କୁଜଙ୍ଗ,୨୪ା୧୦(ଡି.ଏନ.ଏ.):ବଙ୍ଗୋପସାଗରରେ ସୃଷ୍ଟ ଲଘୁଚାପ ଅବପାତର ରୂପ ନେଇଥିଲେ ବି ଓଡ଼ିଶା ଉପକୂଳ ଜଗତ୍ସିଂହପୁର ଜିଲାକୁ ବାତ୍ୟା ଭୟ ନାହିଁ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଥିଲେ ବି ଚାଷୀକୁଳ ଭୟଭୀତ ଅବସ୍ଥାରେ ଅଛନ୍ତି। କୁଜଙ୍ଗ ବ୍ଲକରେ ପ୍ରାୟ ୧୪ ହଜାର ହେକ୍ଟରରୁ ଊର୍ଦ୍ଧ୍ୱ ଜମିରେ ଧାନଚାଷ ହୋଇଥିଲା ବେଳେ ସେଥିମଧ୍ୟରୁ ଅଧା ଢିପ ଓ ଅଧା ଖାଲ ଜମି ରହିଛି। ରବିବାର ଆକାଶ ମେଘାଚ୍ଛନ୍ନ ଥିବାବେଳେ ସମୟେ ସମୟେ ହାଲୁକା ପବନ ବହୁଛି। ସାଧାରଣତଃ ଖାଲ ଜମିରେ ଲମ୍ବା କିସମର ଧାନ ଚାଷ ହୋଇଥିବା ବେଳେ ଢିପ ଜମିରେ ଛୋଟଧାନ ଚାଷ ହୋଇଥାଏ। ବର୍ତ୍ତମାନ ଖାଲ ଜମିରେ ଚାଷ ହୋଇଥିବା ଧାନ ଥୋଡ଼ ବାହାରି ଥିବାବେଳେ ଢିପ ଜମିର ଧାନ ପେଟ ଥୋଡ ନେଇଛି। ଯଦି ୩୦ରୁ ୩୫ କିଲୋମିଟର ବେଗରେ ପବନ ବହେ, ତେବେ ଖାଲ ଜମି ଧାନ ପାଣିରେ ପଡିଯିବ। ଅନ୍ୟପକ୍ଷରେ ପେଟ ଥୋଡ଼ ଧରିଥିବା ଢିପ ଜମିର ଧାନ ପବନରେ ଖୋଲି ହୋଇଯିବ। ଫଳରେ ସମସ୍ତ ଧାନ ଅଗାଡି ହୋଇଯିବ। ତେଣୁ ଚାଷୀକୁଳ ଭୟଭୀତ ଅବସ୍ଥାରେ ଅଛନ୍ତି। ଗୋଟେ ପଟେ ଗତବର୍ଷ ଲଘୁଚାପ ଜନିତ ବର୍ଷା ଯୋଗୁ ପାଚିଲା ଧାନ ପାଣିରେ ପଡି ନଷ୍ଟ ହୋଇଯିବାରୁ ଚାଷୀମାନେ ହତାଶ ହୋଇପଡିଥିଲେ। ଚଳିତବର୍ଷ ଧାରକରଜ କରି ଚାଷୀମାନେ ଚାଷ କରିଥିଲେ। ଯଦି ଚଳିତ ବାତ୍ୟା ପ୍ରଭାବରେ ପବନ ବହେ ଚାଷୀମାନଙ୍କ ମେରୁଦଣ୍ଡ ଭାଙ୍ଗିଯିବ।
