗ୍ରାମବାସୀ ହାତୀକୁ ଦେଖି ଭୟଭୀତ ହୋଇ ଦୌଡ଼ିବାକୁ ଚେଷ୍ଟା କରିଥିଲେ। ତରବରିଆ ଭାବେ ଦୌଡ଼ିବା ବେଳେ ସେମାନେ ତଳେ ପଡ଼ିଯାଇ ଆହତ ହୋଇଛନ୍ତି। ତାଙ୍କ ପାଟିଶୁଣି ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ହାତୀକୁ ଘଉଡ଼ାଇଥିଲେ।
ଆହତ ତିନି ଜଣଙ୍କୁ ତୁରନ୍ତ ଉଦ୍ଧାର କରି ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଛି। ମହିଳାଙ୍କ ଅବସ୍ଥା ଗୁରୁତର ଥିବାରୁ ଡାକ୍ତର ତାଙ୍କୁ ନିରୀକ୍ଷଣରେ ରଖିଛନ୍ତି। ଅନ୍ୟ ଦୁଇ ଜଣ ସାମାନ୍ୟ ଆହତ ହୋଇଛନ୍ତି।
ଉଲ୍ଲେଖଯୋଗ୍ୟ, ଏବେ ଆମ୍ବ-ପଣସ ଋତୁ ଚାଲିଥିବାରୁ ପାଚିଲା ଫଳ ଖାଇବା ପାଇଁ ହାତୀପଲ ଜଙ୍ଗଲ ଛାଡ଼ି ଗାଁ ମୁହାଁ ହେଉଛନ୍ତି। ହଡ଼ଗଡ଼ ରେଞ୍ଜ ଅଞ୍ଚଳରେ ଗତ କିଛି ଦିନ ହେଲା ହାତୀଙ୍କ ଗତିବିଧି ବଢ଼ିଯାଇଛି। ଘଟଣା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳିଯାଇଛି। ବନ ବିଭାଗ ଘଟଣାସ୍ଥଳରେ ପହଞ୍ଚି ହାତୀର ଗତିବିଧି ଉପରେ ନଜର ରଖିବା ସହ ଭୋର ସମୟରେ ଏକା ନ ବାହାରିବା ଓ ସତର୍କ ରହିବାକୁ ଲୋକଙ୍କୁ ଅନୁରୋଧ କରିଛି ।
