ଗଞ୍ଜାମରେ ଟ୍ରମାକେୟାର ସେଣ୍ଟର ଅଭାବ
12:17 pmNovember 14, 2022November 14, 2022 / 05

ଛତ୍ରପୁର,୧୩ା୧୧(ଡି.ଏନ୍‌.ଏ.): ଗଞ୍ଜାମ ଜିଲାରେ ଦିନକୁ ଦିନ ସଡ଼କ ଦୁର୍ଘଟଣା ବଢ଼ୁଥିବା ବେଳେ ସେଥିରେ ମୃତକଙ୍କ ସଂଖ୍ୟା ମଧ୍ୟ ବଢିବାରେ ଲାଗିଛି। ରାଜ୍ୟରେ ସର୍ବାଧିକ ଦୁର୍ଘଟଣାଜନିତ ମୃତ୍ୟୁ ଗଞ୍ଜାମ ଜିଲାରେ ରହିଛି। ସଡକ ସୁରକ୍ଷା ନେଇ ସୁପ୍ରିମକୋର୍ଟ କମିଟିଙ୍କ ନିର୍ଦ୍ଦେଶ ଅନୁସାରେ ଜିଲାରେ ସଡକ ସୁରକ୍ଷା କମିଟି ଗଠନ ହୋଇ ବୈଠକ ବସୁଛି। ମାତ୍ର ବୈଠକରେ ହେଉଥିବା ସର୍ବସମ୍ମତି ନିଷ୍ପତ୍ତିି ଓ ନିର୍ଦ୍ଦେଶ କାର୍ଯ୍ୟକାରୀ ହେଉ ନ ଥିବା ଜଣାପଡିଛି। ଅନ୍ୟପକ୍ଷରେ ୨୦୧୯ ରେ ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟଙ୍କ ନିର୍ଦ୍ଦେଶ ଅନୁସାରେ ଗଞ୍ଜାମ ଜିଲାରେ ସଂସଦୀୟ ସଡକ ସୁରକ୍ଷା କମିଟି ଗଠିତ ହୋଇଛି। ହେଲେ ବର୍ଷକରେ ଥରେ ମାତ୍ର ଏହାର ବୈଠକ ବସିଛି। ସବୁ ନିଷ୍ପତ୍ତି ସରକାର ଓ ଜାତୀୟ ରାଜପଥ କର୍ତ୍ତ୍‌ୃପକ୍ଷଙ୍କୁ ଜଣାଇବାକୁ ଉକ୍ତ ବୈଠକରେ ସର୍ବସମ୍ମତି ନିଷ୍ପତି ନିଆଯାଇଥିଲା। ମାତ୍ର ତାହା ମଧ୍ୟ କାର୍ଯ୍ୟକାରୀ ହୋଇନି। ଫଳରେ ଜିଲା ସଡକ ସୁରକ୍ଷା କମିଟି ଏବଂ ସଂସଦୀୟ ସଡକ ସୁରକ୍ଷା କମିଟି ବୈଠକର ଆଲୋଚନା ଫଳପ୍ରଦ ହେଉନାହିଁ। ସଡକ ଦୁର୍ଘଟଣାରେ ଆହତମାନଙ୍କ ଚିକିତ୍ସା ପ୍ରଥମ କାର୍ଯ୍ୟ ବୋଲି ସୁପ୍ରିମକୋର୍ଟ କମିଟି ଦର୍ଶାଇଛନ୍ତି। ହେଲେ ଜିଲାରେ ଟ୍ରମା କେୟାର ସେଣ୍ଟର ଅଭାବ ରହିଛି। ସରକାରୀ ହସ୍ପିଟାଲଗୁଡିକରେ ଟ୍ରମା କେୟାର ସେଣ୍ଟର ଅପଗ୍ରେଡେସନ ଜରୁରୀ ହୋଇପଡିଛି। ଜିଲାରେ ଗୋଟିଏ ମାତ୍ର ବ୍ରହ୍ମପୁରସ୍ଥିତ ଏମକେସିଜି ମେଡିକାଲ କଲେଜ ଓ ହସ୍ପିଟାଲରେ ଟ୍ରମା କେୟାର ସେଣ୍ଟର ରହିଛି। ତେବେ ଏହି ସେଣ୍ଟର ଛୋଟ ଓ ଏହାର ଅପଗ୍ରେଡ୍‌ ଆବଶ୍ୟକ ପଡ଼ୁଛି। ଗଞ୍ଜାମ ଜିଲା ଦେଇ ଜାତୀୟ ରାଜପଥ ଯାଇଥିବାରୁ ଦୈନିକ ଛୋଟବଡ ଦୁର୍ଘଟଣା ଘଟୁଛି। ଦୁର୍ଘଟଣାରେ ଗୁରୁତର ଆହତମାନଙ୍କ ତୁରନ୍ତ ଓ ଠିକ୍‌ ଚିକିତ୍ସା ଆବଶ୍ୟକ ପଡୁଥିବାରୁ ଜିଲାରେ ଅଧିକ ଟ୍ରମାକେୟାର ସେଣ୍ଟର ଆବଶ୍ୟକ ପଡୁଛି। ଜିଲାର ବିଭିନ୍ନ ପ୍ରମୁଖ ସ୍ଥାନରେ ଆହୁରି ଟ୍ରମା କେୟାର ସେଣ୍ଟର ସ୍ଥାପନ କରିବା ଜରୁରୀ ବୋଲି ସୁପ୍ରିମକୋର୍ଟ କମିଟି ମଧ୍ୟ କହିଛନ୍ତି। ଏଣୁ ଏହାର କାର୍ଯ୍ୟକାରୀ ହେବା କଥା। ସଂସଦୀୟ ସଡକ ସୁରକ୍ଷା କମିଟି ବୈଠକରେ ଏହା ଉପରେ ଆଲୋଚନା ହୋଇ ଜିଲାର ବିଭିନ୍ନ ସ୍ଥାନରେ ଟ୍ରମା କେୟାର ସେଣ୍ଟର ସ୍ଥାପନ ଲାଗି ଏକ ସର୍ବସମ୍ମତି ପ୍ରସ୍ତାବ ରାଜ୍ୟ ସରକାରଙ୍କୁ ମଧ୍ୟ ପଠାଯାଇଛି। ସୂଚନାଯୋଗ୍ୟ, ରାଜ୍ୟର କେତେକ ଜିଲାରେ ଟ୍ରମା କେୟାର ସେଣ୍ଟର ସ୍ଥାପନ ପାଇଁ ରାଜ୍ୟ ସରକାର କିଛି ଦିନ ପୂର୍ବେ ନିଷ୍ପତ୍ତି ନେଇଛନ୍ତି। ମାତ୍ର ଗଞ୍ଜାମ ପାଇଁ ସେଥିରେ କିଛି ନ ଥିବା ଜଣାପଡିଛି।