ଯାଜପୁର ଅଫିସ,୧୯ା୧: ପୌରାଣିକ କିମ୍ବଦନ୍ତୀ ବହନ କରୁଥିବା ବ୍ୟାସ ସରୋବର ମେଳା ନିର୍ଦ୍ଧାରିତ ତିଥି ତଥା ଫେବୃୟାରୀ ୧ରେ ପାଳନ କରାଯିବ। ତେବେ ସେହି ପବିତ୍ର ପୀଠ ବଦଳରେ ବ୍ୟକ୍ତିଗତ ଜମିରେ ଏହି ପ୍ରସିଦ୍ଧ ମେଳା ଆୟୋଜନ କରିବାକୁ ପ୍ରଶାସନିକସ୍ତରରେ ନିଷ୍ପତ୍ତି ହୋଇଛି। ବ୍ୟାସ ସରୋବର ସୌନ୍ଦର୍ଯ୍ୟକରଣ କାମରେ ଏନ୍ଜିଟି(ନ୍ୟାଶନାଲ ଗ୍ରୀନ ଟ୍ରିବ୍ୟୁନାଲ) ମାମଲା ରହିଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଥିବା କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ କୁମାର ମିଶ୍ର ସୂଚନା ଦେଇଛନ୍ତି।
ବୁଧବାର କଳିଙ୍ଗନଗର ଅତିରିକ୍ତ ଜିଲାପାଳ, ପୌର ପରିଷଦ ଅଧ୍ୟକ୍ଷା ସଙ୍ଗୀତା ପିଙ୍ଗୁଆ, କାର୍ଯ୍ୟନିର୍ବାହୀ ଅଧିକାରୀ ବିକ୍ରମ ମଲ୍ଲିକ, ଥାନାଧିକାରୀ ଉପେନ୍ଦ୍ର କୁମାର ପ୍ରଧାନ ଏବଂ ପାରିଷଦମାନେ ପ୍ରସ୍ତାବିତ ସ୍ଥାନ ପରିଦର୍ଶନ କରିଥିଲେ। ସମୟ କମ୍ ଥିବାରୁ ଯୁଦ୍ଧକାଳୀନ ଭିତ୍ତିରେ ଆବଶ୍ୟକ ପଦକ୍ଷେପ ଗ୍ରହଣ କରାଯାଇ ମେଳାର ଆୟୋଜନ କରିବାକୁ କଳିଙ୍ଗନଗର ଅତିରିକ୍ତ ଜିଲାପାଳ ପରାମର୍ଶ ଦେଇଥିଲେ। ପୂର୍ବରୁ ଜିଲାପାଳଙ୍କ ବ୍ୟାସ ସରୋବର ମେଳା ଉପରେ ନକାରାମତ୍କ ମତାମତକୁ ନେଇ ସହରବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ଏନେଇ ଧରିତ୍ରୀରେ ପ୍ରଥମେ ୪ା୨ା୨୦୨୩ରେ ବ୍ୟାସ ସରୋବର ମେଳାକୁ ନେଇ ଚିନ୍ତା ଶୀର୍ଷକ ଖବର ପ୍ରକାଶ ପାଇଥିଲା। ଏହାପରେ ବ୍ୟାସନଗର ମିଳିତ ମଞ୍ଚ ପକ୍ଷରୁ ଆନ୍ଦୋଳନ ପାଇଁ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା। ଏହାବାଦ୍ ମିଳିତ କ୍ରିୟାନୁଷ୍ଠାନ କମିଟି ପକ୍ଷରୁ ଗୋପବନ୍ଧୁ ଛକଠାରେ ଏକ ପ୍ରତିବାଦ ସଭା ଅନୁଷ୍ଠିତ ହୋଇଥିଲା। ଏହାପରେ ପ୍ରଶାସନ ମୁଣ୍ଡ ନୁଆଁଇ ମେଳାର ଆୟୋଜନ ପାଇଁ ନିଷ୍ପତ୍ତି ନିଆଯାଇଥିବା ମତପ୍ରକାଶ ପାଇଛି। ବ୍ୟାସ ସରୋବର ମେଳା ସହ ଅଞ୍ଚଳବାସୀଙ୍କ ଭାବାବେଗ ରହିଛି। ସେଥିପାଇଁ ବହୁ ପରିଦର୍ଶକ, ପର୍ଯ୍ୟଟକ ଏହାକୁ ଲପଲବ୍ଧି କରି ଏଠାକୁ ପରିଦର୍ଶନରେ ଆସିଥାନ୍ତି ା ଏଠାରେ ପ୍ରାକୃତିକ ସୌନ୍ଦର୍ଯ୍ୟର ଅପୂର୍ବ ସମ୍ଭାର ରହିଛି ା ପ୍ରାୟ ୩୦୦ ବର୍ଷ ହେବ ବ୍ୟାସ ସରୋବର ସମ୍ମୁଖ ଆମ୍ବ ତୋଟାରେ ମେଳାର ଆୟୋଜନ ହୋଇଆସୁଥିବା ଜନଶ୍ରୁତି ରହିଛି। ସରୋବର ପରିସରରେ ଗୁପ୍ତ ଗଙ୍ଗା ରହିଛି ଓ ଏହାର ଚତୁଃପାର୍ଶ୍ୱରେ ପଞ୍ଚୁ ପାଣ୍ଡବଙ୍କ ସମେତ ଦୁର୍ଯ୍ୟୋଧନ ଓ ଲକ୍ଷ୍ମୀଙ୍କ ପ୍ରତିମା ଶୋଭା ପାଉଛି ା ପ୍ରାଚୀନ କାଳରେ ଏଠାରେ ବୃହତ୍ ସରୋବର ଥିଲା ବୋଲି ଜନଶ୍ରୁତି ରହିଛି ା ଏବେ ତାହା ପୋତି ହୋଇଯାଇଛି ା ସରୋବରର ପଶ୍ଚିମ ପଟକୁ ଆମ୍ବ ବଗିଚା ଓ ଏକ ପାର୍ଶ୍ୱରେ ରାଘବ ଜୀଉଙ୍କ ମନ୍ଦିର ରହିଛି ା ମହାଭାରତର ଶେଷ ଯୁଦ୍ଧ ଏଠାରେ ହୋଇଥିଲା ବୋଲି କିମ୍ବଦନ୍ତୀ ରହିଛି। ଏଭଳିସ୍ଥିତିରେ ସରୋବର ଆମ୍ବତୋଟା ନିକଟରେ ଥିବା ବ୍ୟକ୍ତିଗତ ଜାଗାରେ ମେଳା ଆୟୋଜନ କେତେ ଯୁକ୍ତିଯୁକ୍ତ ହେବ ବୋଲି ସହରରେ ଚର୍ଚ୍ଚା ହେଉଛି।
ବରିଷ୍ଠ ଆଇନଜୀବୀ ଚନ୍ଦ୍ରଶେଖର ପଣ୍ଡାଙ୍କ କହିବା ଅନୁସାରେ ଏନଜିଟି ମାମଲା ୪୦, ୫୨, ୬୨ ଓ ୬୪ ପ୍ଲଟ୍ ଉପରେ ରହିଛି। ଜଙ୍ଗଲ ଜମିରେ ସ୍ଥାୟୀ ନିର୍ମାଣ କରିବାକୁ ଏନ୍ଜିଟି ପକ୍ଷରୁ ବାରଣ କରାଯାଇଛି। ମେଳା ମହୋତ୍ସବ ବିରୋଧରେ କୌଣସି ରହିତାଦେଶ ନାହିଁ। ପ୍ଲଟ୍ ନମ୍ବର ୫୩(ଏ)ରେ ୦.୩୬ ଡିସିମିଲ, ପ୍ଲଟ୍ ନମ୍ବର ୫୫(ଏ)ରେ ୨.୧୯ ଡିସିମିଲ ପୁରାତନ ପତିତ, ପ୍ଲଟ୍ନମ୍ବର ୫୬(ଏ)ରେ ୨.୮୫ ଡେସମିଲ କିସମ ଆମ୍ବ ବଗାୟତ, ପ୍ଲଟ୍ ନମ୍ବର ୫୭(ଏ)ରେ ୦.୦୪ ଡେସମିଲ ମଠଘର, ପ୍ଲଟ୍ ନମ୍ବର ୫୮(ଏ)ରେ ୧.୧୨ ଡେସମିଲ ସର୍ବସାଧାରଣ ରାସ୍ତା ଏବଂ ପ୍ଲଟ୍ ନମ୍ବର ୫୯(ଏ)ରେ ୧.୬୦ ମେଲଣ ପଡିଆ ଭାବେ ରେକର୍ଡ ରହିଛି। ଏସବୁ ପ୍ଲଟ୍ ଜଙ୍ଗଲ କିସମ ନୁହେଁ । ଉପରୋକ୍ତ ଜମି ଉପରେ ମେଳା ପାଇଁ ଅନୁମତି ଦେବାରେ କୌଣସି ଅସୁବିଧା ନାହିଁ। ତେବେ ମେଳା ଜାଗାରେ ବ୍ୟାସସରୋବର ସୌନ୍ଦର୍ଯ୍ୟକରଣ କାମରେ ନିୟୋଜିତ ଶ୍ରମିକମାନେ କୁଡିଆ ଘର କରି ରହୁଛନ୍ତି ଏବଂ ଗୋଡ଼ି, ବାଲି ଇତ୍ୟାଦି ନିର୍ମାଣ ସାମଗ୍ରୀ ଜମା କରାଯାଇଛି । ବିଭିନ୍ନ ଆଳରେ ପ୍ରଶାସନ ଖସିଯିବାକୁ ଚାହୁଁଛି। ଏପରି ଭାବେ ବ୍ୟାସ ସରୋବର ଜମିରେ ମେଳାର ଆୟୋଜନ ନ କରି ପ୍ରଶାସନ ଲୋକଙ୍କ ଭାବାବେଗ ସହିତ ଖେଳ ଖେଳୁଛି ବୋଲି ସେ କହିଛନ୍ତି।
