ଭବାନୀପାଟଣା,୧୦।୯(ଉତ୍ତମ କୁମାର ଦାଶ)ରାଜ୍ୟ ସରକାର ଶିକ୍ଷାକୁ ଗୁରୁତ୍ୱ ଦେଇ ବିଭିନ୍ନ ଯୋଜନା କରୁଛନ୍ତି। ଏବେ ୫-ଟି ସ୍କୁଲ ରୂପାନ୍ତରିତ କରି କୋଟି କୋଟି ଟଙ୍କା ମଧ୍ୟ ଖର୍ଚ୍ଚ କରୁଛନ୍ତି। ହେଲେ ସ୍କୁଲଗୁଡିକରେ ଖାଲି ପଡିଥିବା ଶିକ୍ଷକ ପୁରଣ କରାଯାଉ ନ ଥିବାରୁ ଶିକ୍ଷା ବ୍ୟବସ୍ଥା ବିପର୍ଯ୍ୟସ୍ତ ହେବାରେ ଲାଗିଛି। ମନ୍ଦିର ଅଛି ହେଲେ ଦିଅଁ ନ ଥିବା ସଦୃଶ୍ୟ ଭଳି ମନେହେଉଛି। ଏପରି ସ୍ଥଳେ କଳାହାଣ୍ଡି ଜିଲାର ଏକ ରିପୋର୍ଟ ଦେଖିଲେ ଜିଲାରେ ଶିକ୍ଷା ବ୍ୟବସ୍ଥା ବିପର୍ଯ୍ୟସ୍ତ ଭଳି ମନେହୁଏ।
ଜିଲା ଶିକ୍ଷା ବିଭାଗରୁ ମିଳିଥିବା ତଥ୍ୟ ଅନୁଯାୟୀ ଜିଲାର ୧୩ଟି ବ୍ଲକରେ ୨୪୩୨ଟି ସରକାରୀ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟ ରହିଛି। ସ୍କୁଲ ଅନୁଯାୟୀ ଜିଲାରେ ୫୯୭୭ଜଣ ଶିକ୍ଷୟିତ୍ରୀ/ଶିକ୍ଷକ ରହିବା କଥା। ହେଲେ ବର୍ତ୍ତମାନ ୩୯୪୭ଜଣ ଶିକ୍ଷୟିତ୍ରୀ/ଶିକ୍ଷକ ରହିଥିବାବେଳେ ୨୦୩୦ ଶିକ୍ଷୟିତ୍ରୀ/ଶିକ୍ଷକ ପଦବୀ ଖାଲିପଡିଛି। ଜିଲାରେ ଖାଲିପଡିଥିବା ଶିକ୍ଷୟିତ୍ରୀ/ଶିକ୍ଷକ ସଂଖ୍ୟାକୁ ଅନୁପାତରେ ଦେଖିଲେ ପ୍ରାୟ ୩୦% ରହିଛି। ସେହିପରି ଜିଲାର ୧୩ଟି ବ୍ଲକରେ ସରକାରୀ ହାଇସ୍କୁଲ ୧୭୮ଟି ରହିଛି। ସେଥିମଧ୍ୟରୁ ବର୍ତ୍ତମାନ ୧୪୩୧ଟି ଶିକ୍ଷୟିତ୍ରୀ/ଶିକ୍ଷକ ରହିଥିବାବେଳେ ୩୨୨ଟି ପଦବୀ ଖାଲି ପଡିଛି। ଜିଲାର ଜୁନାଗଡ ସରକାରୀ ହାଇସ୍କୁଲ, ଭବାନୀପାଟଣା ବ୍ରଜ ମୋହନ ଓ ବାଳିକା ଉଚ୍ଚ ବିଦ୍ୟାଳୟରେ ଜଣେ ଲେଖାଏଁ କ୍ଲାସ-୨ ପ୍ରଧାନ ଶିକ୍ଷକ ରହିଥିବାବେଳେ ଏହି ୩ଟି ହାଇସ୍କୁଲରେ କ୍ଲାସ-୨ ପ୍ରଧାନ ଶିକ୍ଷକ ପଦବୀ ଖାଲିପଡିଛି। ଚଳିତବର୍ଷ ଜିଲାର ୭ଟି ହାଇସ୍କୁଲକୁ ଅପଗ୍ରେଡ କରାଯାଇ ଉଚ୍ଚ ମାଧ୍ୟମିକ ବିଦ୍ୟାଳୟରେ ସାମିଲ କରାଯାଇଛି। ଆସନ୍ତା ୨୦୨୪-୨୫ରେ ଜିଲାରେ ଆହୁରି ୧୭ଟି ହାଇସ୍କୁଲକୁ ଅପଗ୍ରେଡ କରାଯାଇ ଉଚ୍ଚ ମାଧ୍ୟମିକ ବିଦ୍ୟାଳୟରେ ସାମିଲ କରାଯିବ ବୋଲି ଜଣାପଡିଛି। ଅନ୍ୟପକ୍ଷରେ ଗତବର୍ଷ ଖାଲି ପଡିଥିବା ସଂଖ୍ୟା ଅଧିକ ରହିଥିବାବେଳେ ଚଳିତବର୍ଷ କିନ୍ତୁ ନୂତନ ନିଯୁକ୍ତି ପରେ ଖାଲି ପଡିଥିବା ଶିକ୍ଷକ ସଂଖ୍ୟା କମିଛି। ଆଉ କିଛି ମାସ ମଧ୍ୟରେ ନୂତନ ନିଯୁକ୍ତି ପରେ ଏହି ସଂଖ୍ୟା ଆହୁରି କମିବ ବୋଲି ଜିଲା ଶିକ୍ଷା ବିଭାଗ ପକ୍ଷରୁ ସୂଚନା ମିଳିଛି।
