ଧାମନଗର,୬।୩: ଭଦ୍ରକ ଜିଲା ଧାମନଗର ସେବା ସମବାୟ ସମିତି ଅଧୀନରେ ଥିବା ଚାଷୀମାନେ ଧାନ ବିକ୍ରି କରି ନ ପାରି ହତାଶ ହୋଇପଡ଼ିଛନ୍ତି। ଟୋକନ ଅବଧି ଶେଷ ହେବା ସହ ଟାର୍ଗେଟ୍ ଅଭାବରୁ ଚାଷୀ ଅମଳ କରିଥିବା ଧାନ ସମିତିକୁ ବିକ୍ରି କରିପାରୁ ନାହାନ୍ତି। ଫଳରେ ଶହ ଶହ ଧାନ ବସ୍ତା ସମିତି ଆଗରେ ମାସେ ହେଲା ପଡ଼ି ରହିଛି। ଏପରିକି ବହୁ ଚାଷୀ ବାଧ୍ୟହୋଇ କମ୍ ଦାମ୍ରେ ବେପାରୀଙ୍କୁ ବିକ୍ରି କରୁଛନ୍ତି। ଶୁକ୍ରବାର ଅପରାହ୍ନରେ ଉକ୍ତ ସମିତିକୁ ଗୋଡାଉନ ଯାଞ୍ଚ କରିବା ଲାଗି ଧାମନଗର ଯୋଗାଣ ଅଧିକାରୀ ଆନିମେଶ ସାହୁ, ଜିଲା ସମ୍ପ୍ରସାରଣ ଅଧିକାରୀ ମୃତ୍ୟୁଞ୍ଜୟ ପଣ୍ଡା ଓ ବ୍ଲକ ମିଶନ ଶକ୍ତି ପ୍ରକଳ୍ପ ସଂଯୋଜକ ସନ୍ଦିପ୍ତା ଦାଶ ଯାଇଥିଲେ। ସମିତି ଆଗରେ ପଡ଼ି ରହିଥିବା ଧାନ କିପରି ବିକ୍ରି ହେବ ତାହାର ବ୍ୟବସ୍ଥା କରା ନ ଯିବା ନେଇ ଚାଷୀମାନେ ଅସନ୍ତୋଷ ପ୍ରକାଶ କରିଥିଲେ। ଏ ସମ୍ପର୍କରେ ସମିତି ସମ୍ପାଦକ ବସନ୍ତରାଜ ସାହୁ କହିଛନ୍ତି, ଏକ ମାସ ହେଲା ଟାର୍ଗେଟ ଆସିନାହିଁ। ଯେତିକି ଆସୁଛି ସମସ୍ତ ଚାଷୀଙ୍କ ଟୋକନ ଅନୁଯାୟୀ ଧାନ କିଣା ଯାଇପାରୁ ନାହିଁ ଏବଂ ଟାର୍ଗେଟ ଅଭାବରୁ କେତେଜଣ ଚାଷୀଙ୍କ ଟୋକନ ଲାପ୍ସ ହେଇଯାଇଛି। ଆଗକୁ ଟାର୍ଗେଟ ଆସିଲେ ସମସ୍ତ ଚାଷୀଙ୍କ ଧାନ କିଣାଯିବ।
