ରାୟଗଡ଼ା,୧୩ା୩(ସ୍ବ.ପ୍ର.):୧୯୯୨ରେ ରାୟଗଡ଼ା ସ୍ବତନ୍ତ୍ର ଜିଲାର ମାନ୍ୟତା ପାଇଥିଲା। ଏହି ଜିଲାକୁ ଇତିମଧ୍ୟରେ ୩୦ ବର୍ଷ ପୁରିଛି। ହେଲେ ଏବେ ବି ଜିଲାର ବହୁ ଅଞ୍ଚଳକୁ ଗମନାଗମନ ସୁବିଧା ନାହିଁ ା ଜିଲାର ଉପାନ୍ତ ଅଞ୍ଚଳରେ ବିକାଶ କେବଳ କାଗଜ କଲମରେ ସିମୀତ ରହିଛି। ନଦୀ ପାର ହୋଇ ମୁଖ୍ୟ ରାସ୍ତା ସଂଯୋଗ ପଥକୁ ଆସୁଥିବା ଗ୍ରାମବାସୀ ବାରମ୍ବାର ପ୍ରଶାସନକୁ ଗୁହାରି କରିବା ପରେ ବି ପୋଲ ନିର୍ମାଣ ହେଲାନି। ତେଣୁ ଗ୍ରାମବାସୀ ନିଜ ଖର୍ଚ୍ଚରେ କାଠ ପୋଲ ନିର୍ମାଣ କରିଛନ୍ତି। ଜିଲାର କଲ୍ୟାଣସିଂହପୁର ବ୍ଲକରେ ଏଭଳି ଦେଖିବାକୁ ମିଳିଛି ା କଲ୍ୟାଣସିଂହପୁର ବ୍ଲକ ଅନ୍ତର୍ଗତ ତଳସାଜା ଓ ଉପରସାଜା ଗ୍ରାମବାସୀ ନାଗାବଳୀ ନଦୀ ଉପରେ ନିଜସ୍ବ ଜ୍ଞାନକୌଶଳରେ କାଠ ପୋଲ ନିର୍ମାଣ କରିଛନ୍ତି ା ଆଗକୁ ଏଠାରେ ସ୍ଥାୟୀ ପୋଲ ନିର୍ମାଣ କରା ନ ଗଲେ ଭୋଟ ବର୍ଜନ କରିବେ ବୋଲି କହିଛନ୍ତି।
କଲ୍ୟାଣସିଂହପୁର ବ୍ଲକ ନାଗାବଳୀ ନଦୀ ଅପରପାର୍ଶ୍ୱରେ ଅନେକ ଗ୍ରାମ ରହିଛି ା ନଦୀରେ ଗଭୀର ପାଣି ଯୋଗୁ ଅଞ୍ଚଳବାସୀଙ୍କ ଗମନାଗମନରେ ଅସୁବିଧା ଭୋଗୁଥିଲେ। ଶିକରପାଇ ପଞ୍ଚାୟତର ତଳସାଜା ଓ ଉପରସାଜା, ପଲମା ପଞ୍ଚାୟତର ଏରେଗେଣ୍ଡା, ମାଣ୍ଡିପର ଓ କୁଶବାଟି, ମାଜିଗୁଡ଼ା ପଞ୍ଚାୟତର ନିମାଝଲା, କଟଲପାଡ଼ୁ ଓ ରଘୁନାଥପୁର ଗ୍ରାମବାସୀ ମୁଖ୍ୟତଃ ବର୍ଷା ଦିନେ ନଦୀରେ ଅଧିକ ଜଳ ପ୍ରବାହିତ ହେଉଥିବା ସମୟରେ ଯାତାୟାତ ପାଇଁ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଥିଲେ। ରୋଗୀଙ୍କୁ ଗାଁରୁ ସ୍ବାସ୍ଥ୍ୟକେନ୍ଦ୍ରକୁ ନେବା, ଛାତ୍ରୀଛାତ୍ର ସ୍କୁଲ ଓ କଲେଜ ଯିବାକୁ ହିନସ୍ତା ହେଉଥିଲେ। ଏହି ସମସ୍ୟା ଜିଲା ପ୍ରଶାସନ ଠାରୁ ଆରମ୍ଭ କରି ସ୍ଥାନୀୟ ବିଧାୟକ ଏବଂ କୋରାପୁଟ ଏମ୍ପିଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ହେଲେ ପୋଲ ନିର୍ମାଣ ପ୍ରତି କାହାରି ଆନ୍ତରିକତା ନ ଥିଲା। ତେଣୁ ଗ୍ରାମବାସୀ ଟଙ୍କା ଆଦାୟ କରି ମିଳିତ ଭାବେ ନଦୀ ଉପରେ କାଠ ପୋଲ ନିର୍ମାଣ କରିଛନ୍ତି। ଉକ୍ତ ପୋଲରେ ବାଇକ ମଧ୍ୟ ଯାତାୟତ କରିପାରୁଛି। ବର୍ଷାଦିନେ କାଠ ପୋଲ ନଷ୍ଟ ହୋଇଯାଉଥିବାରୁ ସ୍ଥାୟୀ ପୋଲ ନିର୍ମାଣ ଦାବି ହେଉଛି। ଏହି ସମସ୍ୟା ନେଇ କଲ୍ୟାଣସିଂହପୁର ବିଡ଼ିଓ ସୁନୀଲ ଖରାଙ୍କୁ ପଚାରିବାରେ ସେ ନୂତନ ଭାବେ ବ୍ଲକର ଦାୟିତ୍ୱ ନେଇଛନ୍ତି, ଖୁବ ଶୀଘ୍ର ସମସ୍ୟା ସମାଧାନ କରାଯିବ ବୋଲି କହିଛନ୍ତି ା
