ମହାକାଳପଡ଼ା,୧୨।୫ (ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ନାଞ୍ଜୁରା ପଞ୍ଚାୟତର ପଣିଖିଆ ସାନ୍ତାଳପଡ଼ାର ଚତୁଃପାର୍ଶ୍ୱରେ ବନ ବିଭାଗ ପକ୍ଷରୁ ସେଞ୍ଚୁରି ବାଉଣ୍ଡାରି ପିଲାର ଚିହ୍ନଟ ସୀମା ନିର୍ଦ୍ଧାରଣ କରାଯାଇଛି। ଏହାକୁ ନେଇ ଗ୍ରାମବାସୀ ଚିନ୍ତାରେ ପଡ଼ିଛନ୍ତି। ମିଳିଥିବା ସୂଚନା ଅନୁସାରେ, ଏହି ଅନୁସୂଚିତ ଜାତି ସମ୍ପ୍ରଦାୟ ଲୋକମାନେ ଦୀର୍ଘ ୮୦ ବର୍ଷରୁ ଅଧିକ ହେବ ମୂଳବାସିନ୍ଦା ମୟୂରଭଞ୍ଜ ଜିଲା ବାଦାମପାହାଡ଼, ବାରିପଦା, ରାଇରଙ୍ଗପୁର ତଳବେରଡ଼ା ଅଞ୍ଚଳରୁ ଆସି ଏହି ଗ୍ରାମରେ ବସବାସ କରି ଆସୁଛନ୍ତି। ତେବେ ଏହି ପଡ଼ାରେ ୪୭ ପରିବାରରେ ୩୫୦ରୁ ଅଧିକ ଜନସଂଖ୍ୟା ଥିବା କୁହାଯାଉଛି। ଏମାନଙ୍କୁ ରାଜ୍ୟ ସରକାର ପ୍ରତି ପରିବାରଙ୍କୁ ୨ ଏକର ଜମି ଯୋଗାଇ ଦେଇଥିଲେ। ପରେ ପଡ଼ାର ଲୋକମାନେ ଚାଷଜମିରେ ଚାଷବାସ କରିବା ସହ ଜଙ୍ଗଲରୁ ମାଛ, କଙ୍କଡ଼ା ଧରି ପରିବାର ପ୍ରତିପୋଷଣ କରନ୍ତି। ଏଠାରେ ଥିବା ସମସ୍ତ ପରିବାର ଲୋକ ଅଭାବୀ ଶ୍ରେଣୀର। ଗଁାକୁ ଭଲ ରାସ୍ତା ନାହିଁ। ସାମୁଦ୍ରିକ ଝଡ଼ ଆସିଲେ ନିଜ କର୍ମକୁ ଆଦରି ପଡ଼ି ରହିଥାନ୍ତି। ୧୯୯୯ ମହାବାତ୍ୟାରେ ୧୦ରୁ ଅଧିକ ଲୋକଙ୍କ ସମୁଦ୍ରରେ ଭାସି ଜୀବନ ଯାଇଥିଲା। ତଥାପି ଏହି ଆଦିବାସୀ ସାନ୍ତାଳମାନେ ସରକାରୀ ସହାୟତାକୁ ବଞ୍ଚତ୍ତ ବୋଲି ଗ୍ରାମବାସିନ୍ଦା କହିଛନ୍ତି।
ଅପରପକ୍ଷରେ କିଛିଦିନ ତଳେ ଗହୀରମଥା ସାମୁଦ୍ରିକ ଅଭୟାରଣ୍ୟ ଅଞ୍ଚଳ ସୀମା ମଧ୍ୟରେ ଏହି ପଡ଼ା ଅନ୍ତର୍ଭୁକ୍ତ ହୋଇଥିବାରୁ ବନ ବିଭାଗ ପକ୍ଷରୁ ସର୍ବେକ୍ଷଣ ପ୍ରାମାଣିକ ଖମ୍ବ ସୀମା ନିର୍ଦ୍ଧାରଣ ହୋଇଥିବା ଦେଖିବାକୁ ମିଳିଛି। ଏହି ଖମ୍ବ ପୋତା ଯିବା ପରେ ଗ୍ରାମରେ ବୟସ୍କ ମୁରବିମାନଙ୍କ କହିବା କଥା ଆମର ଚିନ୍ତା ବଢ଼ିଛି। କାରଣ ବନ ବିଭାଗ ପକ୍ଷରୁ ଯେକୌଣସି ପରିସ୍ଥିତିରେ ଆମ ଗ୍ରାମକୁ ସ୍ଥାନାନ୍ତର କରିବା ଅସମ୍ଭବ ନୁହେଁ ବୋଲି ମୁରବିମାନଙ୍କ ମଧ୍ୟରୁ ଗଜେନ୍ଦ୍ର ମାରାଣ୍ଡି, ପୂର୍ଣ୍ଣଚନ୍ଦ୍ର ଟୁଡୁ, ଲବ ମାରାଣ୍ଡି, ଶଙ୍କର ମାରାଣ୍ଡି, ସୁନା ଟୁଡୁ, ଗୁରୁଭା ହଁାସଦା, ସୁନାରାମ ମାରାଣ୍ଡି, ଚରଣ ଟୁଡୁ, ରାମେଶ୍ୱର ମାରାଣ୍ଡି, ବାବୁଲି ଟୁଡୁ ପ୍ରମୁଖ କହିଛନ୍ତି। ଏହି ପିଲାର ଚିହ୍ନଟ ହେବା ପରେ ଗ୍ରାମର ବରିଷ୍ଠ ମୁରବିମାନେ ଗହୀରମଥା ରେଞ୍ଜ ଅଧିକାରୀ ବିଚିତ୍ରାନନ୍ଦ ବେହେରାଙ୍କୁ ଭେଟି ଅଭିଯୋଗ କରିଥିଲେ। ସେମାନେ ନିଜର ଭିଟାମାଟି ଛାଡିବେ ନାହିଁ ବୋଲି ରେଞ୍ଜ ଅଧିକାରୀଙ୍କୁ ଶୁଣାଇ ଦେଇଛନ୍ତି। ଏହି ଗ୍ରାମରେ ଗୃହ ନିର୍ମାଣ ହେଉ କି ଅନ୍ୟ ଯେକୌଣସି ଉନ୍ନୟନମୂଳକ କାର୍ଯ୍ୟ ହେଲେ ବନ ବିଭାଗ ଉଚ୍ଚ କର୍ତ୍ତୃପକ୍ଷଙ୍କ ଅନୁମତି ଆବଶ୍ୟକ ପଡ଼ିବ ବୋଲି ଗ୍ରାମବାସୀ କହିଛନ୍ତି। ଏହି ସମସ୍ୟା ସମ୍ପର୍କରେ ସ୍ଥାନୀୟ ବିଧାୟକ ତଥା ମନ୍ତ୍ରୀ ଅତନୁ ସବ୍ୟସାଚୀ ନାୟକଙ୍କୁ ଗ୍ରାମବାସୀ ଭେଟି ଅଭିଯୋଗ କରିବେ ବୋଲି ଗ୍ରାମର ଯୁବ ମୁରବି ଗୁରୁଭା ହଁାସଦା କହିଛନ୍ତି।
କେବଳ ସାନ୍ତାଳପଡ଼ା ନୁହେଁ ନରସିଂହପୁର, ରଟପଙ୍କ, ସୁନିତି, କଣ୍ଡରାପାଟିଆ, ଉତ୍ତର ଜମ୍ବୁ, ବତିଘର ଆଦି ଅଞ୍ଚଳ ପାର୍ଶ୍ୱରେ ବନ ବିଭାଗ ପକ୍ଷରୁ ସୀମା ନିର୍ଦ୍ଧାରଣ କରାଯାଉଛି। ଏହି ସୀମା ନିର୍ଦ୍ଧାରଣ ପୂର୍ବରୁ ସ୍ଥାନୀୟ ଜନସାଧାରଣଙ୍କ ଅବଗତି ନିମନ୍ତେ ସମ୍ପୃକ୍ତ ପଞ୍ଚାୟତ କାର୍ଯ୍ୟାଳୟରେ ମହାକାଳପଡ଼ା ତହସିଲ କାର୍ଯ୍ୟାଳୟ ପକ୍ଷରୁ ନୋଟିସ୍ ଜାରି କରାଯାଇଥିଲା ବୋଲି କୁହାଯାଇଛି। ଏ ସମ୍ପର୍କରେ ଗହୀରମଥା ରେଞ୍ଜ ଅଧିକାରୀ ବିଚିତ୍ରାନନ୍ଦ ବେହେରାଙ୍କୁ ପଚାରିବାରେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ନିର୍ଦ୍ଦେଶ ଓ ଆଇନ ଅନୁସାରେ ଜଙ୍ଗଲ ପାଶର୍ବ ଗ୍ରାମଗୁଡ଼ିକରେ ପିଲାର ଚିହ୍ନଟ କରାଯାଇଛି। ଏଥିରେ କୌଣସି ଆଶଙ୍କା କରାଯିବା ଉଚିତ ନୁହେଁ ବୋଲି ସେ କହିଛନ୍ତି।
