ନୂଆଦିଲ୍ଲୀ, ୨୧ା୭: ଦେଶରେ କେଉଁ ଜାତିର କେତେ ସଂଖ୍ୟାରେ ଲୋକ ଅଛନ୍ତି, ସେ ଭିତ୍ତିରେ ଜନଗଣନା ହେବ ନାହିଁ। କେବଳ ଅନୁସୂଚିତ ଜାତି ଓ ଜନଜାତି (ଏସ୍ସି, ଏସ୍ଟି)ଙ୍କ ସଂଖ୍ୟା ଗଣନା କରାଯିବ ବୋଲି କେନ୍ଦ୍ର ସରକାର ମଙ୍ଗଳବାର ଲୋକ ସଭାରେ କହିଛନ୍ତି। କେନ୍ଦ୍ର ସ୍ବରାଷ୍ଟ୍ର ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାଏ କହିଥିଲେ, ମହାରାଷ୍ଟ୍ର ଏବଂ ଓଡ଼ିଶା ସରକାର ଆସନ୍ତା ଜନଗଣନାରେ ବିଭିନ୍ନ ଜାତିର ଲୋକସଂଖ୍ୟା ବାବଦରେ ଜାଣିବା ପାଇଁ ଅନୁରୋଧ କରିଥିଲେ। ସମ୍ବିଧାନର ବ୍ୟବସ୍ଥା ଅନୁଯାୟୀ ଲୋକ ସଭା ଏବଂ ବିଧାନସଭାରେ ଅନୁସୂଚିତ ଜାତି ଓ ଜନଜାତିଙ୍କ ସଂଖ୍ୟା ଅନୁପାତରେ ଆସନ ସଂରକ୍ଷଣ କରାଯାଇଛି। ତେଣୁ ଏସ୍ସି, ଏସ୍ଟିଙ୍କୁ ବାଦ୍ ଦେଇ ଜାତିଭିତ୍ତିକ ଗଣନା କରା ନ ଯିବାକୁ ଭାରତ ସରକାର ସ୍ଥିର କରିଥିବା ସେ ଏକ ଲିଖିତ ପ୍ରଶ୍ନର ଉତ୍ତରରେ ପ୍ରକାଶ କରିଛନ୍ତି। ୨୦୧୯ ମାର୍ଚ୍ଚ ୨୮ରେ ଦେଶରେ ଜନଗଣନା ହେବା ପାଇଁ ଗେଜେଟ୍ ଅଫ୍ ଇଣ୍ଡିଆରେ ବିଜ୍ଞପ୍ତି ପ୍ରକାଶ ପାଇଥିଲେ ହେଁ କରୋନା ମହାମାରୀ ଯୋଗୁ ତାହା ହୋଇପାରି ନ ଥିବା ସେ କହିଛନ୍ତି।
