କପ୍ତିପଦା,୩୦।୧୨(ଡି.ଏନ୍.ଏ.): ମୟୂରଭଞ୍ଜ ଜିଲା କପ୍ତିପଦା ବ୍ଲକ ଶରତ ଥାନା ଅଧୀନ କଳମଗଡ଼ିଆ ପଞ୍ଚାୟତ ଶାରିସୁଆ ଗ୍ରାମରେ ଡାହାଣୀ ସନ୍ଦେହରେ ଜଣେ ମହିଳାଙ୍କୁ ଧାରୁଆ ଅସ୍ତ୍ରରେ କାଟି ହତ୍ୟା କରାଯାଇଛି । ସେ ହେଲେ ଉକ୍ତ ଗ୍ରାମର ଖଇରୀ ମହାନ୍ତ(୪୫)।
ପ୍ରକାଶ ଯେ, ପଡୋଶୀ ଅନୀଲ କୁମାର ମହାନ୍ତ ଓରଫ କାଳିଆ ୧୪ ବର୍ଷ ପୂର୍ବେ ବିବାହ କରିଥିଲେ। ମାତ୍ର ତାଙ୍କର କୌଣସି ସନ୍ତାନ ହେଉ ନ ଥିଲେ। ଏ ନେଇ ସେ ଖଇରୀଙ୍କ ଉପରେ ସନ୍ଦେହ କରୁଥିଲେ। ତେଣୁ ମଙ୍ଗଳବାର ସନ୍ଧ୍ୟାରେ ଖଇରୀ ପାଣି ଆଣିବାକୁ ଗାଁ ନଳକୂଅକୁ ଯାଇଥିଲେ। ଏହି ସମୟରେ ଅନୀଲ ଓ ତାଙ୍କ ସାନ ଭାଇ ବଳରାମ ଏକ ଧାରୁଆ ଅସ୍ତ୍ରରେ ଖଇରୀଙ୍କ ବେକକୁ କାଟି ଘଟଣା ସ୍ଥଳରୁ ଫେରାର ହୋଇ ଯାଇଥିଲେ । ଖବର ପାଇ ଉଦଳା ଏସ୍ଡିପିଓ ଓ ଶରତ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହିତ ମୃତଦେହ ବ୍ୟବଚ୍ଛେଦ ପାଇଁ ଉଦଳା ପଠାଇଛନ୍ତି । ବାରିପଦାରୁ ସନ୍ଧାନୀ କୁକୁର ସହିତ ସାଇଣ୍ଟିଫିକ୍ ଟିମ୍ ଆସି ତଦନ୍ତ କରିବା ସହିତ ବିଭିନ୍ନ ନମୁନା ସଂଗ୍ରହ କରି ଫେରିଛନ୍ତି । ଅଭିଯୁକ୍ତଦ୍ବୟ ଫେରାର ଥିବାବେଳେ ସେମାନଙ୍କୁ ଧରିବା ପାଇଁ ଚଢ଼ାଉ ଜାରି ରହିଛି ।
