ଜଗତ୍ସିଂହପୁର ଅଫିସ, ୨୫।୧: ପ୍ରାୟ ୫୦ ବର୍ଷ ପରେ ରବିବାର ଘରକୁ ଫେରିଲେ ବୃଦ୍ଧ ଚରଣ ପଲାଉର (୬୫)। ତାଙ୍କୁ ଦେଖିବାକୁ ତାଙ୍କ ମା’ ଆଉ ଦୁନିଆରେ ନ ଥିବାବେଳେ ସାନ ଭାଇ ବିଜୟଙ୍କ ସହ ହୋଇଥିଲା ଭାବାବେଗ ମିଳନ। ଅଭାବରେ ପଡ଼ି ପେଟ ପାଇଁ ଦାନା ଖୋଜୁଖୋଜୁ ଘରଠାରୁ ଦୂରେଇ ଯାଇଥିଲେ ଚରଣ। ପରିବାର ଲୋକେ ତାଙ୍କ ଖୋଜଖବର ପାଇ ନ ଥିଲେ କି ସେ ଆଉ ଫେରିବାକୁ ସୁଯୋଗ ପାଇ ନ ଥିଲେ। ପର ଘରେ ସହାୟକ ଭାବେ ଜୀବନ କାଟୁଥିଲେ। ଗତ କିଛିଦିନ ତଳେ ଜଣେ ଗାଡ଼ି ଚାଳକଙ୍କ ସହ ତାଙ୍କର ଭେଟ ହୋଇଥିଲା। କଥାବାର୍ତ୍ତାବେଳେ ଉଭୟେ ଗୋଟିଏ ଗାଁର ବୋଲି ଜାଣିପାରିଥିଲେ। ଏପରି କି ଚରଣଙ୍କ ବିଷୟରେ ଗାଡ଼ିଚାଳକ ସବୁ ବିଷୟ ଜାଣିପାରିଥିଲେ। ଏହାପରେ ଚରଣଙ୍କ ଗାଁକୁ ଫେରିବା ବାଟ ଖୋଲିଥିଲା।
ଚରଣଙ୍କ ଘର ଜଗତ୍ସିଂହପୁର ବ୍ଲକ ଫୁଲହାର ଗାଁରେ। ତାଙ୍କ ଆଗମନ କଥା ଜାଣି ଫୁଲହାର ଗାଁ ଲୋକେ ରବିବାର ସକାଳୁ ତାଙ୍କୁ ଅପେକ୍ଷା କରିଥିଲେ। ଅପରାହ୍ନରେ ସେ ଗାଁ ମୁଣ୍ଡ ଭାଗବତ ଗୋସେଇଁଙ୍କ ନିକଟରେ ପହଞ୍ଚତ୍ବା ପରେ ଲୋକେ ସେଠାରେ ରୁଣ୍ଡ ହୋଇଯାଇଥିଲେ। ମା’ ଭଗବତୀଙ୍କ ଦର୍ଶନ ପରେ ତାଙ୍କୁ ଗାଁ ଲୋକେ ଶୋଭାଯାତ୍ରା କରି ଘରେ ପହଞ୍ଚାଇଥିଲେ। ପରିବାର ଲୋକେ ବନ୍ଦାପନା କରି ଘର ପ୍ରବେଶ କରାଇଥିଲେ। ନୂଆ ବସ୍ତ୍ର ପିନ୍ଧିବାକୁ ଦେଇଥିଲେ। ଚରଣ କହିଛନ୍ତି ଯେ, ‘ଆମେ ଦୁଇ ଭାଇ ଛୋଟ ପିଲା ଥିବାବେଳେ ବାପାଙ୍କ ଦେହାନ୍ତ ହୋଇଯାଇଥିଲା। ଆମ ପେଟକୁ ଆହାର, ଦେହକୁ କପଡ଼ା ଯୋଗାଡ଼ କରିବା ବୋଉ ପାଇଁ ବହୁତ କଷ୍ଟକର ଥିଲା। ଏ ପରିସ୍ଥିତିରେ ବି ସେ ଆମ ଦୁହିଁଙ୍କ ମୁହଁରେ ହସ ଫୁଟାଇବା ପାଇଁ ଆଖିର ଲୁହ ଆଖିରେ ମାରି ଅନେକ କିଛି କରିଥିଲା। ଆମ ଦୁଇ ଭାଇଙ୍କ ଖେଳକୁଦ ଦେଖି ସେ ସବୁ ଦୁଃଖକଷ୍ଟ ଭୁଲିବାକୁ ଚେଷ୍ଟା କରୁଥିଲା। କିନ୍ତୁ ସେତକ ଖୁସି ବି ଅଧିକ ଦିନ ରହିପାରି ନ ଥିଲା। ମୁଁ ୧୨/୧୩ ବର୍ଷ ବୟସରେ ପେଟକୁ ମୁଠେ ଆହାର ପାଇଁ ଗାଁର ଜଣେ ଲୋକଙ୍କ ଗାଈ, ମେଣ୍ଢା ଚରାଇବାକୁ ଯାଉଥିଲି। ତା’ ପରେ ଆମ୍ପ୍ରୋ ବିସ୍କୁଟ୍ କମ୍ପାନୀରେ କାମ କରିବା କଥା କହି ଗାଁର ଜଣେ ବ୍ୟକ୍ତି କଟକ ନେଇ ଯାଇଥିଲେ। କିନ୍ତୁ ସେଠାରେ ଜଣେ ଲୋକଙ୍କ ଘର କାମ ପାଇଁ ଛାଡ଼ି ଦେଇଥିଲେ। ସେଠାରୁ ଦିନେ ବାହାରକୁ ଯାଇଥିଲାବେଳେ ଫେରିବା ବାଟ ଭୁଲି ବାଟବଣା ହୋଇଯାଇଥିଲି। କିନ୍ତୁ ଗୋପୀନାଥପୁର ଜଣେ ବ୍ୟକ୍ତି ଆଶ୍ରୟ ଦେଇଥିଲେ’ ବୋଲି ଚରଣ କହିଛନ୍ତି। ଗ୍ରାମର ପ୍ରବୀର କୁମାର ସ୍ବାଇଁ କହିଛନ୍ତି, ଚରଣଙ୍କୁ କଟକ ଗୋପୀନାଥପୁରର ବେଙ୍ଗ ଦାସ ଆଶ୍ରୟ ଦେଇ ଘରୋଇ କାମରେ ଲଗାଇଥିଲେ। ପ୍ରାୟ ୧୫ ବର୍ଷ ରହିବା ପରେ ଦାସଙ୍କ ମୃତ୍ୟୁ ହୋଇଯାଇଥିଲା। ଫଳରେ ଚରଣ ପୁଣି ଅସହାୟ ହୋଇ ପଡ଼ି ୧୦/୧୫ ଦିନ ଉକ୍ତ ଗାଁରେ ବୁଲାବୁଲି କରିଥିଲେ। ଜଣେ ମହିଳା ତାଙ୍କୁ ଘରେ ରଖିଥିଲେ। ପରବର୍ତ୍ତୀ ସମୟରେ ସେ ତାଙ୍କ ବାପା ତଥା ଟାଙ୍ଗୀ ବିରୋଳ ଗ୍ରାମର ଶରତ ଦାସଙ୍କ ଘରେ ଛାଡ଼ି ଦେଇଥିଲେ। ସେବେଠାରୁ ଚରଣ ବିରୋଳରେ ରହି ଗୁହାଳ ସଫେଇ ସହ ମେଣ୍ଢା ଚରାଇବା କାମରେ ନିୟୋଜିତ ଥିଲେ। କିଛି ଦିନ ତଳେ ଫୁଲହାର ଗାଁର ଜଣେ ପିକ୍ଅପ୍ ଭ୍ୟାନ୍ ଚାଳକ ବିରୋଳରେ ପହଞ୍ଚତ୍ ଏକ ଦୋକାନରୁ କିଛି କିଣୁଥିବାବେଳେ ଚରଣଙ୍କ ସହ ତାଙ୍କର ଭେଟ ହୋଇଥିଲା। ସେ ଚରଣଙ୍କ ପରିଚୟ ଓ ଘର ଛାଡ଼ିବା ଘଟଣା ଜାଣିବା ପରେ ଗାଁରେ ଆସି ଜଣାଇଥିଲେ। ଫୁଲହାରର ବୟସ୍କ ଲୋକମାନେ ଚରଣଙ୍କୁ ଫେରାଇ ଆଣିବାକୁ ପରାମର୍ଶ ଦେଇଥିଲେ। ତଦନୁଯାୟୀ ଗାଁର କେତେଜଣ ଆଗ୍ରହ ଦେଖାଇଥିଲେ। ଏହି କାର୍ଯ୍ୟରେ ମହିଳା ସମିତି ଗଠନ କରିଥିବା ବିରୋଳର ଜଣେ ମହିଳା ମଧ୍ୟ ସହାୟତା କରିଥିଲେ। ରବିବାର ସକାଳେ ଫୁଲହାରର ଅରୁଣଦ୍ୱୟ ପଲାଉର, ସୂର୍ଯ୍ୟ ନାରାୟଣ ପଲାଉର, ତପନ କୁମାର ସ୍ବାଇଁ, ବୀର କିଶୋର ବଡ଼ୁ, ସୁନାକର ପଲାଉର ଓ ସୁଧାଂଶୁ ଭୋଇ ଏକ ବୋଲେରୋ ଯୋଗେ ବିରୋଳରେ ପହଞ୍ଚତ୍ ଚରଣଙ୍କୁ ଫେରାଇ ଆଣିଥିଲେ। ତାଙ୍କୁ ଦେଖି ପରିବାରରେ ଖୁସି ଭରି ଯାଇଥିବାବେଳେ ଗାଁ ଉତ୍ସବମୁଖର ହୋଇ ପଡିଥିଲା। କିନ୍ତୁ ଚରଣଙ୍କ ପାଇଁ ଏହି ଖୁସି କେତେଦିନ ରହୁଛି ତାହା ସମୟ କହିବ। କାରଣ ତାଙ୍କ ସାନ ଭାଇ ବିଜୟଙ୍କ ଆର୍ଥିକ ସ୍ଥିତି ମଧ୍ୟ ଭଲ ନାହିଁ। ଇନ୍ଦିରା ଆବାସ ୨ ବଖରା ଘରେ ସ୍ତ୍ରୀ, ପୁଅ, ନାତି ସହ ବିଜୟ କଷ୍ଟରେ ରହୁଛନ୍ତି। ଚରଣଙ୍କ ରହିବା ପାଇଁ ଘର ଓ ରାଶନ କାର୍ଡ ଜରୁରୀ। ଜିଲା ପ୍ରଶାସନ ଏ କ୍ଷେତ୍ରରେ ସହାୟତାର ହାତ ବଢାଇଲେ ଚରଣ ଅବଶିଷ୍ଟ ଜୀବନ ଭଲରେ କାଟିଦେବେ ବୋଲି ଗ୍ରାମବାସୀ କହୁଛନ୍ତି।
