ଦିଗପହଣ୍ଡି,୮ା୭(ଡି.ଏନ.ଏ.): ଗଞ୍ଜାମ ଜିଲା ପାଟପୁର ଥାନା ସାହସପୁର ପଞ୍ଚାୟତ ହାଟପଦା ଗ୍ରାମରୁ ଶୁକ୍ରବାର ଜଣେ ମହିଳାଙ୍କ ମୃତଦେହ ପୋଲିସ ଜବତ କରିଛି । ସେ ହେଲେ ହାଟପଦା ଗ୍ରାମର ଏସ. ସରବା(୫୦)। ସରବା ଘରେ ଏକୁଟିଆ ରହୁଥିବା ବେଳେ ସାହି ପଡିଶାରେ ରହୁଥିବା ମହିଳାମାନଙ୍କ ସହ ସେ ଗୁରୁବାର ସନ୍ଧ୍ୟାରେ କଥା ବାର୍ତ୍ତା ହୋଇଥିଲେ। ପରେ ରାତ୍ରି ଭୋଜନ ସାରି ଘର ଭିତରେ ଶୋଇଥିଲେ। ଶୁକ୍ରବାର ସକାଳୁ ସରବାଙ୍କ ଘରର କବାଟ ଖୋଲି ନଥିବା ହେତୁ ସାହି ଲୋକ କବାଟ ଖୋଲିବା ପାଇଁ ଚେଷ୍ଟା କରିଥିଲେ। କିନ୍ତୁ କବାଟ ନ ଖୋଲିବାରୁ ପାଟପୁର ପୋଲିସକୁ ଖବର ଦେଇଥିଲେ। ଖବର ପାଇ ପୋଲିସର ପହଞ୍ଚି ଘରରେ ଶୋଇଥିବା ଅବସ୍ଥାରେ ମହିଳାଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବ୍ରହ୍ମପୁର ଡାକ୍ତରଖାନାକୁ ପଠାଇଥିଲେ। ଏ ନେଇ ନଂ. ୯/୨୨ରେ ଏକ ଅପମୃତ୍ୟୁ ମାମଲା ରୁଜୁ ହୋଇଥିବା ବେଳେ ମୃତ୍ୟୁ କାରଣ ଅସ୍ପଷ୍ଟ ରହିଛି। ବ୍ୟବଚ୍ଛେଦ ରିପୋର୍ଟ ମିଳିବା ପରେ ପ୍ରକୃତ କାରଣ ଜଣାପଡିବ ବୋଲି ପୋଲିସ କହିଛି।
