ଭାପୁର, ୨୧ା୧୨ (ଡି.ଏନ.ଏ.): ନୟାଗଡ଼ ଜିଲା ଭାପୁର ବ୍ଲକ ଅଧୀନ ବଡସହରା ପଞ୍ଚାୟତରେ ଗୋଟିଏ ରାସ୍ତାକୁ ୨୧ ଥର ଫଲସ୍ ବିଲ୍ ଘଟଣା ରାଜ୍ୟରେ ଚର୍ଚ୍ଚିତ ଥିବାବେଳେ ଏବେ ପୁଣିଥରେ ଭିଜିଲାନ୍ସ ତନାଘନା ଆରମ୍ଭ କରିଛି। ମଙ୍ଗଳବାର ପୂର୍ବାହ୍ନରେ ନୟାଗଡ଼ ଭିଜିଲାନ୍ସ ବିଭାଗର ଏକ ଟିମ୍ ଭାପୁର ବ୍ଲକ ବଡସହରା ଅଧୀନ ଗୋପାଳପ୍ରସାଦ ଗଁାରେ ପହଞ୍ଚତ୍ ତଦନ୍ତ କରିଥିଲା। ଭିଜିଲାନ୍ସ ବିଭାଗର ଅଧିକାରୀମାନେ ଅଭିଯୋଗ ହୋଇଥିବା ବିବାଦୀୟ ରାସ୍ତାକୁ ମାପଚୁପ କରିବା ସହ ସ୍ଥାନୀୟ ଗ୍ରାମବାସୀ ତଥା ଭାପୁର ବ୍ଲକ ପ୍ରଶାସନର ଅଧିକାରୀମାନଙ୍କ ସହ ସବିଶେଷ ଆଲୋଚନା କରିଥିଲେ। ବିଶେଷକରି ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆରଇଜିଏସ୍)ରେ ଉକ୍ତ ରାସ୍ତା କେବେ ନିର୍ମାଣ ହୋଇଥିଲା, ଏଥିନିମନ୍ତେ ସରକାରୀ ସ୍ତରରେ କେତେ ଅନୁଦାନ ଆସିଥିଲା, ସେସବୁ ପଚାରି ବୁଝିଥିଲେ। ପରେ ଉକ୍ତ ଟିମ୍ ଫେରି ଯାଇଛନ୍ତି। ଏ ନେଇ ଭିଜିଲାନ୍ସ ବିଭାଗ ସହ ଆମ ପ୍ରତିନିଧି ଯୋଗାଯୋଗ କରିବାର ଅଧିକାରୀ କହିଥିଲେ, ୨୦୨୧ରେ ଏକ ଅଭିଯୋଗ ଆଧାରରେ ତଦନ୍ତ କରାଯାଉଛି। ରାସ୍ତା ମାପଚୁପ କରିବା ସହ କେତେ ରାସ୍ତା ନିର୍ମାଣ ହୋଇଛି, କେଉଁ ବିଭାଗରୁ ଅର୍ଥ ଖର୍ଚ୍ଚ ହୋଇଛି ଏହାର କାଗଜପତ୍ର ତଦନ୍ତ କରାଯାଉଛି। ଦରକାର ପଡିଲେ ପୁଣି ସେ ସ୍ଥାନ ତଦନ୍ତ କରାଯିବ ବୋଲି ସୂଚନା ଦେଇଛନ୍ତି।
ସୂଚନାଯୋଗ୍ୟ, ଗତବର୍ଷ ମାର୍ଚ୍ଚରେ ଗୋପାଳପ୍ରସାଦ ଗ୍ରାମରେ ଏମ୍ଜିଏନ୍ ଆରଇଜିଏସ୍ ଯୋଜନାରେ ଗୋଟିଏ ରାସ୍ତାକୁ ଦେଖାଇ ୨୧ ଥର ଫଲସ୍ ବିଲ୍ ସହ ଲକ୍ଷାଧିକ ଟଙ୍କା ଆତ୍ମସାତ ହୋଇଥିବା ନେଇ ଅଭିଯୋଗ ହୋଇଥିଲା। ପୂର୍ବରୁ ଜିଲାପାଳ ତଦନ୍ତ କରିବା ନିମନ୍ତେ ବିଭାଗୀୟ ଅଧିକାରୀଙ୍କୁ ଦାୟିତ୍ୱ ଦେଇଥିବା ବେଳେ ଏ ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ତେବେ ଦୀର୍ଘଦିନର ନୀରବତା ପରେ ଭିଜିଲାନ୍ସ ବିଭାଗ ଏହାର ତଦନ୍ତ ଦାୟିତ୍ୱ ନେଇଥିବାରୁ ଦୋଷୀମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ନେଇ ସମ୍ଭାବନା ସୃଷ୍ଟି ହୋଇଛି।
