ଡେରାବିଶ,୧୧ା୧୧(ସ୍ବ.ପ୍ର.): ଲୁଣା-ଚିତ୍ରୋପତ୍ଳା ଦ୍ୱିପାଞ୍ଚଳରେ ଥିବା ମାର୍ଶାଘାଇ ବ୍ଲକ ଅନ୍ତର୍ଗତ ଜଳପୋକ ପଞ୍ଚାୟତ ପକ୍ଷୋଟଠାରେ ଗତ ଶୁକ୍ରବାର ରାତିରେ ଲୁଣା ନଦୀବନ୍ଧର ଦକ୍ଷିଣ ପାର୍ଶ୍ୱରେ ୪୦ ଫୁଟ ନଦୀବନ୍ଧ ଦବି ଯାଇଥିଲା। ଗୁରୁବାର ଏହି ନଦୀବନ୍ଧ ଆହୁରି ୨ ଫୁଟ ଦବି ଯିବାରୁ ଅଞ୍ଚଳବାସୀଙ୍କ ଭିତରେ ଏକ କୋକୁଆ ଭୟ ସୃଷ୍ଟି ହୋଇଛି। କେଉଁ ମୁହୁର୍ତ୍ତରେ ନଦୀବନ୍ଧ ଭୁଶୁଡ଼ି ଯିବ ଏହି ଆଶଙ୍କାରେ ମାର୍ଶାଘାଇ, ଗରଦପୁର ଓ ଡେରାବିଶ ବ୍ଲକର ପକ୍ଷୋଟ, ଜଳପୋକ, କଣିବାଙ୍କ, ଶୃତିପୁର, ପୁରୁଷୋତମପୁର, ଶିଶୁଆ ଓ ଷଠିଲୋ ଗ୍ରାମବାସୀ ଆତଙ୍କିତ ଅବସ୍ଥାରେ ରହିଛନ୍ତି। ବିଶେଷକରି ନଦୀବନ୍ଧ କଡ଼ରେ ଥିବା ଗ୍ରାମ ସବୁର ଘରଗୁଡ଼ିକ କେତେବେଳେ ଯେ ଭୁଶୁଡ଼ି ପଡିବ ସେହି ଆଶଙ୍କାରେ କେତେଗୋଟି ପରିବାର ୭ ଦିନ ହେବ ଘର ଛାଡ଼ି ଅନ୍ୟତ୍ର ରହୁଛନ୍ତି। ଏହି ନଦୀବନ୍ଧଟି ଜଳସମ୍ପଦ ବିଭାଗର କଟକ ନର୍ଥ ଡିଭିଜନ୍ ଅଧୀନରେ ରହିଛି। କେବଳ ଜଳସମ୍ପଦ ବିଭାଗର ସହକାରୀ ମୁଖ୍ୟଯନ୍ତ୍ରୀ ଓ ଅଧୀକ୍ଷଣ ଯନ୍ତ୍ରୀ ଘଟଣା ଘଟିବାର ୩ ଦିନ ପରେ ଆସି ଦବିଥିବା ନଦୀବନ୍ଧ ସ୍ଥାନ ପରିଦର୍ଶନ କରି ଫେରି ଯାଇଥିଲେ। ହେଲେ ଏଯାଏ ଏହାର କୌଣସି ପ୍ରତିକାର ବ୍ୟବସ୍ଥା ଗ୍ରହଣ କରାଯାଇନାହିଁ। ଅପରାହ୍ନରେ ଭାଜପା ନେତା ତଥା ପୂର୍ବତନ ମନ୍ତ୍ରୀ ବିଜୟ ମହାପାତ୍ର ଘଟଣା ସ୍ଥଳକୁ ଆସି ବନ୍ଧ ପରିଦର୍ଶନ କରିବା ସହ ବାଲି ଉତୋଳନ ହେଉଥିବା ସ୍ଥାନ ମଧ୍ୟ ପରିଦର୍ଶନ କରିଥିଲେ। ଏହାର ନିରାକରଣ ପାଇଁ ବୈଷୟିକ ଗତ ସମାଧାନ ପାଇଁ ଜଳସମ୍ପଦ ବିଭାଗ ମୁଖ୍ୟଯନ୍ତ୍ରୀଙ୍କ ସହ ଫୋନ୍ ଯୋଗେ ଯୋଗାଯୋଗ କରିଥିଲେ। ଏ ବିଷୟରେ ପୂର୍ବତନ ମନ୍ତ୍ରୀ ବିଜୟ କହିଛନ୍ତି, ବନ୍ଧ ନିକଟରେ ବେଆଇନ ବାଲି ଉତ୍ତୋଳନ କରାଯାଉଥିବାରୁ ନଦୀର ଝର ସୃଷ୍ଟି ହୋଇ ବନ୍ଧ ପ୍ରତି ବିପଦ ଦେଖାଦେଇଛି। ତେବେ ବାଲି ଉତ୍ତୋଳନ ବନ୍ଧ ଦବିବାର ମୁଖ୍ୟ କାରଣ ବୋଲି ବିଜୟ କହିଛନ୍ତି। ଏ ସମ୍ପର୍କରେ ଗୁରୁବାର କେନ୍ଦ୍ରାପଡ଼ା ଜିଲାପାଳଙ୍କ ସହ ଆଲୋଚନା କରିବେ ବୋଲି ବିଜୟ କହିଛନ୍ତି। ପକ୍ଷୋଟ ଗ୍ରାମର ବିଶ୍ୱଭୂଷଣ ମହାନ୍ତି, ମେଘନାଦ ରାଉତ, ସୁରେଶ ଦଳାଇ ପ୍ରମୁଖ ଗ୍ରାମବାସୀଙ୍କ ଏହି ନଦୀବନ୍ଧ ଯାତାୟାତ ପାଇଁ ଏକମାତ୍ର ରାସ୍ତା ବୋଲି ପ୍ରକାଶ କରିଛନ୍ତି। ୭ ଦିନ ହେବ ଏହି ବନ୍ଧ ଦବିଯିବା ଫଳରେ ପ୍ରଶାସନର ନୀରବତା ପାଇଁ ଅଞ୍ଚଳବାସୀ ଭୟଭୀତ ଅବସ୍ଥାରେ ରହିଛନ୍ତି। ୭ଟି ଗ୍ରାମବାସୀ ଏକ ପ୍ରକାର ଗୃହବନ୍ଦୀ ହୋଇ ରହିଛନ୍ତି ବୋଲି ସେମାନେ କହିଛନ୍ତି। ବିଜୟଙ୍କ ସହ ଭାଜପା ଜିଲା ସାଧାରଣ ସମ୍ପାଦକ ସରୋଜକାନ୍ତ ନାୟକ, ପୂର୍ବତନ ଜିଲା ପରିଷଦ ସଭ୍ୟ ଗଣେଶ ଚନ୍ଦ୍ର ସାମଲ, ଭାଜପା ନେତା ସୁକାନ୍ତ ଦ୍ୱିବେଦୀ ଏବଂ ବିଭୁଦେନ୍ଦୁ ପଣ୍ଡା ପ୍ରମୁଖ ଦଳୀୟ କର୍ମକର୍ତ୍ତା ସାମିଲ ହୋଇଥିଲେ।
