ବାରିପଦା ଅଫିସ,୮ା୭- ମୟୂରଭଞ୍ଜ ଜିଲାର ୨୬ଟି ବ୍ଲକରେ ୪୦୪ଟି ଗ୍ରାମ ପଞ୍ଚାୟତ ରହିଛି। ପଞ୍ଚାୟତର ରାଜସ୍ବ ବୃଦ୍ଧି କରିବା ପାଇଁ ବିଭାଗ ପକ୍ଷରୁ କଲ୍ୟାଣମଣ୍ଡପ ନିର୍ମାଣ ଯୋଜନା କରାଯାଇଛି। ହେଲେ ଏହି ଯୋଜନା ଜିଲାରେ ଦିଗହରା ହୋଇ ପଡ଼ିଥିବା ଦେଖିବାକୁ ମିଳିଛି। ଜିଲାର ୮୫ ପଞ୍ଚାୟତରେ କଲ୍ୟାଣମଣ୍ଡପ ନିର୍ମାଣ ଲାଗି ରାଜ୍ୟ ଅର୍ଥ କମିଶନ ଟଙ୍କା ମଞ୍ଜୁର କରିଛନ୍ତି। ୨୦୨୫-୧୬ ଆର୍ଥିକ ବର୍ଷରୁ ଟଙ୍କା ମଞ୍ଜୁର ହୋଇଥିଲେ ମଧ୍ୟ ୮୫ଟିରୁ ମାତ୍ର ୨୦ଟି କଲ୍ୟାଣମଣ୍ଡପ ସମ୍ପୂର୍ଣ୍ଣ ହୋଇଛି। ୪୫ଟି କାର୍ଯ୍ୟ ନିର୍ମାଣାଧିନ ରହିଥିବା ବେଳେ ୨୦ଟିର ଶିଳାନ୍ୟାସ ମଧ୍ୟ ବର୍ତ୍ତମାନ ସୁଦ୍ଧା ହୋଇନାହିଁ। କେଉଁଠି ସ୍ଥାନ ଚିହ୍ନଟ ହୋଇ ନ ପାରିବା, ଜମିବାଡ଼ି ବିବାଦ ତ ଆଉ କେଉଁଠି ଅଧା କାମ କରି ଠିକାଦାର ପଳାଇ ଯାଇଥିବାରୁ କଲ୍ୟାଣମଣ୍ଡପ ଅସମ୍ପୂର୍ଣ୍ଣ ହୋଇ ରହିଛି। ୧୨ଟି ବ୍ଲକର ବିଭିନ୍ନ ପଞ୍ଚାୟତରେ କିଛି କଲ୍ୟାଣମଣ୍ଡପ ସମ୍ପୂର୍ଣ୍ଣ ହୋଇଥିବା ବେଳେ ୧୪ଟି ବ୍ଲକରେ ବର୍ତ୍ତମାନ ସୁଦ୍ଧା ଗୋଟିଏ ବି କଲ୍ୟାଣମଣ୍ଡପ ସମ୍ପୂର୍ଣ୍ଣ ହୋଇପାରିନାହିଁ। ଜିଲା ପଞ୍ଚାୟତ କାର୍ଯ୍ୟାଳୟରୁ ମିଳିଥିବା ସୂଚନା ଅନୁସାରେ ଜିଲାର ବାରିପଦା ବ୍ଲକ ଅଧୀନ ୮ଟି ପଞ୍ଚାୟତରେ କଲ୍ୟାଣମଣ୍ଡପ ପାଇଁ ଟଙ୍କା ମଞ୍ଜୁର କରାଯାଇଥିବା ବେଳେ ସେଥିରୁ ୫ଟି ସମ୍ପୂର୍ଣ୍ଣ ହୋଇଛି। ସେହିଭଳି ବେତନଟୀ ବ୍ଲକର ୪ଟି ପଞ୍ଚାୟତରୁ ୧ଟି ସମ୍ପୂର୍ଣ୍ଣ, ବାଙ୍ଗିରିପୋଷି ବ୍ଲକ ୨ଟିରୁ ୧ଟି, କୁଳିଅଣାରେ ୩ଟିରୁ ୧ଟି, ମୋରଡ଼ାରେ ୭ଟିରୁ ୩, ସାରସକଣାରେ ୨ଟିରୁ ୧, ଶ୍ୟାମାଖୁଣ୍ଟାରେ ୮ଟିରୁ ୩ଟି, ଖୁଣ୍ଟାରେ ୨ଟି ୧ଟି, କପ୍ତିପଦାରେ ୪ଟିରୁ ୧ଟି, ଉଦଳାରେ ୪ଟିରୁ ୧ଟି, ଜାମଦାରେ ୩ଟିରୁ ୧ଟି, ରରୁଆଁରେ ୨ଟିରୁ ୧ଟି ସମ୍ପୂର୍ଣ୍ଣ ହୋଇଛି। ବଡ଼ସାହି ବ୍ଲକର ୩ଟି ପଞ୍ଚାୟତ ପାଇଁ ଅର୍ଥ ମଞ୍ଜୁର ହୋଇଥିବା ବେଳେ ଗୋଟିଏ ବି ସମ୍ପୂର୍ଣ୍ଣ ହୋଇପାରିନାହିଁ। ସେହିଭଳି ରାଇରଙ୍ଗପୁରରେ ୨ଟି, ଶୁଳିଆପଦାରେ ୪ଟି, ଗୋପବନ୍ଧୁନଗରରେ ୩ଟି, ବହଳଦାରେ ୪ଟି, ବିଜତଳାରେ ୧ଟି, ବିଶୋଇରେ ୨ଟି, କୁସୁମିରେ ୪ଟି, ରାଇରଙ୍ଗପୁରରେ ୧ଟି, ତିରିଂରେ ୧ଟି, କରଞ୍ଜିଆରେ ୨ଟି, ଯଶିପୁରରେ ୫ଟି, ଶୁକୃଳିରେ ୩ଟି ଓ ଠାକୁରମୁଣ୍ଡା ବ୍ଲକର ଗୋଟିଏ ପଞ୍ଚାୟତରେ କଲ୍ୟାଣମଣ୍ଡପ ଲାଗି ଅର୍ଥ ମଞ୍ଜୁର ହୋଇଥିବା ବେଳେ କୌଣସିଠାରେ ଗୋଟିଏ ବି ସମ୍ପୂର୍ଣ୍ଣ ହୋଇ ନାହିଁ। ଉଲ୍ଲେଖଯୋଗ୍ୟ ଯେ, ଗୋଟିଏ କଲ୍ୟାଣମଣ୍ଡପ ପାଇଁ ୨୦ରୁ ୩୫ ଲକ୍ଷ ଟଙ୍କା ମଞ୍ଜୁର ହୋଇଥାଏ। ରାଜ୍ୟ ଅର୍ଥ କମିଶନ ପକ୍ଷରୁ ୨୦ ଲକ୍ଷ ଟଙ୍କା ଓ ଏମ୍ଜିଏନ୍ଆର୍ଜିଏସ୍ରେ ୧୫ ଲକ୍ଷ ଟଙ୍କା ମଞ୍ଜୁର ହୋଇଥାଏ। ମୋରଡ଼ା ବ୍ଲକ ଚିତ୍ରଡ଼ା ପଞ୍ଚାୟତର ପୁରୁଣା ପାଣି ଗ୍ରାମରେ କଲ୍ୟାଣମଣ୍ଡପ ବର୍ତ୍ତମାନ ନିର୍ମାଣଧିନ ରହିଛି। ଏ ନେଇ ଉପଖଣ୍ଡ ପଞ୍ଚାୟତ ଅଧିକାରୀ ଦେବେନ୍ଦ୍ର ବେହେରାଙ୍କୁ ପଚାରିବାରୁ ବିଭିନ୍ନ କାରଣ ଯୋଗୁଁ ପଞ୍ଚାୟତରେ କଲ୍ୟାଣ ମଣ୍ଡପ ଅଟକି ରହିଥିବା କହିଛନ୍ତି। ତେବେ କଲ୍ୟାଣମଣ୍ଡପ ସମ୍ପୂର୍ଣ୍ଣ କରାଯାଇ ପଞ୍ଚାୟତର ରାଜସ୍ବ ବୃଦ୍ଧି କରାଯିବାକୁ ସାଧାରଣରେ ଦାବି ହେଉଛି।
