ଭଞ୍ଜନଗର,୩।୬(ବାବୁଲା ପ୍ରଧାନ):ଆଧୁନିକ ଜୀବନଧାରା ପ୍ରବାହରେ ବୋଉ ଶବ୍ଦଟି କ୍ରମଶଃ ହଜିବାରେ ଲାଗିଛି। ଏହି ପଛରେ ଥିବା ଆତ୍ମୀୟ ପରମ୍ପରା ଓ ସମର୍ପିତ ଆନ୍ତରିକତାକୁ ପୁନର୍ଜୀବିତ ଉଦ୍ଦେଶ୍ୟରେ ଲୋହରାଖଣ୍ଡି ସାହିତ୍ୟ ସଂସଦ ତରଫରୁ ‘କବିତାରେ ବୋଉ’ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏନେଇ ଗଞ୍ଜାମ ଜିଲା ଭଞ୍ଜନଗର
ଓ ଖଣ୍ଡାୟତ କାଳିଞ୍ଜି ସମାଜ ଗୃହରେ ଅନୁଷ୍ଠିତ କାର୍ଯ୍ୟକ୍ରମରେ ସଂସଦର ସଭାପତି ଡ. ଅଶୋକ କୁମାର ଷଡଙ୍ଗୀ ସଭାପତିତ୍ୱ କରିଥିଲେ । ଏଥିରେ ଅବସରପ୍ରାପ୍ତ କଲେଜ ଅଧ୍ୟକ୍ଷା ଡ. ଉଷା ପାଢୀ, ଜିଲା ପରିଷଦ ସଭ୍ୟା ଶୈଳବାଳା ବିଷୋୟୀ, ବିଜୟ ଲକ୍ଷ୍ମୀ ସ୍ବାଇଁ, ଇନରହୁଇଲ କ୍ଲବ ସଭାପତି ସୁନୀତା ବାରିକ ଅତିଥି ଭାବେ ଯୋଗଦେଇ ବୋଉ ସମର୍ପିତ ଜୀବନଧାରା ଉପରେ କହିଥିଲେ। ସଂସଦର ସମ୍ପାଦକ ଚିନ୍ମୟ କୁମାର ବେବର୍ତ୍ତା ସ୍ବାଗତ ଭାଷଣ ଦେଇଥିବାବେଳେ ଅତିଥି ପରିଚୟ ପ୍ରଦାନ କରିଥିଲେ ସଂସଦର ସହ-ସମ୍ପାଦକ ତ୍ରିନାଥ ବେହେରା। କାର୍ଯ୍ୟକ୍ରମକୁ ସଂଯୋଜନା କରିଥିଲେ ସଂସଦର ପରିଚାଳନା ସମ୍ପାଦିକା ପ୍ରଭାତୀ ମଞ୍ଜରୀ ବେହେରା।
ତ୍ରୈମାସିକ ସାହିତ୍ୟ ପତ୍ରିକା ଲୋହରାଖଣ୍ଡିର ବୋଉ ବିଶେଷାଙ୍କ ଅତିଥିମାନେ ଉନ୍ମୋଚନ କରିଥିଲେ। କାର୍ଯ୍ୟକ୍ରମକୁ ଆହୁରି ଭାବମୟ କରିଥିଲା ବୋଉ ଉପରେ ଆଧାରିତ ସଙ୍ଗୀତ। ତାହା ପରିବେଷଣ କରିଥିଲେ ଅନୁଷ୍ଠାନର କାର୍ଯ୍ୟକାରୀ ସଭାପତି ପ୍ରଦୀପ କୁମାର ସ୍ବାଇଁ, କଣ୍ଠଶିଳ୍ପୀ ସୌମ୍ୟ ରଞ୍ଜନ ବ୍ରହ୍ମା, ରଜନୀ ସେଠୀ, ବିଶ୍ୱଜିତା ରାଉତରାୟ, ସନ୍ତୋଷ କୁମାର ନନ୍ଦ, ଶୁଭ୍ରା ସୁଲଗ୍ନା, ଗୀତାଞ୍ଜଳି ମହାପାତ୍ର। ଦ୍ୱିତୀୟ ପର୍ଯ୍ୟାୟରେ ଆୟୋଜିତ କବିତା ପାଠୋତ୍ସବରେ ୩୦ରୁ ଅଧିକ ସାହିତି୍ୟକ ବୋଉ ଉପରେ ଆଧାରିତ ନିଜର ସ୍ବରଚିତ କବିତା ପାଠ କରିଥିଲେ। ସଂସଦର ସମସ୍ତ କର୍ମକର୍ତ୍ତା ସହଯୋଗ କରିଥିବାବେଳେ ପ୍ରଣତି ପାଣିଗ୍ରାହୀ ଧନ୍ୟବାଦ ପ୍ରଦାନ କରିଥିଲେ।
Dharitri – Odisha’s No.1 Odia Daily
