କୋକସରା,୨୨।୪(ଡି.ଏନ.ଏ): କଳାହାଣ୍ଡି ଜିଲା କୋକସରା ବ୍ଲକ ବଡ ପୋଡାଗୁଡା ପଞ୍ଚାୟତର ୱାର୍ଡ ନଂ-୧୨ରେ ଥିବା ସୋଭାଗ୍ୟ ପଡ଼ାରେ ନଳକୂପଟିଏ ନ ଥିବା ରୁ ବର୍ଷ ତମାମ ଜଳକଷ୍ଟ ଭୋଗୁଥିଲେ ପଡାବାସୀ। ଏନେଇ ବିଭିନ୍ନ ଖବରକାଗଜରେ ଖବର ପ୍ରକାଶିତ ହେବାପରେ ବ୍ଳକ ଉପାଧ୍ୟକ୍ଷ ରାଜୀବ ଅଗ୍ରୱାଲ ଦିନକ ମଧ୍ୟରେ ନଳକୂପ ଖୋଳାଯିବ ବୋଲି ପ୍ରତିଶ୍ରୁତି ଦେଇଥିଲେ। ଶେଷରେ ଗୁରୁବାର ବ୍ଳକ ଉପାଧ୍ୟକ୍ଷ ଅଗ୍ରୱାଲ ଙ୍କ ଉପସ୍ଥିତିରେ ପଡ଼ାରେ ନଳକୂପ ଖୋଳାଯାଇଛି। ନଳକୂପ ଖନନ ପରେ ପଡାବାସୀ ବ୍ଳକ ଉପାଧ୍ୟକ୍ଷ ସମେତ ବ୍ଳକ ପ୍ରଶାସନ ଓ ଗଣମାଧ୍ୟମକୁ ଧନ୍ୟବାଦ ଜଣାଇଛନ୍ତି।
ସୂଚନାଯୋଗ୍ୟ ଯେ, ସୋଭାଗ୍ୟ ପଡାରେ ୩୦ରୁ ଊର୍ଦ୍ଧ୍ୱ ପରିବାର ବସବାସ କରୁଥିବା ବେଳେ ପାନୀୟ ଜଳ ନିମନ୍ତେ ପଡ଼ାରେ ନଳକୂପ ଟିଏ ନ ଥିଲା। ଫଳରେ ପିଇବା ପାଣି ଟିକକ ପାଇଁ ପଡାବାସୀ ନିକଟରେ ଥିବା ମୁଟ୍ରା ନଦୀ ପାଣି ଉପରେ ବର୍ଷ ତମାମ ନିର୍ଭର କରି ଆସୁଥିଲେ। ନଳକୂପଟିଏ ଖୋଲିବା ପାଇଁ ପ୍ରଶାସନ ପାଖରେ ବାରମ୍ବାର ଗୁହାରି କରିଥିଲେ ମଧ୍ୟ କାହାରି ଦୃଷ୍ଟି ପଡୁ ନ ଥିଲା। ହେଲେ ଏବେ ବ୍ଲକ ଉପାଧ୍ୟକ୍ଷଙ୍କ ଏଭଳି କାର୍ଯ୍ୟକୁ ସାଧାରଣ ରେ ପ୍ରଶଂସା କରାଯାଇଛି ।
