ପାରଳାଖେମୁଣ୍ଡି,୧୦ା୨(ଡି.ଏନ୍.ଏ.): ପାରଳାଖେମୁଣ୍ଡି ସହର ଉପକଣ୍ଠ ତଥା ଗୋଷାଣି ବ୍ଲକ ଅନ୍ତର୍ଗତ କେରାଣ୍ଡି ଗ୍ରାମକୁ ପକ୍କା ରାସ୍ତା ନାହିଁ। ରାମସାଗର ଛକ ଦେଇ ଉକ୍ତ ଗ୍ରାମକୁ ଯାଇଥିବା ପକ୍କା ରାସ୍ତାଟି ଖାଲଖମାରେ ଭର୍ତ୍ତି ହୋଇଛି। ଅନ୍ୟପକ୍ଷରେ ପାରଳା ସହର ବୃନ୍ଦାବନ ପ୍ୟାଲେସ ନିକଟ ଦେଇ ଯାଇଥିବା ରାସ୍ତାଟି ଆଜି ଯାଏ ପକ୍କା ହୋଇପାରିନି। ଗ୍ରାମବାସୀ ଏହି ରାସ୍ତା ନିର୍ମାଣ ପାଇଁ ଗ୍ରାମ୍ୟ ଉନ୍ନୟନ ବିଭାଗକୁ ବାରମ୍ବାର ଅନୁରୋଧ କରିଥିଲେ ମଧ୍ୟ ସୁଫଳ ମିଳୁନାହିଁ । କେରାଣ୍ଡି ଗ୍ରାମଟି ପାରଳା ସହର ଉପକଣ୍ଠରେ ରହିଥିଲେ ମଧ୍ୟ ପ୍ରଶାସନିକ କିମ୍ବା ଗ୍ରାମ୍ୟ ଉନ୍ନୟନ ବିଭାଗର ଦୃଷ୍ଟି ଆଢୁଆଳରେ ରହିଯାଇଛି ବୋଲି ଗ୍ରାମବାସୀ କହିଛନ୍ତି। ଉଭୟ ନୂଆକେରଣ୍ଡି ଓ ପୁରୁଣା କେରାଣ୍ଡିର ଗ୍ରାମର ପ୍ରାୟ ୧ହଜାର ଲୋକ ମୁଖ୍ୟତଃ ରାମସାଗର ଛକ ରାସ୍ତା ଦେଇ ପାରଳା ଯାତାୟତ କରୁଛନ୍ତି, ଯାହାକି ବୃନ୍ଦାବନ ପ୍ୟାଲେସ ମାଟି ରାସ୍ତା ଅପେକ୍ଷା ପ୍ରାୟ ୨କି.ମି. ଅଧିକା ପଡୁଛି । ବୃନ୍ଦାବନ ପ୍ୟାଲେସ ରାସ୍ତା ଦେଇ ଗଲେ ସିଧା ପାରଳା ସହର ମଧ୍ୟରେ ପହଞ୍ଚି ହେଉଥିଲେ ମଧ୍ୟ ତାହା ପକ୍କା ହୋଇ ନ ଥିବାରୁ ଧୂଳିଧୂସର ଓ ବର୍ଷା ଦିନେ କର୍ଦ୍ଦମାକ୍ତ ହୋଇପଡୁଛି। ଫଳରେ ଯାତାୟତରେ ବିଭିନ୍ନ ସମସ୍ୟା ଉପୁଜୁଥିବା ଗ୍ରାମବାସୀ କହିଛନ୍ତି। ଅନ୍ୟପକ୍ଷରେ ଜିଲା ସଦର ମହକୁମା ପାରଳାଖେମୁଣ୍ଡି ସହରକୁ ଲାଗି ଥିବା ଏହି ଗ୍ରାମକୁ ଆଜିଯାଏଁ ପକ୍କାରାସ୍ତାଟିଏ ହୋଇପାରିନାହିଁ । ଭବିଷ୍ୟତରେ ପାରଳା ପୌରପରିଷଦ ସଂପ୍ରସାରଣ ହେଲେ କେରାଣ୍ଡି ଗ୍ରାମ ମଧ୍ୟ ସାମିଲ ହେବ । ଏଭଳି ସ୍ଥିତିରେ ଗାଁକୁ ପକ୍କା ରାସ୍ତାଟିଏ ନଥିବାରୁ ସାଧାରଣରେ ବିଭିନ୍ନ ଆଲୋଚନା ହେଉଛି ।
