ବାହାନଗା, ୧୦।୯ (ଡି.ଏନ.ଏ.)-ବାଲେଶ୍ୱର ଜିଲା ବାହାନଗା ବ୍ଲକ ସମୁଦ୍ର ଉପକୂଳବର୍ତ୍ତୀ ଅଞ୍ଚଳରେ ଥିବା ଝାଉଁ ଜଙ୍ଗଲ ଜୁଆର ମାଡରେ ଉଜୁଡିଯିବାକୁ ବସିଲାଣି। ଏପରିକି ବରିପଦା ପଞ୍ଚାୟତର ମହାରୁଦ୍ରପୁର ଆଡିଆ ସମେତ ଆଡିଆର ବଙ୍ଗାଳିସାହି ଓ କଲ୍ୟାଣି ପଞ୍ଚାୟତର ଜହ୍ନିପୁରର ଭିଲ୍ଲା ଆଡିଆ ଗ୍ରାମଗୁଡିକ ସମୁଦ୍ର ଗର୍ଭରେ ଲୀନ ହେବାକୁ ବସିଲାଣି। ଲୁଣି ବନ୍ଧ ନିର୍ମାଣ ପାଇଁ ଗ୍ରାମବାସୀ ଦାବି କରି ଥକିଗଲେଣି, ତଥାପି ସମସ୍ୟା ପ୍ରତି ଗୁରୁତ୍ୱ ଦିଆଯାଉନି।
ଏକଦା ସମୁଦ୍ର କୂଳବର୍ତ୍ତୀ ଗ୍ରାମର ଲୋକଙ୍କୁ ଲୁଣି ପାଣିରୁ ସୁରକ୍ଷା ଦେବା ଓ ଚାଷ ଜମି ସମେତ ଗ୍ରାମ ଭିତରକୁ ଜୁଆର ନ ଯିବା ପାଇଁ ସରକାର ସମୁଦ୍ର କୂଳରେ ଝାଉଁ ଜଙ୍ଗଲ ସୃଷ୍ଟି କରିଥିଲେ। ମାତ୍ର ସେହି ଝାଉଁ ଜଙ୍ଗଲକୁ ସୁରକ୍ଷା ଦେବା ନିମନ୍ତେ କୂଳରେ ସମୁଦ୍ର ବାଲି ପକାଇ ଉଚ୍ଚା ଆଡି କରାଯାଇଥିଲା ା ମାତ୍ର ଜୁଆର ପାଣି ଏବେ ଆସି ଧୀରେ ଧୀରେ କୂଳରେ ମାଡ ହୋଇ ଉଚ୍ଚା ବାଲିବନ୍ଧ ଧୋଇଯିବାରୁ ଝାଉଁ ଗଛଗୁଡିକ ମୂଳରୁ ଉପୁଡି ପଡୁଛି। ଫଳରେ ଦୀର୍ଘବର୍ଷ ପୂର୍ବରୁ ନିର୍ମାଣ ହୋଇଥିବା ବନ୍ଧ ଜୁଆର ମାଡରେ ନଷ୍ଟ ହୋଇଯାଇଛି। ସମୁଦ୍ର ଲୁଣି ଜୁଆର ପାଣି ଧୀରେ ଧୀରେ କଲ୍ୟାଣି ପଞ୍ଚାୟତର ଜହ୍ନିପୁର ଭିଲ୍ଲା ଆଡିଆ ଗ୍ରାମ ଓ ବରିପଦା ପଞ୍ଚାୟତର ମହାରୁଦ୍ରପୁର ଆଡିଆ, ବଙ୍ଗାଳି ସାହି ସମେତ ଗଦେଇ ସାଗର ନାଳ ଅଞ୍ଚଳରେ ଥିବା ଜନବସତି ଓ ଝାଉଁଜଙ୍ଗଲ ସମେତ ଚାଷଜମି ଆଡକୁ ମାଡିଯାଉଛି। ଯଦି ସମୁଦ୍ର କୂଳରେ ସରକାର ଲୁଣି ବନ୍ଧ ନିର୍ମାଣ ନ କରିବେ ତାହେଲେ ସମୁଦ୍ର କୂଳରେ ଥିବା ଝାଉଁ ଜଙ୍ଗଲ ସମ୍ପୂର୍ଣ୍ଣ ନଷ୍ଟ ହେବା ସହିତ ଦୁଇଟି ପଞ୍ଚାୟତର ୩ଟି ସାହି ସମୁଦ୍ର ଗର୍ଭରେ ଦିନେ ଲୀନ ହୋଇଯିବ। ଏଥିନିମନ୍ତେ ସ୍ଥାନୀୟ ଅଞ୍ଚଳର ଅକ୍ଷୟ ନନ୍ଦ ଦାସ, ଅଚ୍ୟୁତନନ୍ଦ ଦାସ, ଗୟାଧର ମହାଳିକ, ଅବନ୍ତି ମଣ୍ଡଳ, କାଳିଚରଣ ଦାସ, ସନ୍ତୋଷ କୁମାର ମଣ୍ଡଳ, ଜଗବନ୍ଧୁ ମଲ୍ଲିକ, ଅଶୋକ ଦାସ, କାର୍ତ୍ତିକ ମଣ୍ଡଳ, ଗଣେଶ ମଣ୍ଡଳ ଓ ଗୌତମ ମଣ୍ଡଳ ପ୍ରମୁଖ ଗ୍ରାମବାସୀ ପୂର୍ବତନ କେନ୍ଦ୍ରମନ୍ତ୍ରୀ ତଥା ବାଲେଶ୍ୱର ଜିଲା ଏମ୍ପି ପ୍ରତାପ ଚନ୍ଦ୍ର ଷଡଙ୍ଗୀଙ୍କୁ ଦେଖା କରି ସମୁଦ୍ର କୂଳର କଲ୍ୟାଣି ପଞ୍ଚାୟତର ଭିଲ୍ଲା ଆଡିଆଠାରୁ ବରିପଦାର ମହାରୁଦ୍ରପୁର ଆଡିଆ ସମେତ ଗଦେଇ ସାଗର ନାଳ ପର୍ଯ୍ୟନ୍ତ ୨ କିଲୋମିଟର ଦୂରତ୍ୱ ନିମନ୍ତେ ଏକ ଲୁଣି ବନ୍ଧ ନିର୍ମାଣ ପାଇଁ ଦାବିପତ୍ର ପ୍ରଦାନ କରିଥିଲେ। ହେଲେ ଏପର୍ଯ୍ୟନ୍ତ କଣ ପଦକ୍ଷେପ ନିଆଯାଇଛି ତାହା ସେମାନେ ଜାଣିନାହାନ୍ତି। ଲୁଣି ବନ୍ଧ ନିର୍ମାଣ କରାଗଲେ ସମୁଦ୍ର କୂଳରେ ନଷ୍ଟ ହେବାକୁ ଯାଉଥିବା ଝାଉଁ ଜଙ୍ଗଲ ସମେତ ଦୁଇଟି ପଞ୍ଚାୟତର ୩ଟି ଗ୍ରାମ ଓ ଚାଷ ଜମି ସୁରକ୍ଷିତ ହୋଇପାରିବ।
