ଦାରିଙ୍ଗବାଡ଼ି,୧୨ା୧୧ (ଅରୁଣ ସାହୁ)ଦାରିଙ୍ଗବାଡ଼ି ଅଞ୍ଚଳରେ ମାଣ୍ଡିଆ ଚାଷ ପ୍ରତି ଆଗ୍ରହ ବୃଦ୍ଧି ପାଇଛି। ଅନୁସୂଚିତ ଜନଜାତି ସମ୍ପ୍ରଦାୟର ଲୋକ ଅତୀତରେ ପାରମ୍ପରିକ ଖାଦ୍ୟ ବିଶେଷକରି ମାଣ୍ଡିଆ, କୁଏରୀ, କାଙ୍ଗୁ, ଯଅକୁ ଅଧିକା ପରିମାଣରେ ଚାଷ କରିବା ସହ ଖାଦ୍ୟ ଭାବେ ଖାଉଥିଲେ। ଏଥିପାଇଁ କୌଣସି ମାରାତ୍ମକ ରୋଗର ଶିକାର ହେଉନଥିଲେ। ପର୍ଯ୍ୟାୟକ୍ରମେ ଏହି ଚାଷ ଲୋପ ପାଇବାରୁ ଲୋକଙ୍କୁ ରକ୍ତଚାପ ସହ ଡାଇବେଟିସ ଓ କ୍ୟାଲସିୟମ ଅଭାବ ଆଦି ବୃଦ୍ଧି ପାଇଲା। ଏବେ ରାଜ୍ୟ ସରକାର ୨୦୧୭-୧୮ ଆର୍ଥିକ ବର୍ଷରେ ରାଜ୍ୟରେ ମିଲେଟ ମିଶନ ଆରମ୍ଭ କରି ଏହି ଚାଷକୁ ପ୍ରୋତ୍ସାହନ ଦେବା ଆରମ୍ଭ କଲେ। ଏହି କ୍ରମରେ ଦାରିଙ୍ଗବାଡ଼ି ବ୍ଲକ ଅଞ୍ଚଳରେ ପ୍ରଥମେ ୩୪୮ ଚାଷୀଙ୍କୁ ନେଇ ୫୦ ହେକ୍ଟର ଜମିରେ ମାଣ୍ଡିଆ ଚାଷର ପୁନରୁଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା। ଚଳିତବର୍ଷ ଏହା ବୃଦ୍ଧି ପାଇ ୧୯୩୯ ଚାଷୀଙ୍କୁ ନେଇ ୬୯୫ ହେକ୍ଟର ଜମିରେ ମାଣ୍ଡିଆ ଚାଷ ସମେତ ୩୦୫ ହେକ୍ଟର ଜମିରେ କାଙ୍ଗୁ, କୁଏରୀ, ଯଅ ଆଦି କରାଯାଉଛି। ଏବେ ଏହି ଚାଷ କରିବାକୁ ଉକ୍ତ ବ୍ଲକର ୨୫ ପଞ୍ଚାୟତର ଚାଷୀ ଆଗ୍ରହ ପ୍ରକାଶ କରୁଥିବା ବେଳେ ମାଣ୍ଡିଆର ସର୍ବନିମ୍ନ ଦରକୁ ରାଜ୍ୟ ସରକାର ଧାର୍ଯ୍ୟ କରିଥିବାରୁ ଚାଷୀଙ୍କ ମଧ୍ୟରେ ଅଧିକା ଆଗ୍ରହ ଦେଖାଯାଉଛି। ଏହି ଚାଷର ପୁନରୁଦ୍ଧାର ପାଇଁ ରାଜ୍ୟ ସରକାରଙ୍କ ମିଲେଟ ମିଶନ ଯୋଜନାରେ ସରକାରଙ୍କ ସହ ସହଭାଗିତାରେ ଜାଗୃତି ଅନୁଷ୍ଠାନର ସହଯୋଗରେ ପ୍ରଥମେ ପରୀକ୍ଷା୍ମୂଳକ ଭାବେ ୨୦୧୭ରେ ୫ଟି ପଞ୍ଚାୟତରେ ଆରମ୍ଭ କରାଯାଇଥିଲା। ତେବେ ଚଳିତବର୍ଷ ସର୍ବାଧିକ ୪ ହଜାର କୁଇଣ୍ଟାଲ ମାଣ୍ଡିଆ ଅମଳ କରାଯିବ ବୋଲି ଆଶା କରାଯାଉଥିବା ବେଳେ ପାଣିପାଗର ଅନିୟମିତତା ରହିଥିବାରୁ ଅମଳରେ ଟିକେ ବାଧକ ସାଜିପାରେ ବୋଲି ମିଲେଟ ମିଶନର ଦାୟିତ୍ୱରେ ଥିବା ଜାଗୃତିର ସମ୍ପାଦକ କୈଳାସ ଚନ୍ଦ୍ର ଦଣ୍ଡପାଠ କହିଛନ୍ତି। ଏହି କାର୍ଯ୍ୟକୁ ମିଲେଟ୍ ମିଶନର ସଂଯୋଜକ ମହେନ୍ଦ୍ର ପରିଡ଼ା ସମସ୍ତ ପଞ୍ଚାୟତର ଚାଷୀଙ୍କୁ ସହଯୋଗ କରୁଛନ୍ତି। ଚାଷୀ ତିଲମ ପ୍ରଧାନ କହିଛନ୍ତି, ପୂର୍ବରୁ ସେମାନେ ମାଣ୍ଡିଆ ବୁଣିକି ଚାଷ କରୁଥିବାରୁ ଭଲ ଅମଳ ହେଉନଥିଲା। ତେଣୁ ଚାଷ ଛାଡିଦେଇଥିଲେ। ଏବେ ସରକାରଙ୍କ ସହଭାଗିତାରେ ଜାଗୃତିର କର୍ମକର୍ତ୍ତାମାନେ ଧାଡିରେ ରୋଇବା ଶିଖାଇବାରୁ ମାଣ୍ଡିଆ ଚାଷରେ ବହୁତ ଫାଇଦା ପାଇଲୁ। ଏଥିସହ ସର୍ବନିମ୍ନ ଦର ସରକାର କରିବା ସହ ଆମ ପଞ୍ଚାୟତରେ ମଣ୍ଡି ଖୋଲି ତାକୁ କିଣୁଛନ୍ତି। ତେଣୁ ଏହି ଚାଷକୁ ଆମେ ଆଗ୍ରହର ସହ କରୁଛୁ ବୋଲି କହିଛନ୍ତି।
