ଭଦ୍ରକ,୧୮ା୧୨(ସନାତନ ରାଉତ): ରବିବାର ବିଳମ୍ବିତ ରାତିରେ ଦୁର୍ବୃତ୍ତମାନେ ଦୁଇଟି ମନ୍ଦିରରୁ ଦାନ ବାକ୍ସ ସହ ଠାକୁରଙ୍କ ଅଳଙ୍କାର ଚୋରି କରି ନେଇଛନ୍ତି। ସୂଚନା ମୁତାବକ ଭଦ୍ରକ ପୁରୁଣା ବଜାର ଥାନା ସନ୍ଥିଆସ୍ଥିତ ରାଧାଗୋବିନ୍ଦଜୀଉ ଓ ମଦନମୋହନ ମନ୍ଦିରରୁ ଚୋରି ହୋଇଛି। ଦାନବାକ୍ସରୁ ଟଙ୍କା ନେଇଯାଇ ବାକ୍ସକୁ ମନ୍ଦିରଠାରୁ କିଛି ଦୂର ହୋରିପଦା ଠାରେ ପକାଇଛନ୍ତି। ଏପରିକି ଦୁର୍ବୃତ୍ତମାନେ ପ୍ରଭୁ ମଦନମୋହନଙ୍କ ଆଖି ତାଡ଼ି ନେଇଛନ୍ତି। ଯାହା ଭକ୍ତ ଓ ସ୍ଥାନୀୟ ଅଧିବାସୀଙ୍କୁ ବ୍ୟଥିତ କରିଛି। ଖବର ପାଇ ସିଟି ଡିଏସ୍ପି ଅଂଶୁମାନ ଦ୍ବିବେଦୀ ଓ ପୁରୁଣାବଜାର ଆଇଆଇସି ନିରୋଜ ସାମଲ ସଦଳବଳ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ମନ୍ଦିରରେ ଲାଗିଥିବା ସିସିଟିଭିରେ ଚୋରି ବେଳର ଦୃଶ୍ୟ କଏଦ ହୋଇଥିବା ବେଳେ ସିସିଟିଭିକୁ ଯାଞ୍ଚ କରିଛି ପୋଲିସ। ସାଇଣ୍ଟିଫିକ୍ ଟିମ୍ ଓ ସନ୍ଧନୀ କୁକୁର ଦ୍ୱାରା ତଦନ୍ତ ହେବ ବୋଲି ସିଟି ଡିଏସଥପି କହିଛନ୍ତି। ଏନେଇ ରାଧାଗୋବିନ୍ଦ ମନ୍ଦିର କମିଟି ସଭାପତି କେଦାରନାଥ ଭଟ୍ଟାଚାର୍ଯ୍ୟ ଓ ମଦନମୋହନ ମନ୍ଦିର ମହନ୍ତ ଆଶିଷ ଦେବ ଗୋସ୍ବାମୀ ଲିଖିତ ଅଭିଯୋଗ କରିଛନ୍ତି।
