ଢେଙ୍କାନାଳ ଅଫିସ, ୧୯।୧: ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ୨୦୨୨ ନଭେମ୍ବର ୨୨ରେ ବିଶ୍ୱପ୍ରସିଦ୍ଧ ମହିମା ଗାଦିରେ ବିବାଦୀୟ ଉପାସନାସ୍ଥଳୀ ଉଚ୍ଛେଦ କରାଯାଇଥିଲା। ଏହାପରଠାରୁ କୌପୀନଧାରୀ ଏବଂ ବଳ୍କଳଧାରୀ ଗୋଷ୍ଠୀ ମଧ୍ୟରେ ନୂତନ ଉପାସନାସ୍ଥଳୀକୁ ନେଇ ଆରମ୍ଭ ହୋଇଥିବା ଜାଗା ବିବାଦର ଅନ୍ତ ହେଉନାହିଁ। କୌପୀନଧାରୀ ମହିମା ସମାଜକୁ ନୂତନ ଜାଗା ପ୍ରଦାନ କରିବାକୁ ବିପକ୍ଷ ଗୋଷ୍ଠୀ ସହମତି ପ୍ରଦାନ କରୁ ନ ଥିବାରୁ ଅଡୁଆ ବଢ଼ିବାରେ ଲାଗିଛି।
ଉଚ୍ଛେଦ ପରେ କୌପୀନଧାରୀ ମହିମା ସାଧୁସନ୍ଥମାନେ ଉପାସନା ପାଇଁ ଅଡୁଆରେ ପଡ଼ିଛନ୍ତି। ସେମାନଙ୍କୁ ନୂଆ ଜାଗା ପ୍ରଦାନ କରିବା ଲାଗି ଏକାଧିକଥର ବୈଠକ ବସିଥିଲେ ମଧ୍ୟ ସୁଫଳ ମିଳିପାରୁନାହିଁ। ବୁଧବାର ଅପରାହ୍ନରେ ଯୋରନ୍ଦାରେ ଜିଲାପାଳ ସରୋଜ କୁମାର ସେଠୀ, ବିଧାୟକ ସୁଧୀର କୁମାର ସାମଲ, ଉଭୟ ଗୋଷ୍ଠୀର ସାଧୁସନ୍ଥ ଏବଂ ପ୍ରଶାସନିକ ଅଧିକାରୀଙ୍କୁ ନେଇ ବୈଠକ ଅନୁଷ୍ଠିତ ହୋଇଥିଲା। କୌପୀନଧାରୀ ମହିମା ସମାଜକୁ ଗାଦିମନ୍ଦିର ନିକଟ ଦଲକଠାରେ ଜାଗା ପ୍ରଦାନ ନିମନ୍ତେ ନିଷ୍ପତ୍ତି ନିଆଯାଇଥିଲା। ଏହାପରେ ସମସ୍ତେ ଫେବୃୟାରୀ ୪ରେ ହେବାକୁ ଥିବା ମାଘମେଳା ଶାନ୍ତିଶୃଙ୍ଖଳାର ସହ ସମାପନ କରିବା ଲାଗି ସହମତି ଜଣାଇଥିଲେ। ଏଥିଲାଗି ଉଭୟ ଗୋଷ୍ଠୀର ସାଧୁସନ୍ନ୍ୟାସୀ ଜିଲାପାଳ, ବିଧାୟକଙ୍କୁ ସାଧୁବାଦ ଜଣାଇଥିଲେ। ତେବେ ବୈଠକ ପରେ ପ୍ରସ୍ତାବିତ ଜାଗା ଦେଖିବାକୁ ଯାଇଥିବା ବେଳେ ବଳ୍କଳଧାରୀ ଗୋଷ୍ଠୀ ଜାଗା ପ୍ରଦାନ ନିଷ୍ପତ୍ତିରେ ରାଜି ନ ହୋଇ ପଳାଇଥିଲେ। ବାରମ୍ବାର ବୁଝାଇବା ସତ୍ତ୍ୱେ ସେମାନେ ଆଲୋଚନାକୁ ଫେରି ନ ଥିଲେ। ତେଣୁ ଗୁରୁବାର ପୁଣିଥରେ ଜାଗା ଚିହ୍ନଟ ପାଇଁ ନିଷ୍ପତ୍ତି ହୋଇଛି।
ଏ ସଂକ୍ରାନ୍ତରେ ବିଧାୟକ ସାମଲ କୁହନ୍ତି, ମହିମା ଗୋସାଇଁଙ୍କ ପୀଠ ଉପରେ ଲକ୍ଷାଧିକ ଶ୍ରଦ୍ଧାଳୁଙ୍କ ବିଶ୍ୱାସ ରହିଛି। ଏହା ଯେପରି ବଦନାମ ନ ହେବ ସେଥିଲାଗି ସମସ୍ତେ ଧ୍ୟାନ ଦେବା ଉଚିତ। ଜିଲାପାଳ ସେଠୀ କୁହନ୍ତି, ବିବାଦର ସମାଧାନ ନିଶ୍ଚିତ କରାଯିବ। ଦଲକଠାରେ ପ୍ରସ୍ତାବିତ ଜାଗାକୁ କୌପୀନଧାରୀ ମହିମା ସମାଜକୁ ପ୍ରଦାନ କରାଯିବ। ସେଠାରେ ଉପାସନା ବ୍ୟବସ୍ଥା ମଧ୍ୟ ହେବ। ଆଗକୁ ମାଘମେଳା ଆସୁଛି। ଉଭୟ ଗୋଷ୍ଠୀ ଭାଇଚାରା ବଜାୟ ରଖି ଏହାର ଆୟୋଜନ କରିବାକୁ ସେ ନିବେଦନ କରିଛନ୍ତି।
ବୈଠକରେ ଏସ୍ପି ଜ୍ଞାନରଞ୍ଜନ ମହାପାତ୍ର, ଜିଲା ବନଖଣ୍ଡ ଅଧିକାରୀ ଡ. ପ୍ରକାଶ ଚାନ୍ଦ ଗୋଗିନେନି, ଉପଜିଲାପାଳ ସ୍ନିଗ୍ଧାରାଣୀ ଧଳ, ବିଡିଓ ଆଶିଷ ରଞ୍ଜନ ସାହୁ, ବଳ୍କଳଧାରୀ ମହିମା ସମାଜର ବରିଷ୍ଠ ସନ୍ନ୍ୟାସୀ ନିତ୍ୟାନନ୍ଦ ବାବା, କୌପୀନଧାରୀ ମହିମା ସମାଜ ସଭାପତି ରଘୁନାଥ ବାବା ପ୍ରମୁଖ ଉପସ୍ଥିତ ଥିଲେ। ଏଥିପୂର୍ବରୁ ବୁଧବାର ଜିଲା କାର୍ଯ୍ୟାଳୟରେ ଜିଲାପାଳଙ୍କ ଅଧ୍ୟକ୍ଷତାରେ ଉଭୟ ଗୋଷ୍ଠୀର ସାଧୁସନ୍ଥଙ୍କୁ ନେଇ ବୈଠକ ବସିଥିଲା। ହେଲେ କୌଣସି ନିଷ୍କର୍ଷ ନ ବାହାରିବାରୁ ଯୋରନ୍ଦାଠାରେ ପୁଣି ବୈଠକ ଅନୁଷ୍ଠିତ ହୋଇଥିଲା।
