କେସିଙ୍ଗା,୨୦।୨(ଡି.ଏନ.ଏ.): ରାଜ୍ୟ ମହିଳା ଓ ଶିଶୁ ବିକାଶ ଯୋଜନା ପକ୍ଷରୁ ଶିଶୁ, ଗର୍ଭବତୀ ଓ ପ୍ରସୂତି ମହିଳାଙ୍କୁ ମାଗଣାରେ ପୃଷ୍ଟିକର ଛତୁଆ ଅଙ୍ଗନଓ୍ବାଡି କେନ୍ଦ୍ର ଜରିଆରେ ଯୋଗାଇ ଦିଆଯାଉଛି। ଛତୁଆ ବିକ୍ରୟ ପାଇଁ ଉଦ୍ଦିଷ୍ଟ ନୁହେଁ ବୋଲି ପ୍ୟାକେଟରେ ଲେଖାଯାଇଛି। କିନ୍ତୁ କଳାହାଣ୍ଡି ଜିଲା କେସିଙ୍ଗା ବ୍ଲକ ସମନ୍ବିତ ଶିଶୁ ବିକାଶ ଯୋଜନା ଅଧୀନ ପରଲସିଙ୍ଗ ପଞ୍ଚାୟତରେ ଦିନ ଦ୍ୱିପ୍ରହରରେ ଛତୁଆକୁ ବିକ୍ରି କରାଯାଉଥିବା ଦେଖିବାକୁ ମିଳିଛି। ଜଣେ ଛତୁଆ ବ୍ୟବସାୟୀ ଏକ ଗାଡ଼ିରେ ବୁଲି ବୁଲି ଛତୁଆ କିଣୁଛନ୍ତି। ଛତୁଆ ବ୍ୟବସାୟୀମାନେ ବ୍ଲକର ୨୬ଟି ଗ୍ରାମପଞ୍ଚାୟତ ଅଧିକାଂଶ ଗ୍ରାମକୁ ଯାଇ କିଣୁଥିବା ବେଳେ ୪.୪୧୦ ଗ୍ରାମର ଛତୁଆ ପ୍ୟାକେଟ ୫୦ ଟଙ୍କାରେ ହିତାଧିକାରୀମାନେ ବିକ୍ରୟ କରୁଥିବା ଅଭିଯୋଗ ହେଉଛି। ବିକ୍ରୟ ପାଇଁ ଉଦ୍ଦିଷ୍ଟ ନୁହେଁ ବୋଲି ପ୍ୟାକେଟରେ ଲେଖା ଯାଇଛି। ମାର୍କେଟରେ ଛତୁଆ ଯଦି କିଣିଲେ କିଲୋ ପ୍ରତି ୬୦ରୁ ୭୦ ଟଙ୍କାରେ ମିଳୁଛି। କେସିଙ୍ଗା ବ୍ଲକ ସିରଜାପାଲିସ୍ଥିତ ଦିବ୍ୟଜ୍ୟୋତି ମହିଳା ମଣ୍ଡଳ ଦୀର୍ଘଦିନରୁ ନିମ୍ନମାନର ଛତୁଆ ପ୍ରସ୍ତୁତ କରି ଅଙ୍ଗନଓ୍ବାଡି କେନ୍ଦ୍ରକୁ ଯୋଗାଇ ଆସୁଛି। କିଛି ମାସ ତଳେ ଜିଲାର ଏକ ୫ ଜଣିଆ ଟିମ ଦିବ୍ୟଜ୍ୟୋତି ମହିଳା ମଣ୍ଡଳ ପରିଦର୍ଶନ କରି ମଣ୍ଡଳ ସଭାନେତ୍ରୀ ଗୀତାଞ୍ଜଳି ଦାଶଙ୍କୁ ଛତୁଆ ଠିକ ଭାବେ ପ୍ରସ୍ତୁତ କରି ଯୋଗାଇବାକୁ ଜିଲା ପ୍ରଶାସନ ପକ୍ଷରୁ ଚେତାବନୀ ଦିଆଯାଇଥିଲା। କିନ୍ତୁ ପ୍ରଶାସନ କଥାକୁ କିଏ ପଚାରୁଛି। ଛତୁଆ ଅତିନିମ୍ନମାନର ହୋଇଥିବାରୁ ମଣିଷ ଖାଇବା ବଦଳରେ ପଶୁମାନଙ୍କ ଖାଇବା ଉଦ୍ଦେଶ୍ୟରେ ଏହା ବିକ୍ରି କରାଯାଉଛି। ଗୋଟା ବୁଟ, ଚିନି, ଚିନାବାଦାମର ମିଶ୍ରଣରେ ପ୍ରସ୍ତୁତ କରିବା କଥା। କିନ୍ତୁ କମ୍ ଗହମ ଓ ଅଳ୍ପ ଚିନି ମିଶାଇ ପ୍ରସ୍ତୁତ କରି ଯୋଗାଇ ଦିଆଯାଉଛି। ଶିଶୁ, ଗର୍ଭବତୀ ଓ ପ୍ରସୂତି ମହିଳାଙ୍କୁ ମାଗଣାରେ ମିଳୁଥିବା ୪.୪୧୦୦ ଗ୍ରାମର ହଳଦିଆ ଛତୁଆକୁ ମାତ୍ର ୫୦ ଟଙ୍କାରେ ବିକ୍ରି କରିଦିଅନ୍ତି। ଛତୁଆ ବ୍ୟବସାୟୀମାନେ ଗାଁ ଗାଁ ଘରକୁ ଘର ଯାଇ କିଣୁଥିବା ଦେଖିବାକୁ ମିଳୁଛି। ଏ ନେଇ ସିଡିପିଓ ମୁଯିବୁନ ନିଶାଙ୍କୁ ପଚାରିବାରୁ ଲୋକଙ୍କୁ ଖାଇବାକୁ ଦିଆଯାଉଛି, ଆଉ ବିକ୍ରି କରିବେ ସେଥି ପାଇଁ କ’ଣ କରାଯିବ। ଛତୁଆ ତ ଖାଇଲେ ସିନା ଜାଣିବେ ଭଲ କି ଖରାପ ବୋଲି ପ୍ରକାଶ କରିବା ସହିତ ସୋମବାର ସୁପରଭାଇଜର ଘଟଣାସ୍ଥଳରେ ଯାଇ ତଦନ୍ତ କରିବେ ବୋଲି ପ୍ରକାଶ କରିଥିଲେ।
