ପାଟଣା,୧୧।୧(ସ୍ବ.ପ୍ର.): କେନ୍ଦୁଝର ଜିଲା ତୁରୁମୁଙ୍ଗା ଥାନା ସବଇନ୍ସପେକ୍ଟର ଦୀନଦୟାଲ ମୋଦିଙ୍କ ଭଡ଼ା ଘରୁ ରବିବାର ରାତିରେ ଚୋରି ଉଦ୍ୟମ ହେଉଥିବା ବେଳେ ଗାଁ ଲୋକେ ଦୁଇଜଣ ଚୋରଙ୍କୁ କାବୁ କରି ପୋଲିସ ଜିମା ଦେଇଛନ୍ତି। ଦୀନଦୟାଲ ତୁରୁମୁଙ୍ଗା ମନ୍ଦିର ସାହିସ୍ଥିତ ଦିଲ୍ଲୀପ ସାହୁଙ୍କ ଭଡ଼ା ଘରେ ରହୁଥିଲେ।
ସୂଚନାନୁଯାୟୀ, ଦୀନଦାୟଲ ଛୁଟି ନେଇ ଗାଁକୁ ଯାଇଥିବାର ସୁଯୋଗ ନେଇ ଚୋର ଘର ପଛପଟ କବାଟ ଓ ଝରକା ଗ୍ରୀଲ ଭାଙ୍ଗି ଚୋରି କରିବା ପାଇଁ ଘର ଭିତରକୁ ପଶିଥିଲେ। ଚୋରି ହେଉଥିବା ଜାଣି ଗାଁ ଲୋକେ ଦୁଇ ଚୋରଙ୍କୁ କାବୁ କରି ପୋଲିସ ଜିମା ଦେଇଛନ୍ତି । ଏହି ୨ ଚୋରଙ୍କ ସାଙ୍ଗରେ ଥିବା ଅନ୍ୟ ଦୁଇ ଜଣ ଚୋର ଘଟଣାସ୍ଥଳରୁ ଫେରାର ହୋଇଯାଇଛନ୍ତି। ତେବେ ଦୁଇ ଚୋର କଟକ ଅଞ୍ଚଳର ହୋଇଥିବା ଜଣାପଡ଼ିଛି। ପୋଲିସ ଏକ ଚୋରି ମାମଲା ରୁଜୁ କରି ଚୋରଙ୍କୁ ଜେରା କରୁଛି। ପାଟଣା ବ୍ଲକ ତୁରୁମୁଙ୍ଗା ଦେଇ ଯାଇଥିବା ୪୯ ନମ୍ବର ଜାତୀୟ ରାଜପଥ ପାର୍ଶ୍ୱରେ ଥିବା ତୁରୁମୁଙ୍ଗା ଗ୍ରାମରୁ ବାରମ୍ବାର ଚୋରି ହେଉଥିବାରୁ ରାତ୍ର କାଳୀନ ପୋଲିସ ପାଟ୍ରୋଲିଂ କରିବାକୁ କଡ଼ାକଡ଼ି କରିବାକୁ ସ୍ଥାନୀୟ ଅଞ୍ଚଳବାସୀଙ୍କ ତରଫରୁ ଦାବି ହେଉଛି।
