ମାଲକାନଗିରି,୩୧।୮(ସ୍ବ.ପ୍ର.): ମାଲକାନଗିରି ଜିଲାରେ ଉନ୍ନତମାନର ସ୍ବାସ୍ଥ୍ୟ ସେବା ଯୋଗାଇଦେବାକୁ ରାଜ୍ୟ ସରକାର ସ୍ବାସ୍ଥ୍ୟକେନ୍ଦ୍ରଗୁଡିକରେ ସମସ୍ତ ବ୍ୟବସ୍ଥା କରିଛନ୍ତିି। କେତେକ କ୍ଷେତ୍ରରେ ଆଉଟ ସୋର୍ସିଂ ସଂସ୍ଥାକୁ ନିୟୋଜିତ କରିବାକୁ ଠିକା ଦିଆଯାଇଛି। ମାତ୍ର ଏହି ସଂସ୍ଥାଗୁଡିକ କୌଣସି ବିଭାଗରେ ଠିକରେ କାର୍ଯ୍ୟ କରୁନାହାନ୍ତି। ଫଳରେ ଜିଲା ସଦର ମହକୁମା ସ୍ବାସ୍ଥ୍ୟକେନ୍ଦ୍ର ଭିତ୍ତିଭମି ଦୁର୍ବଳ ହେବା ସହ ରୋଗୀ ହନ୍ତସନ୍ତ ହେଉଛନ୍ତି। ଏସମ୍ପର୍କରେ ସ୍ବାସ୍ଥ୍ୟକେନ୍ଦ୍ର ସୁପରିଟେଣ୍ଡେଣ୍ଟ ଜିଲା ମୁଖ୍ୟ ଚିକିତ୍ସା ଅଧିକାରୀ (ସିଡିଏମଓ) ଡା. ପ୍ରଫୁଲ କୁମାର ନନ୍ଦଙ୍କୁ ଜଣାଇ ଆସୁଥିଲେ ମଧ୍ୟ ସେ ଅଣଦେଖା କରଥିବା ଅଭିଯୋଗ ହେଉଛି। ଅନ୍ୟପକ୍ଷରେ ଟେଣ୍ଡର ଅବଧି ସରିଥିଲେ ମଧ୍ୟ ଏବେ ସମ୍ପୃକ୍ତ ଠିକା ସଂସ୍ଥାଗୁଡିକୁ ସିଡିଏମଓ ପୁଣି ନବୀକରଣ କରୁଥିବା ଜଣାପଡିଛି। ୨୦୧୮ ନଭେମ୍ବର ୨୮ରେ ରାଜ୍ୟର ସ୍ବାସ୍ଥ୍ୟକେନ୍ଦ୍ର ଗୁଡିକରେ ସଫେଇ, ଲଣ୍ଡ୍ରି, ରୋଗୀଙ୍କୁ ଖାଇବା, ସୁରକ୍ଷା ନିମନ୍ତେ ଟେଣ୍ଡର ଆହ୍ବାନ କରାଯାଇଥିଲା। ମାଲକାନଗିରି ଜିଲା ସଦର ମହକୁମା ଡାକ୍ତରଖାନାରେ ଏହି ସେବା ଯୋଗାଇବାକୁ ସୁମିତ ସିକୁରିଟି ଏଜେନ୍ସିକୁ ଚୟନ କରାଯାଇଥିଲା। ଏହି ଏଜେନ୍ସି ଠିକା ପାଇବା ପରେ ନାମକୁମାତ୍ର କାମ କରିଆସିଛି। ଏନେଇ ଡାକ୍ତରଖାନା ସୁପରିଟେଣ୍ଡେନ୍ତ ସମ୍ପୃକ୍ତ ଠିକାସଂସ୍ଥା ଏବଂ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କୁ ୧୮ା୭ା୨୨ ଓ ୧୦ା୮ା୨୨ରେ ଚିଠି ଲେଖି ଜଣାଇଥିଲେ। ଏ ଦିଗରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ଅନୁରୂପ ଭାବେ ସଫେଇ କାର୍ଯ୍ୟ ପାଇଁ ଦାୟିତ୍ୱ ନେଇଥିବା ଶାଇନ ଲନ୍ଦ୍ରି ସର୍ଭିସ ମଧ୍ୟ ନିଜ ଦାୟିତ୍ୱରେ ଅବହେଳା କରିଆସୁଛି। ମାଲକାନଗିରି ଜିଲା ସଦର ଡାକ୍ତରଖାନା ଉପରେ ମାଲକାନଗିରି ସହ ସୀମାନ୍ତ ଛତିଶଗଡ଼, ଆନ୍ଧ୍ର ପ୍ରଦେଶ, ତେଲେଙ୍ଗନା ରାଜ୍ୟର ରୋଗୀ ନିର୍ଭର କରିଥାନ୍ତି। ଉନ୍ନତ ସ୍ବାସ୍ଥ୍ୟସେବା ପାଇଁ ରାଜ୍ୟସ୍ତରୀୟ କାୟାକଳ୍ପ ପୁରସ୍କାର ପାଇଥିବା ଏହି ଡାକ୍ତରଖାନାର ଭିତ୍ତିଭୂମି ଏବେ ବିଗିଡିବାରେ ଲାଗିଛି। ଏ ସମ୍ପର୍କରେ ସିଡିଏମଓ ନନ୍ଦଙ୍କୁ ପଚାରିବାରୁ ସେ କିଛି ମତାମତ ଦେବାକୁ ମନା କରି ଦେଇଥିଲେ। ଏହାର ଉଚ୍ଚସ୍ତରୀୟ ତଦନ୍ତ ଲାଗି ସାଧାରଣରେ ଦାବି ହେଉଛି।
