କ୍ୱିଭ୍,୬।୪: ରୁଷିଆ ଏବଂ ୟୁକ୍ରେନ ମଧ୍ୟରେ ଆଜି ଯୁଦ୍ଧର ୪୨ତମ ଦିନ। ଏ ପର୍ଯ୍ୟନ୍ତ ରୁଷିଆ ୟୁକ୍ରେନର ଅନେକ ସହରକୁ ସମ୍ପୂର୍ଣ୍ଣ ଭାବେ ଧ୍ୱଂସ କରିଦେଇଛି। ଏଥି ସହିତ, ୟୁକ୍ରେନର ବୁଚାଠାରେ ହୋଇଥିବା ହତ୍ୟାକାଣ୍ଡ ପାଇଁ ରୁଷିଆ ସମଗ୍ର ବିଶ୍ୱରେ ସମାଲୋଚିତ ହେଉଛି। ଯୁଦ୍ଧ ଅପରାଧର ପ୍ରମାଣ ମଧ୍ୟ ସେମାନଙ୍କ ପାଖରେ ଅଛି ବୋଲି ୟୁକ୍ରେନ ସୈନ୍ୟ କହିଛନ୍ତି। ତେବେ ରୁଷିଆ ଏହାକୁ କ୍ରମାଗତ ଭାବରେ ଅସ୍ବୀକାର କରିଛି।
ଏହି ଘଟଣାକୁ ନେଇ ବୁଧବାର ରୁଷିଆର ଶୀର୍ଷ ବ୍ୟାଙ୍କ ଉପରେ ଆମେରିକା ପ୍ରତିବନ୍ଧକ ଲଗାଇଛି। ଏହା ବ୍ୟତୀତ କୌଣସି ଆମେରିକୀୟ ନାଗରିକଙ୍କୁ ରୁଷିଆରେ ବିନିଯୋଗ କରିବାକୁ ମଧ୍ୟ ବାରଣ କରାଯାଇଛି। ଏହି ପରିପ୍ରେକ୍ଷୀରେ ରାଷ୍ଟ୍ରପତି ଜୋ ବାଇଡେନ ଏକ ଟୁଇଟରେ କହିଛନ୍ତି ଯେ, ନୂତନ ପ୍ରତିବନ୍ଧକ ବୁଚାରେ ହୋଇଥିବା ଅତ୍ୟାଚାର ଯୋଗୁ ଲାଗିଛି।
ସୂଚନାଯୋଗ୍ୟ, ୟୁକ୍ରେନର ବୁଚାଠାରେ ବହୁ ସଂଖ୍ୟକ ମୃତଦେହ ମିଳିଥିଲା। ରୁଷିଆ ସୈନ୍ୟମାନେ ୟୁକ୍ରେନ ନାଗରିକଙ୍କ ହାତଗୋଡ ବାନ୍ଧି ମୁଣ୍ଡରେ ଗୁଳି କରୁଥିବା ଫଟୋ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଥିଲା। ବୁଚା ହତ୍ୟାକାଣ୍ଡକୁ ନେଇ ସମାଲୋଚନାର ସମ୍ମୁଖୀନ ହେଉଥିବା ରୁଷିଆ ଏହି ଘଟଣାକୁ ଅଗ୍ରାହ୍ୟ କରୁଛି।
